தாம் தூம் - திரை விமர்சனம்

மறைந்த ஒளிப்பதிவாளர் ஜீவா, வரைந்த ஒவியம்தான் இந்த தாம் தூம். புள்ளியை சரியாக வைத்தவர், கோலத்தை வரையும் முன்பே அமரர் ஆகிவிட்டதால், கதையில் அங்கங்கே தடுமாற்றங்கள். ஆனாலும், தஞ்சாவூர் ஓவியத்தின் மேல் சென்ட் தெளித்த மாதிரி அங்கங்கே மணம். பிரமிப்பு.

இளம் டாக்டரான ஜெயம் ரவி, கான்பிரன்சுக்காக ரஷ்யா செல்கிறார். அங்கே அவர் சந்திக்கும் அழகியும், அவரால் வந்த பிரச்சனையும் ரவியை ஜெயில் வரைக்கும் கொண்டு போக, காப்பாற்ற வருகிறார் வக்கீல் லட்சுமிராய். ஆனாலும், சட்டபூர்வமாக இல்லாமல் தன் இஷ்ட பூர்வமாக தப்பிக்க நினைக்கும் ரவி படுகிற துன்பங்களும் துயரங்களும் நம்மையும் தொற்றிக் கொள்ள, விறுவிறுப்பான இறுதிக்காட்சிக்கு ஏங்குகிறது மனசு. நல்லவேளையாக சுப நிறைவு!

எப்படியாவது இந்தியாவுக்கு போய்விட வேண்டும் என்று ஜெயிலில் கிடந்து தவிக்கிற ரவி, அந்த நேரத்திலா இன்ப கனவுக்கு போவார்? லாஜிக் சறுக்கல். ஆனாலும், கங்கணா ரனவத்-ரவி காதலில் வழிந்தோடுகிறது வர்ணஜாலம். பஸ்சில் பயணம் செய்யும் ரவி, வில்லன்கள் துரத்த ஓடிவரும் கங்கணாவை காப்பாற்ற பஸ்சை நிறுத்துவதும், பிறகு அது ஒட்டப்பந்தய விளையாட்டு என்று புரிந்தபின் வழிவதும் அழுகு. சம்பந்தியாகப் போகும் சண்டியர்கள், நடுரோட்டில் எதிர்பாராமல் பேசி முடிக்கும் சம்பந்தம் இன்ப அதிர்ச்சி.

http://kisukisucinema.net/index.php?mod=ar...amp;article=311

திருஷ்டி சுற்றி போடலாம் ஜெயம் ரவிக்கு. எம்.ஜி.ஆருக்கு பிறகு அழகன்களை தேட வேண்டிய தமிழ்சினிமாவில் ரவியின் அழகு பெண்களை பித்து பிடிக்கவே வைக்கும். அதிலும் கோட், சூட்டில் அவர் ரஷ்யாவில் நடக்கும்போது, காஸ்ட்லி கோட்டில் தங்க பட்டன் வைத்தது போல ஜொலிக்கிறார். சண்டைக்காட்சிகளில் அவர் காட்டியிருக்கும் வேகம், அசத்தல்!

பத்து கிலோ எலும்பு, இரண்டு கிலோ சதை, போனால் போகிறதென்று கொஞ்சம் அழகான முகம். இதுதான் கங்கணா. போங்கண்ணா....

அரேபிய குதிரைக்கு சுடிதார் போட்டது போல, அதிரி புதிரியான அழகு லட்சுமிராய்க்கு. அந்த கண்களில் காதல், அதிர்ச்சி, பயம் எல்லாவற்றையும் கொண்டு வந்து ரசவாதம் செய்திருக்கிறார். ஐயோ பாவம்... நல்ல படம் அமைந்தால், இன்னும் பத்து வருடத்திற்கு இவர்தான் தமிழகத்தின் கனவுக்கன்னி.

எல்லாம் இருந்தும், கதை தள்ளுபடியில் வாங்கிய காடா துணி மாதிரி பல்லிளிக்கிறது. இந்திய து£தரக அதிகாரியாக வரும் ஜெயராம், ரவியை கொல்ல வேண்டிய அவசியம் என்ன? போதைப்பொருள் அடங்கிய கோட், சம்பந்தப்பட்டவர்களின் கைகளுக்கே வந்துவிட்ட பின்பும் ரவியை வில்லன்கள் தொடர்வது ஏன்? லண்டன் போலீசும், தமிழ்நாட்டு போலீஸ் போலவே குண்டுகளை குறி தவறியே அடிப்பது ஏன்? இப்படி நிறைய ஏன்..கள்!

எல்லாவற்றிற்கும் சேர்த்து, கண்களுக்கும் காதுகளுக்கும் விருந்து வைத்து 'கேள்வியே கேட்காதீங்க' என்று அனுப்பி வைக்கிறார்கள். ஜீவாவின் ஒளிப்பதிவு, ஹாரிஸ் ஜெயராஜின் பாடல்கள் இரண்டுமே ஃபுல் மீல்ஸ் சாப்பிட்ட நிறைவை அளித்திருக்கிறது.