தமிழ் மொழி இலக்கியங்களை உலக மொழிகளில் மொழிபெயர்க்க உரிய சூழ்நிலை ஏற்பட வேண்டும் - தமிழ்ப் பேராசிரியர் கார்த்திகேசு சிவத்தம்பி

[ஔவையார்]

தமிழ் மொழி இலக்கியங்களை உலக மொழிகளில் மொழிபெயர்க்க உரிய சூழ்நிலை ஏற்பட வேண்டும் என்று இலங்கைத் தமிழ்ப் பேராசிரியர் கார்த்திகேசு சிவத்தம்பி வலியுறுத்தினார்.

உலகச் செம்மொழிகள் குறித்த பன்னாட்டுக் கருத்தரங்கு சென்னையில் வியாழக்கிழமை தொடங்கியது. மூன்று நாள்கள் நடைபெறும் இக்கருத்தரங்கின் மையப் பொருளை விளக்கி சிவத்தம்பி பேசியதாவது: தமிழ் பேசுவோர் காலம் காலமாக தங்களது கருத்துகள், சிந்தனைகள், அனுபவங்களைத் தமிழில் பதிவு செய்வதால் இம்மொழி செம்மொழி என்ற சிறப்பைப் பெறுகிறது. மொழி பேசுவோரின் வரலாறு, மக்களின் வாழ்க்கைத் திறன் ஆகியவை அந்த மொழியில் பதிவு செய்யப்படும்போது, மொழியின் சிறப்புத் தன்மை வெளிப்படுகிறது.

ஐரோப்பாவில் 1400 ஆண்டுகளுக்கு முன் கிரேக்கம், லத்தீன் ஆகியவைதான் சிறப்பு பெற்றன. ஐரோப்பிய நாகரிகத்துக்கு ஊற்றுக்கண்ணாக இருப்பது கிரேக்க, லத்தீன் மொழி சார்ந்த நாகரிகம் தான். லத்தீன் ஐரோப்பாவில் அரசவை மொழியாகவும் கல்வி மொழியாகவும் இருந்தது. ரோமாபுரி ராஜ்ஜியத்தினர் ஆட்சி மூலம் லத்தீன் மொழியின் செம்மை காணப்படுகிறது. கிரேக்க லத்தீன் மொழிகள் தொன்மையும் சிறப்பும் கொண்டவை. அதே சமயம் அந்நாட்டு மனிதன் இயற்கையை ஆண்டான். இந்தியாவில் அக்காலத்தினர் இயற்கையால் ஆளப்பட்டு வந்தனர். அந்த மொழிகள் மனித மேம்பாடு, மானுட வளர்ச்சிக்கான வளங்களைக் கொண்டதாக இருந்தன. தமிழை திராவிட தேசப் பகுதிக்குரிய மொழியாகக் கருத இயலாது. இந்தியாவின் பண்டைய பண்பாடு, நாகரிகம் சார்ந்ததாகவே தமிழைக் கருத வேண்டும் என்றார் சிவத்தம்பி.

கருத்தரங்கைத் தொடங்கி வைத்த நிதியமைச்சர் க.அன்பழகன்: தமிழ் மொழி உலக அளவில் செம்மொழியாக ஏற்கப்பட வேண்டியதற்கு காரணங்கள் உண்டு. தொன்மை, இன்னும் பேசப்படுவது, தொடர்ச்சியாக வாழ்வது, இலக்கிய வளம் ஆகியவை மட்டும் அல்ல. தமிழின் இலக்கியங்கள் கூறும் கருத்துகள் உலகளாவிய வகையில் இருக்கின்றன. அதுவும் மிக முக்கியமான காரணம் ஆகும். உயர்ந்த கருத்துகள் கொண்ட மொழிதான் உலக செம்மொழியாகக் கருதப்பட வேண்டும் என்பதும் ஓரு நியதி. அதன்படி தமிழ் செம்மொழிக்கான சிறப்பு பெறுகிறது என்றார்.

மனோன்மணியம் சுந்தரனார் பல்கலைக்கழக முன்னாள் துணைவேந்தர் க.ப. ஆறவாணன்: கிரேக்கம், லத்தீன், அரேபியம், சம்ஸ்கிருதம், சீனம் ஆகிய மொழிகள் செம்மொழிகளாக அறிவிக்கப்பட அம்மொழிகளைப் பேசுவோரின் செல்வாக்குதான் முக்கிய காரணமாக இருந்தது. தமிழைச் செம்மொழியாக அறிவிக்கப்பட்டதைக் கண்டு மகிழ்ச்சி அடைந்துவிடுவதுடன் நிற்காமல் தமிழ் பேசும் மக்களாகிய தமிழர்கள் உயர்வு பெற்றாக வேண்டும். அதற்குப் பாடுபட்டாக வேண்டும். தொடக்க காலத்தில் தமிழ் அடிமை மொழியாக இருந்தது. பிறகு கூலி மொழியாக ஐரோப்பியர்களால் 15-ம் நூற்றாண்டில் அழைக்கப்பட்டது. தற்போது அகதி மொழியாகக் கருதப்பட்டு வருகிறது என்றார்.

மூலம்: தினமணி

தமிழுக்கும் அமுதென்று பேர்! - அந்தத்

தமிழ் இன்பத் தமிழ்எங்கள் உயிருக்கு நேர்!

தமிழுக்கு நிலவென்று பேர்! - இன்பத்

தமிழ் எங்கள் சமுகத்தின் விளைவுக்கு நீர்!

தமிழுக்கு மணமென்று பேர்! - இன்பத்

தமிழ் எங்கள் வாழ்வுக்கு நிருமித்த ஊர்!

தமிழுக்கு மதுவென்று பேர்! - இன்பத்

தமிழ் எங்கள் உரிமைச்செம் பயிருக்கு வேர்!

தமிழ் எங்கள் இளமைக்குப் பால்! - இன்பத்

தமிழ் நல்ல புகழ்மிக்க புலவர்க்கு வேல்!

தமிழ் எங்கள் உயர்வுக்கு வான்! - இன்பத்

தமிழ் எங்கள் அசதிக்குச் சுடர்தந்த தேன்!

தமிழ் எங்கள் அறிவுக்குத் தோள்! - இன்பத்

தமிழ் எங்கள் கவிதைக்கு வயிரத்தின் வாள்!

தமிழ் எங்கள் பிறவிக்குத் தாய்! - இன்பத்

தமிழ் எங்கள் வளமிக்க உளமுற்ற தீ!

பாவேந்தர் பாரதிதாசன்

[karu]

பி;றநாட்டு நல்லறிஞர் சாத்திரங்கள் தமிழ் மொழியில் பெயர்த்தல் வேண்டும். இறவாத புகழுடைய புது நூல்கள் தமிழ் மொழpயில் இயற்றல் வேண்டும். அது தான் தமிழினத்துக்குக் கூடிய நன்மை பயக்கும்.