இலங்கையில் ரணில் விக்ரமசிங்க தரப்புக்கு கட்சி தாவியவர்களுக்கு அமைச்சர் பதவி தர மறுக்கும் சிறிசேன

ஸ்ரீலங்கா சுதந்திர கட்சி நாடாளுமன்ற உறுப்பினர்களான ஏ.எச்.எம். பௌசி , விஜித் விஜயமுனி சொய்சா, பியசேன கமககே, இந்திக பண்டார, லக்ஷ்மன் செனவிரத்ன மற்றும் மனுஷ நாணயகார ஆகியோர் ரணில் விக்ரமசிங்க அணிக்கு ஆதரவளித்து வருகின்றனர்.

இந்த நிலையில், அமைச்சுப் பதவி வழங்குவதற்கு தனது பெயரை பிரதமர் ரணில் விக்ரமசிங்க பரிந்துரைத்தாகவும், ஆனால் ஜனாதிபதி அதனை நிராகரித்து விட்டார் என்றும், ஸ்ரீலங்கா சுதந்திரக் கட்சியின் மூத்த நாடாளுமன்ற உறுப்பினரும், தற்போது ரணில் விக்ரமசிங்கவுக்கு ஆதரவளித்து வருகின்றவருமான ஏ.எச்.எம். பௌசி, உள்ளுர் ஊடகமொன்றுக்குத் தெரிவித்துதுள்ளார்.

படத்தின் காப்புரிமை facebook Image caption ராஜித சேனாரத்ன

சமூக வலைத்தளங்களில் வெளியாகியுள்ள ஆவணமொன்றின் அடிப்படையில், ஏ.எச்.எம். பௌசிக்கு தேசிய ஒருமைப்பாடு மற்றும் அரச கரும மொழிகள் அமைச்சர் பதவியினை வழங்குவதற்கு பிரதமர் ரணில் விக்ரமசிங்க பரிந்துரைத்திருந்ததாக அறிய முடிகிறது.

இதேவேளை, ஸ்ரீலங்கா சுதந்திரக் கட்சியிலிருந்து ஆளுந்தரப்புக்கு சென்றவர்களுக்கு அமைச்சுப் பதவி வழங்கப்பட மாட்டாது என்று ஜனாதிபதி கூறியதாக, ஐக்கிய தேசியக் கட்சியைச் சேர்ந்த சுகாதார அமைச்சர் ராஜித சேனாரத்தனவும் நேற்றைய தினம் அமைச்சரவை நியமனத்தின் பின்னர் ஊடகங்களிடம் கூறியிருந்தார்.

படத்தின் காப்புரிமை facebook Image caption ஏ.எச்.எம். பௌசி

இதேபோன்று இலங்கையின் முன்னாள் ராணுவத் தளபதியும், ஐக்கிய தேசியக் கட்சியின் தற்போதைய நாடாளுமன்ற உறுப்பினருமான சரத் பொன்சேகாவுக்கும் அமைச்சுப் பதவி வழங்குவதற்கு பிரதமர் ரணில் விக்ரமசிங்க பரிந்துரை செய்திருந்த போதிலும், அதையும் ஜனாதிபதி மைத்திரி நிராகரித்து விட்டதாகவும கூறப்படுகிறது.

அண்மையில் ஏற்பட்டிருந்த அரசியல் நெருக்கடியின்போது, ஜனாதிபதி மைத்திரிபால சிறிசேனவை சரத் பொன்சேகா மிகவும் மோசமாகவும் கடுஞ் சொற்களாலும் விமர்சித்து வந்தார்.