மே தினக் கூட்டங்களுக்குப் பலவந்தமாக களமிறக்கப்படும் ஆளும் கட்சி ஆதரவாளர்கள்!

மகிந்த ராஜபக்‌ஷவிற்கு தத்தமது ஆளுமையை வெளிப்படுத்துவதற்காக பல அமைச்சர்கள் இம்முறை மே தினத்தைப் பயன்படுத்திக் கொண்டுள்ளதாக ஶ்ரீலங்கா சுதந்திரக் கட்சியின் சிரேஷ்ட அதிகாரியொருவர் தெரிவித்தார். கடந்த காலங்களில் ஜனாதிபதியினால் புறந்தள்ளப்பட்ட கட்சியின் அமைச்சர்களே இந்தத் தீர்மானத்தை எடுத்துள்ளதாகவும் அவர் குறிப்பிட்டார்.

இதற்கமைய தமக்கான அரசியல் செல்வாக்கை அதிகரித்துக் கொள்ளும் நோக்கில் அவர்களது ஆதரவாளர்களுடன் குறித்த அமைச்சர்கள் களமிறங்கத் திட்டமிட்டுள்ளனர். அத்துடன், தமது பலத்தைக் காண்பிக்க பெருமளவிலான கூட்டத்தை ஒன்றுதிரட்டவும் இவர்கள் முயற்சித்து வருகின்றனர்.

ஜனாதிபதி மீது அதிருப்தி கொண்டுள்ள அமைச்சர்கள் இவ்வாறு செயற்படும் நிலையில், மக்கள் தற்போது சந்தித்துள்ள பாரிய பொருளாதார நெருக்கடிக்கமைய தொகுதி சார்பாக பெருமளவிலான மக்களை மே தினக் கூட்டத்தில் ஒன்றுதிரட்டுவது சிரமமான பணியென ஏனைய பெரும்பாலாள அமைச்சர்கள் தெரிவித்துள்ளனர்.

இதனால், மே தினக் கூட்டங்களுக்குப் பொறுப்பான அமைச்சர் டளஸ் அழகப்பெரும, நாடாளுமன்ற உறுப்பினர் நாமல் ராஜபக்‌ஷ ஆகியோர் மே தினக் கூட்டங்களுக்கு மக்களைப் பலவந்தமாக அழைத்துவரும் முயற்சியில் இறங்கியுள்ளனர்.

இதற்கமைய தொழில் உறுதிசெய்யப்படாத அனைத்துப் பட்டதாரிகளும் இம்முறை மே தினத்தில் கலந்துகொள்ள வேண்டும் என உத்தரவிடப்பட்டுள்ளது. இதற்கு மேலதிகமாக, தொழில்வாய்ப்புக்களை எதிர்பார்த்துள்ள அனைத்து இளைஞர், யுவதிகளும், தொழில் நிரந்தரத்தை எதிர்பார்த்துள்ளவர்களும், மே தினத்தில் கலந்துகொள்வது கட்டாயம் எனவும் உத்தரவிடப்பட்டுள்ளது. இவ்வாறு அரச சேவை ஊழியர்கள் வலுக்கட்டாயமாக இம்முறை ஆளும் கட்சி மே தினத்தில் களமிறக்கப்படுவதாக அந்த சிரேஷ்ட அதிகாரி குறிப்பிட்டார்.

http://thaaitamil.com/?p=17639