அகில இலங்கைத் தமிழ்க் காங்கிரஸ் தேர்தலில் களமிறங்காமல் சுயேட்சையாக போட்டி?

அகில இலங்கைத் தமிழ்க் காங்கிரஸ் தேர்தலில் களமிறங்காமல் சுயேட்சையாக போட்டி?

அகில இலங்கைத் தமிழ்க் காங்கிரஸ் கட்சியின் பெயரில் கஜேந்திரகுமார் பொன்னம்பலம் தலமையிலான குழவினர் தேர்தலில் போட்டியிடுவதில் சட்டப்பிரச்சனை ஏற்பட்டுள்ளது.

குறிப்பாக அதன் தலைவர் அப்பாத்துரை விநாயகமூர்த்தி தமிழ்த் தேசியக் கூட்டமைப்பில் இணைந்து தேர்தலில் போட்டியிடுவதனால் தலமைப் பதவியைக் காரணம் காட்டி நீதிமன்றம் செல்வது அல்லது தேர்தல் ஆணையகத்தில் முறையிடுவதானால் சிக்கல்கள் உருவாகும் என்பதனால் சுயெட்சையாக தேர்தலில் போட்டியிடலாம் என எதிர்பார்க்கப்படுகிறது.

யாழ் பல்கலைக் கழகத்தின் ஒரு பகுதியினரையும் மற்றும் முன்னர் தமிழ்த் தேசியக் கூட்டமைப்பில் நாடாளுமன்ற உறுப்பினர்களாக இருந்து தற்போது பட்டியலில் இடம்பெறாது இருப்பவர்களையும் சேர்த்து இந்த சுயெட்சை அணி களமிறங்கலாம் என எதிர்பார்க்கப்படுகிறது.

இதேவேளை அகில இலங்கைத் தமிழ்க் காங்கிரஸ் கட்சியின் தலைவர் அப்பாத்துரை விநாயகமூர்த்தி தமிழ்த் தேசியக் கூட்டமைப்பில் போட்டியிடுகின்றார். யாழ்ப்பாண மாவட்டத்தின் முக்கிய வேட்பாளர்களில் ஒருவராக அவர் களம் இறங்கியுள்ளார்.

எனினும் தமிழ்த் தேசியக் கூட்டமைப்பிலிருந்து தமிழ்க் காங்கிரஸ் கட்சி விலகிவிட்டது என அக்கட்சியின் பொதுச்செயலாளர் கஜேந்திரகுமார் பொன்னம்பலம் ஏற்கனவே அறிவித்துள்ளார்.

கூட்டமைப்பின் ஒற்றுமையைக் குலைத்து, வரலாற்றுத் தவறு இழைக்கத் தாம் விரும்பவில்லை எனக் கூறியுள்ள அப்பாத்துரை விநாயகமூர்த்தி இந்தத் தேர்தலில் போட்டியிடுவதற்கு கேட்ட எல்லா விடயங்களையும் வழங்குவதற்குத் தமிழ்க் கூட்டமைப்பு தயாராக இருந்தது எனத் தெரிவித்துள்ளார். அதனால் அதிலிருந்து வெளியேறுவதை நியாயப்படுத்தும் காரணம் ஏதுவும் இல்லை எனவும் அதன் அடிப்படையில் ஒரு காங்கிரஸ் உறுப்பினராகவே தேர்தலில் களமிறங்கியுள்ளதாகவும் கூறியுள்ளார்.

2001 ஆம் ஆண்டு தமிழர் விடுதலைக் கூட்டணி, அகில இலங்கைத் தமிழ்க் காங்கிரஸ், ரெலோ ஆகியவை இணைந்து கூட்டமைப்பை உருவாக்கின. பின்னர் ஈ.பி.ஆர்.எல்.எவ்வும் இணைந்துகொண்டது.

செல்வராசா கஜேந்திரன், பத்மினி சிதம்பரநாதன் போன்றோருக்கு வேட்பாளர் நியமனம் வழங்கப்படவில்லை என்ற காரணத்தைக் காட்டி கூட்டமைப்பைப் சிதைப்பது உகந்தது அல்ல என அப்பாதுரை விநாயகமூர்த்தி தெரிவித்துள்ளார்.

கூட்டமைப்பில் அங்கம் வகிக்கும் நான்கு கட்சிகளும் ஒன்றிணைந்து இத்தேர்தலில் போட்டியிடுவது என சம்பந்தப்பட்ட கட்சித் தலைவர்கள் கொழும்பில் கடந்த வாரம் கூடி உடன்பாடு எழுதி இணக்கம் கண்டனர். அந்த மை காய்வதற்கு இடையில் காலையில் எழுந்து தாம் கூட்டமைப்பில் போட்டியிடவில்லை எனக் கூறுகின்றமையை தன்னால் ஏற்க முடியவில்லை என வலியுறுத்தி உள்ளார்.