அவன்கார்டே குறித்து வெளியாகும் தகவல்களால் அரசாங்கம் அதிர்ச்சி

காலித் துறைமுகத்தில் தற்போது தரித்துநிற்கும் அவன்ட்கார்டே நிறுவன கப்பல் தந்திரோபாய ரீதியில் முக்கியத்துவம் வாய்ந்த சர்ச்சைக்குரிய இந்துசமுத்திர தீவான மினிகோய்க்கு (இலட்சதீவில்  இந்திய நிர்வாகத்தின் கீழ் உள்ள தீவு) அருகில் பயணம்செய்த விபரம் விசாரணைகளின் மூலம் தெரியவந்துள்ளது.

இலங்கையில் பலத்த சர்ச்சைக்களை உருவாக்கியுள்ள இந்த கப்பல் செங்கடலில் இருந்து இந்துசமுத்திரத்தின் ஊடாக பயணம்செய்துள்ளது.

குறிப்பிட்ட கப்பல் இலங்கைக் கொடியுடன் பயணம்செய்த காரணத்தினால் அந்த கப்பலில் இருந்தவர்கள் அயல்நாடுகளின் பாதுகாப்பிற்கு பாதிப்பை ஏற்படுத்தும் விதத்தில் செயற்பட்டிருந்தால் அதற்கு இலங்கையே பொறுப்பு கூறவேண்டிய நிலை ஏற்பட்டிருக்கும்,

குறிப்பிட்ட கப்பல்  சர்ச்சைக்குரிய மினிகோய் தீவிற்கு அருகே பயணம்செய்தது தெரியவந்ததை தொடர்ந்து கப்பலின் நோக்கம் குறித்து புதிய சந்தேகங்கள் எழுந்துள்ளன. ஏற்கனவே கப்பல் ஆயுதவிற்பனை மற்றும் கடத்தலில் ஈடுபட்டதாக சந்தேகம் நிலவுகின்றமை குறிப்பிடத்தக்கது.

குறிப்பிட்ட கப்பல் ஜிஎஸ்பி சாதனங்களை செயற்படாமல் நிறுத்தியிருந்ததும் விசாரணகளின் மூலம் தெரியவந்துள்ளது, மாலைதீவை கடந்து வருகையில் இந்த கப்பல் குறிப்பிட்ட தீவிற்குள்(மினிகோய்) சென்றுள்ளதும் விசாரணைகளின்போது தெரியவந்துள்ளது.

மேலும் மாலைதீவின் ஜனாதிபதியின் படகில் குண்டுவெடிப்பு இடம்பெற்ற வேளைஅவன்ட் கார்டே கப்பல் மாலைதீவு கடற்பரப்பில் காணப்பட்டதும் தெரியவந்துள்ளது.

இதேவேளை கடந்த ஜனவரியில் குறிப்பிட்ட கப்பல் முதற்தடவை காலி கடற்பரப்பில் கைப்பற்றப்பட்டவேளை ஜனாதிபதியை பதவி கவிழ்ப்பதற்காக ஆயுதங்களை மாலைதீவிற்குள் கொண்டுவந்தார் என்ற குற்றச்சாட்டின் பேரில் அந்த நாட்டின் பாதுகாப்பு அமைச்சர் முகமது நசீம் கைதுசெய்யப்பட்டிருந்தது குறிப்பிடத்தக்கது.

நசீம் அவன்ட்கார்டே நிறுவனத்தின் தலைவரான ஓய்வுபெற்ற மேஜர்ஜெனரல் நிசங்க சேனாதிபதியின் நெருங்கிய நண்பர் என்பது குறிப்பிடத்தக்கது.

மாலைதீவின் முன்னாள் ஜனாதிபதி கிளர்ச்சிமூலம் பதவியிலிருந்து வெளியேற்றப்பட்ட பின்னர் பாதுகாப்பு அமைச்சர் முகமது நசீம், நிசங்க சேனாதிபதியை மாலைதீவிற்கான சர்வதேகடற்போக்குவரத்து ஆலோசகராக நியமித்திருந்தார்.

அவன்ட்கார்டே கப்பல் 800 துப்பாக்கிகளுடன் மினிகோய் தீவிற்கு அருகில் பணயம் செய்தமை குறித்து இலங்கை அதிகாரிகள் கரிசனை கொண்டுள்ளனர். கப்பலில் உள்ள ஆவணங்களின் படி குறிப்பிட்ட கப்பலில் மூன்று துப்பாக்கிகளை மாத்திரம் கொண்டுசெல்லமுடியும். எனினும் கப்பலில் 816 துப்பாக்கிகளும், ரவைகளும் காணப்பட்டுள்ளன.
இவற்றில் 59 துப்பாக்கிகளை நிச்சயமாக சட்டவிரோதமானவை என தெரிவிக்க முடியும் என அதிகாரிகள் தெரிவித்துள்ளனர். அவற்றின் தொடர் இலக்கங்களில் குளறுபடிகள் இடம்பெற்றுள்ளன.

அவன்ட் கார்டே கப்பல்போன்றவற்றை கண்காணிப்பு இன்றி நடமாட அனுமதிப்பதால் ஏற்படக்கூடிய ஆபத்துக்கள் குறித்து இந்தியா ஏற்கனவே இலங்கையை எச்சரித்திருந்தது, இதன் காரணமாக இந்து சமுத்திரத்திற்கு ஏற்படக்கூடிய ஆபத்துகுறித்து இந்திய கடற்படை தளபதிகள் பலமுறை எச்சரித்திருந்தனர்.

ஐரோப்பிய நாடுகளில் குற்றச்செயல்களிற்கு பயன்படுத்தப்பட்ட ஆயுதங்கள் இலங்கையை சேர்ந்தவை என தெரியவந்ததை தொடர்ந்து பல மேற்குலக நாடுகளும் அவன்ட் கார்டேயின் செயற்பாடுகள் குறித்து எச்சரித்திருந்தன.

http://globaltamilnews.net/GTMNEditorial/tabid/71/articleType/ArticleView/articleId/125483/language/ta-IN/article.aspx