எறிகணைகளால் தொடரும் அதிர்வுகள்

இலங்கைத்தீவின் கிழக்குப் பிராந்தியம் புலிகளிடம் இருந்து விடுவிக்கப்பட்டுவிட்டது என்ற அரசின் தம்பட்டம் ஒருமாயை என்பதை சர்வதேச சமூகம் விளங்கத்தொடங்கிவிட்டது.

அண்மையில் மட்டக்களப்பில் அரசாங்கத்தின் அனர்த்த முகாமைத்துவ மற்றும் மனித உரிமைகளுக்கான அமைச்சின் ஏற்பாட்டில் இடம்பெறவிருந்த ‘புனர்வாழ்வு’ மாநாட்டில் பங்குபற்றச் சென்ற அனைத்துலக பிரதிநிதிகள் கிழக்கின் உண்மையான களயதார்த்தத்தை கண்கூடாக கண்டு திரும்பிய அதேசமயம் அரசின் ‘விடுவிக்கப்பட்ட கிழக்கு’ எனும் பரப்புரை பாழாய்போனது தென்னிலங்கையில் பலத்த அதிர்வலைகளை ஏற்படுத்தியுள்ளது.

வெளிவிவகார அமைச்சரின் கருத்துப்படி தலைநகரைவிட்டு வெளியே செல்லும் போது தமக்கு அறிவிக்கும் இராஜதந்திர வழமையை மேற்படி நாட்டு தூதர்கள் மீறியுள்ளனர் என்று கூறியுள்ளார்.

பாதுகாப்பு அமைச்சோ தாங்கள் அனுமதி வழங்கியிருந்த போதும் தாங்கள் ஆபத்துப்பற்றி எச்சரித்திருந்ததாக சமாளித்துள்ளனர்.

ஆனால் அனர்த்த முகாமைத்துவ மற்றும் மனித உரிமைகளுக்கான அமைச்சர் வெளிவிவகார அமைச்சரின் கருத்தை மறுதலித்து தெரிவிக்கையில் இம்மாநாட்டுக்கான திட்டமிடல் கூட்டத்தில் வெளிவிவகார அமைச்சின் செயலர் கலந்து கொண்டதாக தெரிவித்தார்.

இராஜதந்திரிகளின் தமிழர் தாயகத்துக்கான பயணம் விடுதலைப்புலிகளுக்கு ஏற்கனவே அறிவிக்கப்படாத நிலையில் அரசபடைகளின் ஆட்டிலறி ஏவுதளத்திற்கு அண்மித்த ஆபத்தான இடத்தில் அனைத்துலக பிரதிநிதிகளை அழைத்து வந்தது அவர்களின் உயிர்களை ஆபத்திலிடும் கொடிய திட்டம் என விடுதலைப்புலிகள் கண்டித்திருந்தமை குறிப்பிடத்தக்கது.

கொழும்பில் இருந்து வெளியாகும் ‘நேசன்’ இதழுக்கு கருத்து தெரிவித்த பெயர்குறிப்பிட விரும்பாத மூத்த இராஜதந்திரி அரசின் நடவடிக்கையை பிழையானது, முட்டாள் தனமானது என வர்ணித்துள்ளார்.

அனைத்துல பிரதிநிதிகளுக்கு உயிராபத்து விளைவிக்கும் நோக்கில் விடுதலைப்புலிகளின் திட்டமிட்ட தாக்குதல் இது என்று அரசாங்கத்தின் பரப்புரைக்கு, ‘அவர்கள் (புலிகள்) இராஐதந்திரிகளை குறிவைத்ததாக நான் நினைக்கவில்லை’ என்ற அமெரிக்க தூதுவரின் கூற்று ஆப்புவைத்துள்ளது.

சில எறிகணைகள் மகிந்த அரசின் பாரிய பரப்புரை இயந்திரத்தின் பலமாத பரப்புரைகளை நாசமாக்கிவிட்டது என்று தெரிவித்த கொழும்பு ஆய்வாரள் ஒருவர் கிழக்கின் யதார்த்தத்தை நேரில் தரிசித்த வெளிநாட்டு தூதுவர்கள் தங்கள் நாடுகளுக்கு அதே யதார்த்த செய்தியை தங்கள் தங்கள் நாடுகளுக்கு தெரிவிக்க போகிறார்களே என்று கவலை தெரிவித்திருந்தார்.

முடிவாக எறிகணைகளின் அதிர்வுக்ள தொடர்ந்த வண்ணமே உள்ளன.

« முன்னைய பக்கம்