இத்தாலி செயற்கைக்கோளுடன் விண்ணில் சீறி பாய்ந்தது பி.எஸ்.எல்.வி., ராக்கெட் * "இஸ்ரோ'வின் வர்த்த ரீதியான முதல் செயல்பாட்டுக்கு வெற்றி

[கறுப்பி]

இத்தாலி செயற்கைக்கோளுடன் விண்ணில் சீறி பாய்ந்தது பி.எஸ்.எல்.வி., ராக்கெட் * "இஸ்ரோ'வின் வர்த்த ரீதியான முதல் செயல்பாட்டுக்கு வெற்றி

சென்னை: சென்னை அடுத்த ஸ்ரீஹரிகோட்டா ராக்கெட் ஏவுதளத்தில் இருந்து பி.எஸ்.எல்.வி., சி8 ராக்கெட் வெற்றிகரமாக விண்ணில் ஏவப்பட்டது.

இத்தாலி நாட்டின் "ஏஜைல்' செயற்கைக் கோளை, நமது ராக்கெட் மூலம் வர்த்தக ரீதியாக விண்ணில் செலுத்தும் இஸ்ரோவின் முதல் முயற்சியே மாபெரும் வெற்றி பெற்றுள்ளது. இதன் மூலம் வருங்காலத்தில் வர்த்தக ரீதியாக இஸ்ரோவிற்கு அதிக வாய்ப்புகள் கிடைக்கும் என்று அதன் தலைவர் மாதவன் நாயர் பெருமையுடன் கூறினார். விண்வெளி ஆய்வில் இஸ்ரோ ( இந்திய விண்வெளி ஆய்வுக் கழகம்) தொடர்ந்து பலசாதனைகளை நிகழ்த்தி வருகிறது. ஏற்கனவே பல வகையான ராக்கெட்களில் பல விதமான செயற்கைக் கோள்களை வெற்றிகரமாக விண்ணுக்கு அனுப்பி, விண்வெளி ஆய்வில் மாபெரும் முத்திரையை இந்தியா பதித்துள்ளது. இது விண்வெளி ஆய்வில் முன்னணி இடத்தைப் பிடித்துள்ள நாடுகளுக்கு சவால் விடும் வகையில் அமைந்துள்ளது. இருந்தாலும், முழுக்க முழுக்க வர்த்தக ரீதியிலான ராக்கெட்டை விண்ணுக்கு ஏவும் சாதனையை இஸ்ரோ இதுவரை எட்டாமல் இருந்தது. பிற நாடுகளின் செயற்கைக் கோள்களை நம்நாட்டு ராக்கெட் மூலம் விண்ணில் ஏவப்படாத நிலை இருந்து வந்தது. பிற நாடுகளின் செயற்கைக் கோள்களை இஸ்ரோ ஏற்கனவே விண்ணுக்கு அனுப்பியிருந்தாலும், அதில் நம் நாட்டு செயற்கைக் கோள்களும் சேர்த்து அனுப்பப்பட்டிருந்தன. தனியாக அனுப்பப்படவில்லை. அந்த சாதனையை இஸ்ரோ அருமையாக நிகழ்த்திக் காட்டியது.

பி.எஸ்.எல்.வி., சி8 ராக்கெட் மூலம், இத்தாலி நாட்டின் "ஏஜைல்' செயற்கைக் கோளை வர்த்தக ரீதியில் விண்ணுக்கு அனுப்ப ஏற்பாடுகள் செய்யப்பட்டன. இந்த செயற்கைக்கோள் 352 கிலோ எடை கொண்டது. திட்டமிட்டபடி சென்னை அடுத்த ஸ்ரீஹரிகோட்டாவில் உள்ள சதீஷ் தவான் விண்வெளி மையத்தின் 2வது ராக்கெட் ஏவுதளத்தில் இருந்து நேற்று ( 23 ம் தேதி ) பிற்பகல் 3.30 மணிக்கு பி.எஸ்.எல்.வி.,சி8 ராக்கெட் வெற்றிகரமாக விண்ணில் ஏவப்பட்டது. ராக்கெட்டின் நான்கு அடுக்குகளும் திட்டமிட்டபடி அதற்குண்டான நேரத்தில் ஒவ்வொன்றாக பிரிந்தன. ராக்கெட் புறப்பட்ட 22வது நிமிடத்தில் "ஏஜைல்' செயற்கைக்கோள் தனியாக பிரிந்து பூமியின் சுற்று வட்டப்பாதையில் 550 கிலோ மீட்டர் தொலைவில் நிலை நிறுத்தப்பட்டது.

அதைத் தொடர்ந்து வர்த்தக ரீதியிலான ராக்கெட் ஏவும் நிகழ்ச்சி 100 சதவீதம் வெற்றி பெற்றதாக, கட்டுப்பாட்டு அறையில் இருந்தபடி இஸ்ரோ தலைவர் மாதவன் நாயர் மகிழ்ச்சி பொங்க தெரிவித்தார். அவர் மேலும் கூறியதாவது: வர்த்தக ரீதியான செயல் திட்டத்தின் முதல் முயற்சியிலேயே நாம் வெற்றி பெற்றிருப்பது மிகவும் மகிழ்ச்சி அளிக்கிறது. இஸ்ரோ வரலாற்றில் இது மகத்தான சாதனையாக அமைந்துள்ளது. பி.எஸ்.எல்.வி., சி8 ராக்கெட்டை 100 சதவீதம் வெற்றிகரமாக அனுப்பியுள்ளோம். இதற்கான பெருமை அனைத்து விஞ்ஞானிகளையும் சேரும். வர்த்தக ரீதியில் தற்போது பெற்றுள்ள முதல் வெற்றியின் மூலம், வருங்காலத்தில் இஸ்ரோவிற்கு அதிகமான வாய்ப்புகள் கிடைக்கும். வர்த்தக ரீதியில் இஸ்ரோவை தேர்ந்தெடுத்த இத்தாலி நாட்டு விண்வெளி ஆய்வு மையத்திற்கு எனது நன்றியையும், பாராட்டுதலையும் தெரிவிக்கிறேன். இவ்வாறு அவர் கூறினார்.

கஸ்துõரி ரங்கனுக்குப் பிறகு இஸ்ரோ தலைவராக 2003ம் ஆண்டு மாதவன் நாயர் பதவி ஏற்றார். அதன் பிறகு 6 ராக்கெட்கள் வெற்றிகரமாக விண்ணில் ஏவப்பட்டுள்ளன. அடுத்த ஆண்டு "சந்திராயன்' : சந்திரனுக்கு செயற்கைக்கோள் அனுப்பும் திட்டம் இஸ்ரோவின் கனவாக இருக்கிறது. பி.எஸ்.எல்.வி., ராக்கெட் மூலம் "சந்திராயன்1' என்ற செயற்கைக்கோள் அடுத்த ஆண்டு விண்ணில் ஏவப்படும் என்று விஞ்ஞானிகள் தெரிவித்தனர். இதற்கான ஏற்பாடுகள் தீவிரமாக நடந்து வருகின்றன. தேசிய கொடியை அசைத்து ஆரவாரம்! : பி.எஸ்.எல்.வி., ராக்கெட் வெற்றிகரமாக விண்ணில் செலுத்தப்பட்டதும், அங்கு கூடியிருந்த மக்கள் தேசியக் கொடியை அசைத்து ஆரவாரம் செய்தனர். நேற்று வானம் மிகத் தெளிவாக இருந்ததால் ராக்கெட் பயணிப்பதை நீண்ட நேரம் பார்க்க முடிந்தது. ராக்கெட் சரியான இலக்கை அடைந்ததும், ராக்கெட் ஏவுதளத்தில் இருந்த விஞ்ஞானிகள் ஒருவரை ஓருவர் கட்டிப்பிடித்தும், கை குலுக்கியும் தங்களது மகிழ்ச்சியை பகிர்ந்து கொண்டனர். இதில் இத்தாலி பிரதிநிதிகளும் கலந்துகொண்டனர்.

தினமலர்