தமிழ் இயக்குனர்களுக்கு வலைவீசும் தெலுங்கு நடிகர்கள்

தெலுங்கு படவுலகில் தமிழ் கலைஞர்களுக்கு தனிமரியாதை கிடைத்து வரும் காலம் இது. தமிழர்கள் என்றால் யோசிக்காமல் படம் இயக்கும் வாய்ப்பை கொடுத்து வருகிறார்கள் தெலுங்கு தயாரிப்பாளர்கள். சென்ற வருட தெலுங்குபட 'ஹிட்' லிஸ்ட் தமிழர்கள் மீதான மரியாதையை அதிகப்படுத்தியுள்ளது.

சென்ற வருடம் வெளியான படங்களில் 'ஸ்டாலின்', 'பொம்மரிலு' படங்கள் மட்டுமே பெரிய அளவில் வெற்றி பெற்றன. இந்த இரண்டு படங்களையும் இயக்கியவர்கள் தமிழர்கள். ஸ்டாலினை ஏ.ஆர். முருகதாஸும், பொம்மரிலுவை தமிழகத்தை சேர்ந்த பாஸ்கரும் இயக்கியிருந்தனர்.

தவிர, தமிழ் படங்கள் தெலுங்கில் 'டப்' செய்யப்பட்டு அதிக வசூலை ஈட்டி வருகின்றன. இதனால் தமிழ் இயக்குனர்களின் படங்களில் நடிக்க ஆர்வம் காட்டுகின்றனர் தெலுங்கு நட்சத்திரங்கள்.

செல்வராகவன் இயக்கத்தில் வெங்கடேஷும், ராகவா லாரன்ஸ் இயக்கத்தில் நாகார்ஜுனாவும் தலா ஒரு படங்களில் நடிக்கிறார்கள். பாஸ்கரின் படத்தில் நடிக்க அங்கு பெரும் போட்டியே நடக்கிறது.

'வரலாறு' படத்தின் தெலுங்கு ரீ-மேக்கில் பவன்கல்யாண் நடிக்கிறார். இதனை கே.எஸ். ரவிக்குமார் இயக்குகிறார். அதேபோல் லிங்குசாமி இயக்கத்தில் நடிக்க கால்ஷீட்டை தயாராக வைத்துக் கொண்டிருக்கிறார் மகேஷ்பாபு. இவரிடம் நம்மூர் ரமணாவும் கதை சொல்லியிருக்கிறார்.

இவர்களை தவிர ஷங்கர், ஹரி உள்ளிட்ட ஏராளமான இயக்குனர்களை ஆந்திராவுக்கு அழைத்துக் கொண்டிருக்கிறது தெலுங்கு படவுலகம். சிரஞ்சீவியின் மகன் அறிமுகமாகும் படத்தை புரி ஜெகநாத் இயக்கினாலும் நம்மூர் ஹாரிஸ் ஜெயராஜே அப்படத்திற்கு இசையமைக்கிறார்.

ஆந்திராவில் நிலவும் தமிழ் அலைக்கு நம்மவர்களின் திறமைதான் காரணம் என்றால் மிகையில்லை!