"என்னை பந்தாடிய விளையாட்டு..." - இயக்குனர் பிரபுசாலமன்

நிஜமான அனுபவம் கலக்கும் எந்தவொரு படைப்பிலும் ஜீவன் இருப்பது நிச்சயம். அப்படி தன்னை பாதித்த சொந்த அனுபவத்திற்கு சிபியை நாயகனாக்கி 'லீ'யை தந்திருக்கிறார் இயக்குனர் பிரபு சாலமன். கொக்கி மூலம் கரனுக்கு திருப்புமுனையை கொடுத்த பெருமை இவரை சாரும்.

'கோவை, மதுரைன்னு தெக்கத்தி ஏரியாவுல படம் சூப்பரா போகுதுங்க.. ' என லீ லாபம் ஈட்டும் சந்தோஷத்தை பகிர்ந்து கொண்டவரிடம்...

விளையாட்டு சம்பந்தப்பட்ட கதையை படமாக்கும் எண்ணம் எப்படி ஏற்பட்டது?

"கொக்கி முடிந்த கையோடு சத்யராஜ் சார் என்னை கூப்பிட்டு சிபிக்கு ஏற்ற மாதிரி ஒரு கதை பண்ண சொன்னார். அடுத்த நிமிஷமே என் சொந்த வாழ்க்கையில் சந்தித்த நிகழ்வுகள் ஞாபகத்திற்கு வந்தது. நெய்வேலி செயிண்ட் பால் பள்ளியில்தான் நான் படித்தேன்.

கால்பந்து விளையாட்டில் தீராத காதல் கொண்டிருந்த நான், பள்ளி அணியில் சென்டர் பார்வேட் பிளேயராக ஆடிவந்தேன். சில அரசியல் காரணங்களால் தேசிய அளவில் சிறந்த வீரனாகவேண்டும் என்ற கனவு பாதியிலேயே பொசுங்கிப்போனது. அதன் பிறகு நான் நினைத்ததை அடையமுடியவில்லை. இப்போதும் என்னை நோகடித்துக் கொண்டிருக்கும் இந்த சம்பவத்திற்கு 'லீ' மூலமாக உருவகம் கொடுத்தேன். அது சிபிக்கும் பொருத்தமாக அமைந்துவிட்டது.

'லீ' யில் அரசியல்வாதிகள், விளையாட்டு துறை எல்லாவற்றையும் குற்றம் சுமத்தியுள்ளீர்கள் இதற்கெல்லாம் எதிர்ப்பு எதுவும் வரவில்லையா?

இல்லை. விளையாட்டில் அரசியல் புகுந்திருக்கும் விஷயத்தில் நான் பத்து சதவீதம்தான் சொல்லியிருக்கிறேன். சொல்லப்படாத விஷயங்கள் இன்னும் நிறைய இருக்கிறது. ஒரு உண்மையை சொல்கிறேன்... சென்சார் அதிகாரிகளுக்கு 'லீ'யை போட்டு காட்டியபோது என்னை அவர்கள் மனசார பாராட்டி இந்த கதையை வரவேற்றார்கள். ஒருவேளை இதற்கு எதிர்ப்பு கிளம்பினால் சம்பந்தப்பட்டவர்களுக்கு தக்க பதில் சொல்வேன்.

அடுத்த படம் எதைப்பற்றிய கதை?

காதல், ஆக்ஷன் கலந்த திகில் படமொன்றை இயக்க திட்டமிட்டுள்ளேன். இதைதவிர 'கறுப்புசாமி குத்தகைதாரர்' படம் முடிந்ததும் கரனை வைத்து ஒரு படம் இயக்குகிறேன். விக்ரமை வைத்து ஏற்கனவே 'கிங்' படம் இயக்கியிருக்கிறேன். சந்தர்ப்பம் அமைந்தால் மீண்டும் அவர் படத்தை இயக்குவேன்.

'லீ' யில் கதாநாயகியே தேவையில்லை என்ற கருத்து நிலவுகிறதே?

இதற்கு நானும் உடன்படுகிறேன். இந்த கதையை எழுதும்போது நிலா கேரக்டரே இல்லை. சில காரணங்களால் நாயகி கேரக்டரை உருவாக்கவேண்டிய சூழல் ஏற்பட்டது. ஆனால் நான் இயக்கும் படங்களில் ஏதாவது மெசேஜ் இருக்கவேண்டும் என்பதில் உறுதியாக இருக்கிறேன்.