விஷமிகள் ஊடுருவல்

உலகையே திரும்பி பார்க்க வைத்த, மாணவர்களின், சென்னை, மெரினா போராட்டத்தை, தேச விரோத சக்திகள் தங்களின் விஷமத்தால், கொச்சையாக்கி விட்டனர். ஜல்லிக்கட்டுக்கு ஆதரவாக, அமைதி வழியில் நடந்த, ஒரு வார போராட்டத்தை வன்முறையாக்கி, அதில் குளிர் காய்ந்தனர். காவல் நிலையங்கள், குடிசைகளுக்கு தீ வைத்து, கலவரத்தை துாண்டினர். போலீசுக்கு எதிராக நடத்தப்பட்ட திடீர் மறியல்களால், போக்குவரத்து துண்டிக்கப்பட்டு, பெண்கள், பள்ளி மாணவர்கள் பரிதவித்தனர்.
 

இதுவரை இல்லாத அளவுக்கு

ஜல்லிக்கட்டை நடத்தக் கோரி, ஜன., 17 காலை, சென்னை, மெரினாவில் உள்ள விவேகானந்தர் இல்லம் முன், மாணவர்கள் அமைதியாக போராட்டத்தை துவங்கினர். போக்குவரத்தை ஒழுங்குபடுத்துதல், கடற்கரையை சுத்தம் செய்தல் உள்ளிட்ட பணிகளிலும், அவர்களே ஈடுபட்டனர்.
இதை பார்த்து வியந்த இளைஞர்கள், பெண்கள் என, பலரும், அவர்களுக்கு ஆதரவாக, மெரினாவில் குவிந்தனர். அதனால், இதுவரை இல்லாத அளவுக்கு, லட்சக்கணக்கானோர் ஆதரவுடன், மெரினா போராட்டம் மிகப்பெரிய வெற்றி பெற்றது.

அதை பார்த்து, வெளிநாடுகளில் வசிக்கும் தமிழர்களும், ஜல்லிக்கட்டுக்கு ஆதரவாக போராடினர். மெரினா கூட்டத்தை பார்த்த, சில, தேச விரோத அமைப்புகளைச் சேர்ந்தவர்கள், மாணவர்கள் போர்வையில், மெரினாவில் புகுந்தனர். அவர்கள், ஜல்லிக்கட்டு பிரச்னையை தவிர்த்து, மத்திய, மாநில அரசுகளுக்கு எதிராக கோஷங்களை எழுப்பி, போராட்டத்தை திசை திருப்பினர்.அவர்கள் செய்த ஏற்பாடுகளால், போராட்டக் களத்தில் இருந்த லட்சக்கணக்கானவர்களுக்கு,தினமும் குடிநீர், உணவு வகைகள் கிடைத்தன.
 

கடலை நோக்கி ஓட ஆரம்பித்தனர்

இந்நிலையில், ஜல்லிக்கட்டுக்கு ஆதரவாக, தமிழக அரசு அவசர சட்டம் இயற்றியதை அடுத்து, மாணவர்கள், போராட்டத்தை திரும்ப பெற முடிவு செய்தனர். ஆனால், குடியரசு தின விழாவை சீர்குலைக்க நினைத்த, தேச விரோதி சக்திகள், அரசு நடவடிக்கைகளை தவறாக சித்தரித்து, மாணவர்களை கலைந்து செல்ல விடாமல், அங்கேயே முகாமிட வைத்தன. அந்த விபரம், போலீசாருக்கு கிடைத்தது.