அரசியல் இலாபம் தேடுவதற்கு அரசாங்கம், சர்வதேச குற்றவியல் நீதிமன்றமெனக் கட்டுக்கதையொன்றைக் கூறிவருகிறது - மங்கள சமரவீர

சர்வதேச குற்றவியல் நீதிமன்றத்திற்கு இலங்கை ஜனாதிபதியையோ இராணுவத்தினரையோர கொண்டுசெல்ல இயலாது. அரசியல் இலாபத்தை தேடிக்கொள்வதற்காகவே அரசாங்கம் இவ்வாறான பொய்ப் பிரசாரங்களை பொதுமக்களிடையே பரப்பி வருகின்றது என ஸ்ரீலங்கா சுதந்திரக் கட்சியின் மக்கள் பிரிவின் தலைவர் மங்கள சமரவீர தெரிவித்துள்ளார்.

யுத்தத்தை வெற்றிகரமாக முடிப்பதற்கு கடந்த முப்பது ஆண்டு காலமாக உயிர்தியாகம் செய்த இராணுவ வீரர்கள் இன்று ஒதுக்கி வைக்கப்பட்டுள்ளனர் என்றும் அவர் கூறினார். ஸ்ரீலங்கா சுதந்திரக் கட்சி மக்கள் பிரிவின்

பத்தரமுல்லையில் உள்ள கட்சித் தலைமையகத்தில் இன்று (08) நடைபெற்ற செய்தியாளர் சந்திப்பிலேயே அவர் இதனைக் கூறினார்.

அரசாங்கத்திற்கு எதிராகவோ, இராணுவத்தினருக்கு எதிராகவோ சர்வதேச மட்டத்தில் எழும் குற்றச்சாட்டுக்கள் தொடர்பில் முறையான விசாரணைகளை உள்நாட்டில் பகிரங்கமாக மேற்கொள்ளப்பட வேண்டும். அப்போது தான் உண்மை தெரியவரும்.

99.9 சதவீதமான ஒழுக்கமுடைய இராணுவமாக ஐ.நா.வில் இலங்கை இராணுவம் போற்றப்பட்டு அவர்களது சமாதானப்படைகளுக்கு எமது இராணுவத்தை இணைத்தனர். ஆனால், இன்று அரசாங்கத்தின் சில பொறுப்பற்ற செயற்பாடுகளினாலும் அரச உயர்மட்டத்தவர்களைப் பாதுகாப்பதற்காகவும் இலங்கை அரசாங்கம் முயற்சி செய்தமையால் இன்று நிலைமை மிகவும் மோசமடைந்துள்ளது.

இலங்கையை பயங்கரவாத யுத்தத்திலிருந்து மீட்டெடுக்க இலங்கையின் முன்னாள் இராணுவத் தளபதி செல்லாக் காசாகவுள்ளார். அவருக்கு விளையாட்டுத்துறை அமைச்சின் செயலாளர் பதவியைக் கொடுக்க அரசு முயற்சி செய்வதாகவும் தெரியவருகின்றது.

நாட்டிற்காக உயிர்த் தியாகம் செய்த இராணுவத்தினரை இந்த அரசாங்கம் மிகவும் மோசமான நிலையிலேயே நடத்துகிறது. இன்று இராணுவத்திலிருந்து ஒரு மாதத்திற்கு 2 ஆயிரத்திற்கும் அதிகமோனோர் தப்பிச் செல்வதாகத் தகவல்கள் வெளியாகின்றன. இதன் உண்மைத் தன்மையை அரசாங்கம் வெளிப்படுத்த வேண்டும்.

செனல் 4 போன்ற விவகாரங்களால் இன்று இலங்கைக்கு எதிராக பாரிய மனித உரிமை மீறல் குற்றச்சாட்டுக்கள் முன்வைக்கப்பட்டுள்ளன. இதுதொடர்பாக அரசாங்கம் முறையான நடவடிக்கை எடுத்திருந்தால் நட்டஈட்டையாவது பெற்றிருக்கலாம். ஆனால், அரசாங்கம் உள்நாட்டிலேயே தமது வாய்வார்த்தைகளை வெளியிடுகின்றது. சர்வதேச குற்றவியல் நீதிமன்றத்திற்கு இலங்கை இராணுவத்தைக் கொண்டுச் செல்லப் போவதாகக் கூறி பொதுமக்களின் அனுதாபத்தைப் பெற காமினி பொன்சேகாவின் நடிப்பை அரசாங்கம் வெளிக்காட்டுகின்றது.

யுத்தக் காலத்தில் கூட சந்திரிக்கா காலத்தில் கொண்டுவரப்பட்ட விமானங்கள் உட்பட நவீன போர் தளபாடங்களையே இராணுவத்தினர் உபயோகித்ததாக இராணுவத்தினரின் அறிக்கைகளிலேயே தெரியவருகின்றது. இந்நிலையில், யுத்தத்தைக் காட்டி ஷஷநாமக்காக நாம்|| நிதிச் சேகரிப்பு போன்ற செயற்பாடுகளினால் பாரிய நிதி மோசடிகள் இடம்பெற்றுள்ளன.

அரசாங்கம் சர்வதேச குற்றவியல் நீதிமன்றத்தை முன்வைத்து உள்நாட்டில் பொதுமக்களை ஏமாற்ற முயற்சித்தாலும் காலப்போக்கில் அரசாங்கத்தின் தான்தோன்றித்தனமான செயற்பாடுகளினால் ஐ.நா.வின் பாதுகாப்புப் பேரவை தலையிட்டு இலங்கை இராணுவத்தினரை சர்வதேச நீதிமன்றங்களுக்குக் கொண்டுசெல்லும் அபாயம் உருவாகிறது எனவும் மங்கள சமரவீர தெரிவித்தார்.