வடமாகாண சபையை முடக்கி தொடர் போராட்டங்களை முன்னெடுப்போம்! வேலையற்ற பட்டதாரிகள் எச்சரிக்கை

வடமாகாண வேலையற்ற பட்டதாரிகள் நிரந்தர அரச வேலைவாய்ப்பை வலியுறுத்தி யாழ்.மாவட்டச் செயலகத்திற்கு முன்பாக மேற்கொண்டு வரும் காலவரையற்ற போராட்டம் இன்று புதன்கிழமை(17) 80 ஆவது நாளாகவும் தீர்வின்றி இடம்பெற்று வரும் நிலையில் இன்றைய தினம் போராட்டத்தில் கலந்து கொண்ட பட்டதாரிகள் மேற்கண்டவாறு எச்சரிக்கை விடுத்துள்ளனர்.

அவர்கள் மேலும் கருத்துத் தெரிவிக்கையில்,

எங்கள் போராட்டம் 80 ஆவது நாளாகவும் இன்று முன்னெடுக்கப்பட்டு வருகிறது. ஆனால், இந்த 80 நாட்களிலும் எமக்கான எந்தவொரு சாதகமான முடிவுகளும் வழங்கப்படவில்லை என்பது அனைவருக்கும் தெரிந்த விடயம்.

நாங்கள் கடந்த-09 ஆம் திகதி வடமாகாண சபையை முற்றுகையிட்டதுடன் சபையை முடக்கி எமக்கான தீர்வினை வடமாகாண முதலமைச்சர், அமைச்சர்கள், உறுப்பினர்களிடம் கேட்டிருந்தோம். ஆனால், எங்களுக்குச் சாதகமான, உறுதியான எந்தவொரு பதில்களும் தரப்படவில்லை.

இன்று-17 ஆம் திகதி வடமாகாண முதலமைச்சர் ஜனாதிபதியுடன் சந்திக்கவுள்ளதாகவும் அப்போது வேலையற்ற பட்டதாரிகளின் பிரச்சினை தொடர்பில் கலந்துரையாடப்படவுள்ளதாகவும், இந்தக் கலந்துரையாடலின் பின்னர் எமக்குச் சாதகமான முடிவுகள் வழங்கப்படும் எனவும் தெரிவிக்கப்பட்டது.

ஆகவே, இன்று மாலையோ அல்லது நாளையோ எமக்கான நல்ல முடிவுகள் கிடைக்கப் பெற வேண்டும் என நாங்கள் மிகவும் ஆவலுடன் எதிர்பார்த்துக் காத்திருக்கிறோம். எமது பிரச்சினை இன்னமும் இழுபட்டுச் செல்வது எந்த வகையிலும் ஏற்றுக் கொள்ள முடியாது.

எமது வாக்குகளால் தெரிவு செய்யப்பட்ட வடமாகாண சபை அரசாங்கம் அல்லது எமது பாராளுமன்ற உறுப்பினர்களைத் தவிர நாங்கள் யாரிடம் சென்று எமக்கான தீர்வினைக் கேட்க முடியும் எனவும் வேலையற்ற பட்டதாரிகள் கெள்வியெழுப்பியுள்ளனர்.

இதேவேளை, புங்குடுதீவு மாணவி சிவலோகநாதன் வித்தியாவின் கொலைக்கான நீதி கோரலுக்கு ஆதரவு தெரிவித்துப் போராட்டக் களத்திற்கு முன்பாக வடமாகாண வேலையற்ற பட்டதாரிகளால் போராட்டக் களத்திற்கு முன்பாகப் பதாகைகள் காட்சிப்படுத்தப்பட்டுள்ளமையும் இங்கு குறிப்பிடத்தக்கது.