'வணங்காமண்' நிவாரணத்தில் இலங்கைச் செஞ்சிலுவைச் சங்கம் இழுத்தடிப்பு?

அய்ரோப்பிய தமிழர்களால் இலங்கைத் தமிழர்களுக்கு அனுப்பி வைக்கப்பட்ட 840 டன் உணவுப் பொருள்களை ஏற்றிச் சென்ற நிவாரணக் கப்பலின் சரக்கு குறித்த ஆவணங்களை இலங்கை செஞ்சிலுவை சங்கத்திற்கு முன்னரே அனுப்பி வைத்து விட்டதாக அக்கப்பலுக்கான சென்னை முகவர் தெரிவித்துள்ளார். அய்ரோப்பிய தமிழர்களால் 840 டன் உணவுப் பொருள்கள் ஈழத் தமிழர்களுக்கு அனுப்பி வைக்கப்பட்டது.

வணங்கா மண் என்று பெயர் சூட்டப்பட்ட அக்கப்பல் இலங்கை துறைமுகத்துக்குள் நுழைய தடை விதிக்கப்பட்டு அங்கிருந்து திருப்பி அனுப்பப்பட்டது. பின்னர் சென்னை துறைமுகம் அருகே பல நாள்களாக நிறுத்தப்பட்டது. பின்னர் தமிழ்நாடு முதலமைச்சர் கலைஞர், மத்திய அரசை அணுகி அக்கப்பலை இலங்கைக்குள் அனுமதிக்க ஏற்பாடு செய்தார். வணங்கா மண் கப்பலில் வைக்கப்பட்டிருந்த சரக்குகள் வேறு ஒரு கப்பலுக்கு மாற்றப்பட்டு சென்னையிலிருந்து இலங்கை துறைமுகத்துக்குப் போய்ச் சேர்ந்தது.

இருந்தும், கப்பலில் ஏற்றப்பட்டுள்ள சரக்குகள் குறித்து அக்கப்பலின் சென்னை முகவர் ஆவணங்களை அனுப்பி வைக்காததால் உணவுப் பொருள்களை கப்பலிருந்து இறக்குவதில் சிரமம் ஏற்பட்டுள்ளாதாக இலங்கை செஞ்சிலுவைச் சங்கம் கூறியிருந்தது. ஆனால் இந்தக் குற்றச்சாற்றை அக்கப்பலுக்கான சென்னை முகவர் அக்னி சுப்பிரமணியம் மறுத்துள்ளார். அக்கப்பலில் ஏற்றப்பட்ட சரக்குகள் குறித்த ஆவணங்களை கடந்த வெள்ளிக் கிழமை அன்று அனுப்பி வைத்து விட்டதாகவும் இலங்கை செஞ்சிலுவைவைச் சங்கத்தினர் பெற்றுக் கொண்டதற்கான ஒப்புகைச் சீட்டும் தங்களுக்கு கிடைத்திருப்பதாகவும் அவர் கூறினார்.

மேலும் இந்த உணவுப் பொருள்களை முறைப்படி இறக்கி விநியோகம் செய்வதில் இலங்கை செஞ்சிலுவை சங்கம் ஆர்வம் காட்டவில்லை. சென்னையிலிருந்து கொழும்பு சென்றதற்கான கப்பலுக்கான கட்டணத்தை இந்திய செஞ்சிலுவை சங்கம் தான் செலுத்தியதாக அச்சங்கத்தின் தலைவர் கூறியது தவறு. இக்கட்டணம் லண்டனில் உள்ள மெர்சி மிசின் அமைப்பு தான் செலுத்தியது. அதற்கான இரசீதுகளும் எங்களிடம் உள்ளது என்று அக்னி சுப்பிரமணியம் கூறியுள்ளார். ஆனால் கப்பலில் உள்ள சரக்கு விபரம் குறித்த ஆவணங்கள் இதுவரை சென்னையிலிருந்து கிடைக்கப்பெறவில்லை என்று இலங்கைச் செஞ்சிலுவைச் சங்கம் தொடர்ந்து கூறிவருகிறது.

மேலும் செய்திகளுக்கு