ஆட்சியை கவிழ்க்கும் நோக்கில் ஐ.தே.க. அமைக்கும் பொதுக்கூட்டணிக்கு இ.தொ.கா., மு.கா. ஆதரவு

ஆட்சியை கவிழ்க்கும் நோக்கில் ஐ.தே.க. அமைக்கும் பொதுக்கூட்டணிக்கு இ.தொ.கா., மு.கா. ஆதரவு வீரகேசரி நாளேடு

பதவியில் உள்ள அரசாங்கத்தை கவிழ்த்து புதிய ஆட்சியை மலரச் செய்யும்வகையில் பொதுக்கூட்டணி அமைக்கும் ஐ.தே.க.வின் முயற்சிக்கு இலங்கை தொழிலாளர் காங்கிரஸும் ஸ்ரீலங்கா முஸ்லிம் காங்கிரஸும் முழுமையான ஆதரவினை வழங்கும் என்று நம்புகின்றோம். அதற்கான ஏற்பாடுகள் தற்போது மேற்கொள்ளப்பட்டுவருகின்றன என்று ஐ.தே.க. வின் பொதுச் செயலாளர் திஸ்ஸ அத்தநாயக்க தெரிவித்தார்.

அரசாங்கத்தில் உள்ள முக்கிய அமைச்சர்கள் பலர் விரைவில் ஐக்கிய தேசியக் கட்சியுடன் இணைந்துகொள்ளவுள்ளனர். இதற்கான பேச்சுவார்த்தைகள் தற்போது மேற்கொள்ளப்பட்டுவருகின்றன. அரசாங்கத்தில் நம்பிக்கையிழந்து விரக்தியில் இருக்கும் அமைச்சர்களே இவ்வாறு எம்முடன் இணையவுள்ளனர் என்றும் அவர் கூறினார்.

ஐக்கிய தேசிய கட்சி உருவாக்கிவரும் பொதுக்கூட்டணியின் செயற்பாடுகள் குறித்து கருத்து தெரிவிக்கையிலேயே அவர் மேற்கண்டவாறு கூறினார்.

இவ்விடயம் குறித்து அவர் மேலும் கூறியதாவது :

ஐக்கிய தேசிய கட்சியிலிருந்து மேலும் சில எம்.பி.க்கள் அரசாங்கத்துடன் இணைந்துகொள்ளவுள்ளனர் என்று கூறப்படுவதில் எந்தவிதமான உண்மையுமில்லை. எந்த நிலையிலும் இனிவரும் காலங்களில் எமது கட்சியிலிருந்து எவரும் அரசாங்கத்துடன் இணைந்துகொள்ளமாட்டார்கள். பதவி ஆசை உள்ளவர்கள் ஏற்கனவே அரசாங்கத்துடன் இணைந்துகொண்டுவிட்டனர்.

இந்நிலையில் இந்த அரசாங்கத்தை வீட்டுக்கு அனுப்பவேண்டும் என்று மக்கள் கூற ஆரம்பித்துவிட்டனர். ஐக்கிய தேசிய கட்சியே நாட்டை நிருவகிக்கவேண்டும் என்று மக்கள் கருதுகின்றனர். எனவே நாட்டுக்கும் மக்களுக்கும் தலைமைத்துவத்தை வழங்குவதற்கு எமது கட்சி தயாராகிவிட்டது.

அதன்படி அரசாங்கத்தை வீட்டுக்கு அனுப்புவதற்காக நாங்கள் பரந்துபட்ட வகையில் பொதுக் கூட்டணியொன்றை அமைத்து வருகின்றோம். அது தொடர்பாக பல கட்சிகள் மற்றும் சிவில் அமைப்புக்களுடனும் பேச்சுவார்த்தை நடத்திவருகின்றோம். ஸ்ரீலங்கா சுதந்திரக் கட்சியின் மக்கள் பிரிவுடன் எதிர்வரும் 19 ஆம் திகதி எமது கட்சி புரிந்துணர்வு உடன்படிக்கையொன்றை செய்துகொள்ளவுள்ளது. நாட்டை துரித கதியில் அபிவிருத்தி செய்வதற்கும் மக்களுக்கு சிறந்த ஆட்சியை வழங்குவதற்காகவும் இரண்டு கட்சிகளும் ஒன்றிணைந்து செயற்படவுள்ளன.

அந்த வகையில் இலங்கை தொழிலாளர் காங்கிரஸ் மற்றும் ஸ்ரீலங்கா முஸ்லிம் காங்கிரஸ் ஆகிய கட்சிகளுடன் விரைவில் பேச்சுவார்த்தை நடத்த எதிர்பார்க்கின்றோம். அந்தக் கட்சிகள் எமது முயற்சிக்கு முழுமையான ஆதரவினை வழங்கும் என்று எதிர்பார்க்கின்றோம். இலங்கை தொழிலாளர் காங்கிரஸ் அரசாங்கத்தில் இருந்தாலும் எமது கட்சியுடன் பாரிய புரிந்துணர்வுடன் உள்ளது. அத்துடன் தற்போதைய நிலைமையில் முஸ்லிம் மக்கள் பல்வேறு சிக்கல்களுக்கு முகம் கொடுத்து வருகின்றனர். இந்நிலைமையில் ஐக்கிய தேசிய கட்சி ஆட்சியமைக்க முயற்சித்தால் முஸ்லிம் காங்கிரஸ் நிச்சயம் ஆதரவு வழங்கும்.