மன்னார் மறைமாவட்ட ஆயர் இராயப்பு ஜோசப், வன்னி கட்டளைத் தளபதியுடன் சந்திப்பு

மன்னார் மறைமாவட்ட ஆயர் இராயப்பு ஜோசப், வன்னி பாதுகாப்புப் படையினரின் கட்டளைத் தளபதி மேஜர் ஜெனரல் ஜகத் ஜயசூரியவைச் சந்தித்து பேச்சுவார்த்தை நடாத்தியுள்ளார்.

மன்னார் மாவட்ட அபிவிருத்தி, மத விவகாரங்களை மேம்படுத்தல், மன்னாரின் இயல்பு வாழ்க்கையை உறுதிப்படுத்தல் உள்ளிட்ட பல்வேறு விடயங்கள் இச்சந்திப்பின்போது ஆராயப்பட்டதாக தெரியவருகிறது.

மன்னார் பிராந்தியத்தின் அபிவிருத்திப் பணிகளை வேகப்படுத்துவது குறித்த அரசாங்கத்தின் திட்டங்களை வன்னிப்பிராந்திய கட்டளைத் தளபதி மன்னார் ஆயரிடம் விளக்கிக் கூறியதாகவும் தகவல்கள் தெரிவிக்கின்றன.

அத்துடன், பாதுகாப்புப் படையினரதும், பொலிசாரினதும் ஒத்துழைப்புடன் இந்தப் பணிகளை முன்னெடுத்துச் செல்வது குறித்தும் இங்கு ஆராயப்பட்டுள்ளது.

மன்னார் மாவட்டத்தின் இயல்பு வாழ்க்கையை உறுதிப்படுத்தும்பொருட்டு, சிவில் நிர்வாக சேவை முகவர் நிலையங்களை உடனடியாக ஸ்தாபித்தல், பொலிஸ் நிலையங்களை நிறுவுதல் என்பவற்றின் அவசியம் குறித்து மேஜர் ஜெனரல் ஜகத் ஜயசூரிய இங்கு வலியுறுத்தியதாகவும் தெரிவிக்கப்படுகிறது.

மன்னார் மாவட்டத்திலுள்ள தேவாலயங்கள், இந்துக் கோயில்கள் மற்றும் பள்ளிவாயல்கள் என்பவற்றைப் புனரமைப்பது குறித்தும் இச்சந்திப்பின் போது ஆராயப்பட்டுள்ளது.

மன்னார் குருமுதல்வர் வன்னி விஜயம்

இதற்கிடையில், இடம்பெயர்ந்துள்ள மக்களின் நலன்கள் குறித்து ஆராயும்பொருட்டு, மன்னார் மறைமாவட்ட குருமுதல்வர் விக்டர் சோசை வன்னிக்கு அவசர பயணம் ஒன்றை மேற்கொண்டுள்ளதாக மன்னார் மறை மாவட்ட ஆயர் இல்ல தகவல்கள் தெரிவிக்கின்றன.

வன்னியில் இடம்பெயர்ந்துள்ள மக்களுக்கான நிவாரண உதவிகளை வழங்கும் பணிகளில் மன்னார் மறைமாவட்ட ஆயர் இல்லம் கூடுதல் கவனம் செலுத்திவருகின்றமை குறிப்பிடத்தக்கது.

http://www.tamilskynews.com/index.php?opti...s&Itemid=50