அரபு எமிரேட்ஸிலுள்ள நிறுவனம் மூடப்பட்டதால் தெற்காசிய ஊழியர்கள் 400 பேர் நிர்க்கதி!

ஐக்கிய அரபு எமிரேட்ஸிலுள்ள நிறுவனமொன்று மூடப்பட்டுள்ளதால் தெற்காசிய நாடுகளைச் சேர்ந்த சுமார் 400 ஊழியர்கள் நிர்க்கதியாகி உள்ளனர்.சார்ஜா, துபாயில் அலுவலகங்களைக் கொண்டுள்ள சிஸ்டம்ஸ் இன்ஜினியரிங் எல்.எல்.சி. எனும் மேற்படி நிறுவனம் நஷ்டமடைந்ததால், அந்நிறுவனத்தை ஸ்தாபித்த ஜோசப் டி சௌஸா என்பவர் அங்கிருந்து தப்பிச் சென்றவிட்டதாக அபுதாபியை தளமாகக் கொண்ட த நெஷனல் எனும் பத்திரிகை தெரிவித்துள்ளது.

இதனால் நேபாளம், பாகிஸ்தான், இந்தியா, இலங்கை, பங்களாதேஷ் ஆகிய நாடுகளைச் சேர்ந்த சுமார் 400 ஊழியர்கள் தங்குமிடம், உணவு, எதுவுமின்றி நிர்கதியாகியுள்ளனர்.

தங்குமிடத்திற்கான வாடகை செலுத்தாததால் இவர்கள் அங்கிருந்து வெளியேற்றப்பட்டு வீதியில், அந்நிறுவனத்திற்குச் சொந்தமான சிறிய வேலைத்தளம் ஒன்றிலும் தங்கியுள்ளனர் எனவும் அப்பத்திரிகை தெரிவித்துள்ளது.

இந்நிறுவனத்தின் உரிமையாளரான டி சௌஸாவை கடந்த வாரமாக காணவில்லை என ஊழியர் ஒருவர் தெரிவித்துள்ளார்.

‘அவர் எமக்கு டிசெம்பர் மாதம் சம்பளம் வழங்குவதாக வாக்குறுதி அளித்திருந்தார். அவர் சம்பளம் வழங்காமல் நாட்டைவிட்டுச் சென்றுவிட்டதாக அறிந்து அதிர்ச்சியடைந்தோம்’ என ஊழியரான அனில் உபாதியாய் கூறியுள்ளார்.

‘எம்மில் ஒருவரிடமும் பணம் இல்லை. எமக்கு உதவுவதற்கு நிறுவனத்தில் இருந்து எவரும் வரவில்லை’ என அபூபக்கர் சித்திக் தெரிவித்துள்ளார்.

http://www.saritham.com/?p=45613