போர் விமானங்களை புதுப்பிப்பதாயின் பாதுகாப்பு அமைச்சு உத்தியோகபூர்வமாக அறிவிக்கும் - பந்துல

Published By: VISHNU

18 APR, 2023 | 04:55 PM

 

(எம்.மனோசித்ரா)

போர் விமானங்களை புதுப்பிப்பது தொடர்பில் இஸ்ரேலுடன் ஒப்பந்தம் கையெழுத்திடப்படவிருந்தால் அது குறித்து பாதுகாப்பு அமைச்சு உத்தியோகபூர்வமாக அறிவிக்கும்.

இவ்வாறான விடயங்கள் குறித்து அமைச்சரவைக்கு அறிவிக்கப்பட முன்னர், தேசிய பாதுகாப்பு சபையிலேயே தீர்மானங்கள் எடுக்கப்படும் என அமைச்சரவை பேச்சாளர் பந்துல குணவர்தன தெரிவித்தார்.

அத்தோடு நாடு மற்றும் மக்களின் பாதுகாப்புக்கு முன்னுரிமையளிக்க வேண்டியது எந்தவொரு அரசாங்கத்தினதும் கடமை என்ற ரீதியில், இலங்கை அரசாங்கமும் அதன் அடிப்படையிலேயே செயற்படும் என்றும் அவர் குறிப்பிட்டார்.

இலங்கை விமானப்படை வசமுள்ள கப்பீர் என்ற போர் விமானங்களை புதுப்பிப்பதற்காக இஸ்ரேனுடன் 55 மில்லியன் டொலர் ஒப்பந்தம் கையெழுத்திடப்படவுள்ளதாகவும், இது குறித்து அரசாங்கம் உண்மையை வெளிப்படுத்த வேண்டும் என்றும் ஐக்கிய மக்கள் சக்தி தெரிவித்திருந்தது. 

இந்நிலையில் இது குறித்து இன்று (18) செவ்வாய்கிழமை இடம்பெற்ற அமைச்சரவை தீர்மானங்களை அறிவிக்கும் ஊடகவியலாளர் மாநாட்டில் கேள்வி எழுப்பப்பட்டது.

இதற்கு பதிலளிக்கும் போது மேற்கண்டவாறு தெரிவித்த அமைச்சரவை பேச்சாளர் மேலும் குறிப்பிடுகையில் ,

பாதுகாப்பு அமைச்சின் செயற்பாடுகள் அமைச்சரவை அனுமதியுடனேயே முன்னெடுக்கப்படும். எந்தவொரு அரசாங்கத்தினதும் பிரதான பொறுப்பு மக்களின் வாழ்க்கை மற்றும் சொத்துக்களை பாதுகாப்பதாகும். 

இவை தொடர்பான தீர்மானங்கள் அமைச்சரவைக்கு தெரிவிக்கப்பட முன்னர் தேசிய பாதுகாப்பு சபையிலேயே எடுக்கப்படும். எனவே கப்பீர் போர் விமானங்களை புதுப்பிப்பது தொடர்பில் பாதுகாப்பு அமைச்சினால் விரிவான தெளிவுபடுத்தல் வழங்கப்படும் என்றார்.

எவ்வாறிருப்பினும் இது குறித்து இவ்வாரம் இடம்பெற்ற அமைச்சரவைக் கூட்டத்தில் சமர்ப்பிக்கப்பட்டுள்ள அமைச்சரவை பத்திரத்தில் இஸ்ரேலுடனான விமான போக்குவரத்தை புதுப்பித்தல் தொடர்பாகவே குறிப்பிடப்பட்டுள்ளது.

அந்த வகையில் இலங்கைக்கும் இஸ்ரேலுக்கும் இடையிலான விமான போக்குவரத்து ஒப்பந்தத்தில் கடந்த 2003.08.24 அன்று கையொப்பமிடப்பட்டுள்ளது. 

குறித்த ஒப்பந்தத்தை திருத்தம் செய்வதற்காக 2016.12.6 அன்று பஹாமாஸ் நாட்டில் நாசாயூகில் இடம்பெற்ற சிவில் விமான சேவைகள் மாநாட்டில் இரு தரப்பினருக்கிடையியே இணக்கப்பாடு எட்டப்பட்டுள்ளது.

அதற்கமைவான விதிமுறை ஒப்பந்தத்தில் கையொப்பமிடுவதற்காக 2021.01.11 அன்று இடம்பெற்ற அமைச்சரவைக் கூட்டத்தில் இதற்கு முன்னர் அங்கீகாரம் வழங்கப்பட்டுள்ள போதிலும், இதுவரையில் அதில் கையொப்படமிடப்படவில்லை. குறித்த விதிமுறை ஒப்பந்த வரைபுக்கு சட்டமா அதிபரின் ஒப்புதல் மற்றும் வெளிவிவகார அமைச்சின் உடன்பாடு கிடைத்துள்ளது.

அதற்கமைய இலங்கைக்கும் இஸ்ரேலுக்கும் இடையில் தற்போது கையொப்பமிடப்பட்டுள்ள விமான போக்குவரத்து ஒப்பந்தத்தை திருத்தம் செய்வதற்கான விதிமுறை ஒப்பந்தத்தில் கையொப்பமிடுவதற்கும், இலங்கை அரசு சார்பாக குறித்த விதிமுறை ஒப்பந்தத்தில் கையொப்பமிடுவதற்காக இஸ்ரேலுக்கான இலங்கைத் தூதுவருக்கு அதிகாரம் வழங்குவதற்கும் அமைச்சரவை அங்கீகாரம் வழங்கியுள்ளதாக அமைச்சரவை தீர்மானத்தில் தெரிவிக்கப்பட்டுள்ளமை குறிப்பிடத்தக்கது.

https://www.virakesari.lk/article/153135