மணலாறு பகுதியில் மீண்டும் சிங்களவர்களை குடியேற்றும் சிறிலங்கா அரசு

தமிழீழ விடுதலைப் புலிகள் நடத்திய தாக்குதல்கள் காரணமாக முல்லைத்தீவு மாவட்டத்தின் மணலாறு பகுதியில் இருந்து இடம்பெயர்ந்த சிங்களக் குடியேற்றவாசிகளை மீண்டும் அப்பகுதிகளில் பாரிய பாதுகாப்பு ஏற்பாடுகளுக்கு மத்தியில் மீள்குடியேற்றுவதற்கு சிறிலங்கா அரசு துரித ஏற்பாடுகளைச் செய்துவருகின்றது.

சிறிலங்கா அரசுக்கும் விடுதலைப் புலிகளுக்கும் இடையிலான போர் மோசமடைந்திருந்த காலப்பகுதியில் சுமார் 15 வருடங்களுக்குமுன்னர் மணலாறு பகுதியில் இருந்து இடம்பெயர்ந்த சிங்கள மக்களையே மீளக் குடியேற்ற அரசு இப்போது தீர்மானித்துள்ளதாக அரச வட்டாரங்கள் தெரிவித்தன.

இதன்படி 325 சிங்கள குடும்பங்கள் விரைவில் மீளக் குடியேற்றப்படவுள்ளன. மணலாறு பிரதேசத்தைச் சேர்ந்த கொன்னேவ, கம்பிலிவெவ, வெஹரவெவ, கொஹம்பகஸ்வெவ ஆகிய சிங்களக் குடியேற்றக் கிராமத்தைச் சேர்ந்தோரே மீளக் குடியமர்த்தப்படவுள்ளனர் எனவும் தகவல்கள் தெரிவிக்கின்றன.

இதற்கான தொடக்க நிகழ்வு தேச நிர்மாண மற்றும் தோட்ட உட்கட்டமைப்பு அமைச்சர் எம்.எம்.சந்திரசேன தலைமையில் நடைபெற்றது.

அடுத்த பெரும்போகத்தில் அப்பகுதியில் உள்ள வயல்களில் விவசாய நடவடிக்கைகளை மேற்கொள்ளும் வகையில் நான்கு கிராமங்களும் அபிவிருத்தி செய்யப்படவிருப்பதாகவும் ஆளும் கட்சி வட்டாரங்கள் தெரிவித்தன.

'வடக்கின் வசந்தம்' 180 நாள் திட்டத்தில் இக்கிராமங்கள் அபிவிருத்தி செய்யப்படவிருப்பதாகத் தெரிவிக்கப்படுகின்ற போதிலும், இடம்பெயர்ந்து முகாம்களில் உள்ள தமிழர்களை மீளக் குடிமயர்த்துவதற்கு மட்டும் கண்ணிவெடிகள் அகற்றப்பட வேண்டும் என அரசு காரணம் தெரிவித்து அதனைத் தாமதப்படுத்தி வருகின்றது.

இது தொடர்பாக தமிழ் அரசியல் வட்டராங்களிடம் கேள்வி எழுப்பியபோது, வன்னியைச் சொந்த இடமாகக் கொண்ட தமிழ் மக்களின் மீள்குடியேற்றத்தைத் திட்டமிட்டு தாமதப்படுத்தும் அரசு, சிங்களவர்களைக் குடியேற்றுவதில் அதிகளவு அக்கறையைக் காடடுவது அரசின் உள்நோக்கத்தை தெளிவாகப் புலப்படுத்துவதாக இருப்பதாக சுட்டிக்காட்டினார்கள்.

புதினம்