பிரபாகரனுக்கு பிறந்தநாள் கொண்டாடிய விஜயகாந்த்

பிரபாகரனுக்கு பிறந்தநாள் கொண்டாடிய விஜயகாந்த்

[24 - December - 2007]

* கைது செய்ய காத்திருந்த பொலிஸார்

தே.மு.தி.க. தலைவரும் நடிகரும் ஈழத்தமிழர் விடுதலைப் போராட்ட ஆதரவாளருமான விஜயகாந்த் பிரபாகரனுக்கு பிறந்தநாள் கொண்டாடியதால் பிறந்தநாள் விழா இடம்பெற்ற இடத்தை உளவுப் பிரிவுப் பொலிஸார் சுற்றி வளைத்து அவரை கைது செய்ய காத்திருந்த சம்பவமொன்று கடந்த வாரம் இடம்பெற்றுள்ளது.

இது தொடர்பாக மேலும் தெரிய வருவதாவது;

தே.மு.தி.க. தலைவர் விஜயகாந்த் எடுக்கும் பல்வேறு அதிரடி நடவடிக்கைகளுக்கு ஆலோசனைகள் அள்ளித் தருவது அவரது மனைவி பிரேமலதா பொதுக்கூட்டங்கள் மற்றும் பல்வேறு விழாக்களிலும் விஜயகாந்தே இதை வெளிப்படையாகக் கூறி வருகிறார். தனியார் பள்ளியில் பிளஸ் 2 படிக்கும் விஜயகாந்தின் மூத்த மகன் பிரபாகரனும் அவ்வப்போது தந்தைக்கு ஆலோசனைகள் வழங்குவதில் ஆர்வம் காட்டி வருகிறார்.

கடந்த செப்டெம்பர் மாதம் புதுக்கோட்டையில் நடந்த கட்சியின் மூன்றாம் ஆண்டு தொடக்க விழா மாநாட்டிற்கு, பாராளுமன்ற வடிவில் மேடை அமைக்க ஆலோசனை வழங்கியவர் இந்த பிரபாகரன் தான். இது மட்டுமன்றி, விழா அழைப்பிதழில் அச்சடிக்க ஒவ்வொரு தேர்தலிலும் தே.மு.தி.க. பெற்ற வாக்கு சதவீத, வரைபடத்தை கணினி மூலம் அவர் உருவாக்கித் தந்தாராம். இந்த வரைபடத்தில் தே.மு.தி.க. சட்டசபை நோக்கி வேகமாக முன்னேறுவதாக உருவகம் செய்யப்பட்டிருந்தது. இவ்வாறு பல்வேறு ஆலோசனைகள் வழங்கி வரும் பிரபாகரன், தந்தைக்கு ஓய்வு நேரங்களில் லப் - டொப் கணினி பயிற்சியும் அளித்து வருகிறார்.

மகன் மூலம் விஜயகாந்த், பல்வேறு நாடுகளின் இணையத்தளங்களில் நுழைந்து அந்நாட்டு ஜனாதிபதிகளின் நடவடிக்கைகளையும், சாதனைகளையும் உற்று நோக்கி வருகிறார். இவற்றை குறிப்பெடுத்து தான் பிரேசில், ஜப்பான், சீனா, சிங்கப்பூர், ஹொங்கொங் மற்றும் தாய்லாந்து நாடுகளின் வளர்ச்சி குறித்து பொதுக் கூட்டங்களில் விஜயகாந்த் உலக அரசியல் பேசி வருகிறார்.

தந்தைக்கு ஆலோசனைகள் வழங்கும் தனயனின் பிறந்த நாள், கடந்த வாரம் வந்தது. மகனை கௌரவிக்கும் விதமாக, சென்னை அரும்பாக்கம் நூறடிச்சாலையில் உள்ள உறவினர்களுக்கு சொந்தமான கழகமொன்றில் இவ்விழாவை படுரகசியமாகக் கொண்டாடினார் விஜயகாந்த்.

இந்த கொண்டாட்டத்தில் விஜயகாந்தின் உறவினர்களைத் தவிர கட்சியின் ஓரிரு மாநில நிர்வாகிகள் மட்டுமே பங்கேற்றுள்ளனர். விழாவில் மகிழ்ச்சியின் உச்சத்தில் இருந்த விஜயகாந்த், மகனை ஆரத்தழுவி முத்தமிட்டு வாழ்த்தினார். `நீ ஐ.ஏ.எஸ். அதிகாரியாக, நம்மை இந்த அளவிற்கு உயர்த்திய தமிழக மக்களுக்காக உழைக்க வேண்டும்' என்ற உருக்கமான கோரிக்கையையும் மகனிடம் முன் வைத்தார் விஜயகாந்த்.

அப்போது அங்கிருந்த பிரேமலதாவும், `மகன் தந்தைக்கு ஆற்றும் உதவி' என்ற திருக்குறளைக் கூறி, விழாவில் கலகலப்பை ஏற்படுத்தினார்.

இவ்விழா, விடுதலைப்புலி தலைவர் பிரபாகரனுக்காக நடத்தப்படுவதாக பரவிய தகவலால் பதற்றமடைந்த உளவுப்பிரிவு பொலிஸாரும் அவ்விடத்தை சுற்றி முகாமிட்டனர். கடைசியில் அது விஜயகாந்த் மகன் பிரபாகரன் பிறந்த நாள் விழா என்று உறுதிப்படுத்திய பிறகே அவர்கள் அங்கிருந்து சென்றுள்ளனர்.

http://www.thinakkural.com/news/2007/12/24...s_page42917.htm