'இலங்கை அரசையும், விடுதலைப் புலிகளையும் சர்வதேச சமூகம் கடுமையாகக் கையாள வேண்டும்'-யாழ் ஆயர்

இலங்கை இனப்பிரச்சினை தொடர்பில் இலங்கை அரசையும், விடுதலைப்புலிகளையும் சர்வதேச சமூகம் கடுமையாகக் கையாள வேண்டும் என்று யாழ் ஆயர் தோமஸ் சௌந்திரநாயகம் தனது நத்தார் செய்தியில் வலியுறுத்தியுள்ளார்.

யாழ் ஆயர் தோமஸ் சௌந்தரநாயகம் ஆண்டகை அவர்கள் இன்று வெளியிட்டுள்ள கிறிஸ்மஸ் தின செய்தியில் மக்கள் அனைவருக்கும் அமைதியையும் சமாதானத்தையும் சகோதரத்துவத்தையும் பாதுகாப்பையும் கொண்டுவரும் விழாவாக இந்த கிறிஸ்மஸ் விழா அமைய வேண்டும் என வாழ்த்தியுள்ளார்.

அதேவேளை, சமாதான முயற்சிகளின் அனுசரணையாளர்களான நோர்வேயும் மற்றும் இணைத்தலைமை நாடுகளும் போரில் ஈடுபட்டுள்ள இரு தரப்பினரையும் கடின போக்குடன் கையாள வேண்டும் எனவும் அவர் கோரியுள்ளார்.

சுனாமி பேரலைகளினால் உயிரிழந்தவர்கள் மற்றும் துன்பங்களுக்கு உள்ளானவர்களையும் நினைவு கூர்ந்து அவர்களுக்காகப் பிரார்த்திக்க வேண்டும் எனவும் கேட்டுள்ள யாழ் ஆயர் அவர்கள், வடக்கில் உள்ள மக்கள் மோசமான ஒரு போர் நெருக்கடிக்குள் சிக்கியுள்ளமை குறித்து தமது வருத்தத்தையும் கவலையையும் வெளியிட்டுள்ளார்

ஒன்றிணைந்துள்ள நாட்டின் இரு பெரும்பான்மைக் கட்சிகளும் எத்தகைய ஒரு தீர்வைத் தமிழ் மக்களுக்குத் தரப்போகின்றன என்பது குறித்த தமது ஐயப்பாட்டையும் தமது கிறிஸ்மஸ் தின செய்தியில் அவர் குறிப்பிட்டுள்ளார்.

போரையும் அதன் வழியிலான தீர்வையும் அரசு முன்னெடுக்க விளைகின்ற அதேவேளை மாவீரர்தின நிகழ்வு உரையின் மூலம் விடுதலைப்புலிகளின் தலைவர் வெளியிட்டிருக்கும் கருத்துக்களும் போரை நாடுவதாக அமைகின்றது எனவும் அவர் கவலை வெளியிட்டுள்ளார்.

இந்த நிலையில் இந்தியாவின் பங்களிப்பு மிகவும் முக்கியமானது என்பதையும் தமது கிறிஸ்மஸ்த தின செய்தியில் யாழ் ஆயர் தோமஸ் சௌந்தரநாயகம் அவர்கள் கோடிட்டுக் காட்டியிருக்கின்றார்.

http://www.bbc.co.uk/tamil/news/story/2004...ntaffairs.shtml