' இன்னொசென்ட் முஸ்லிம் ' என்ற திரைப்படமும் - அமெரிக்க அரசியலும்..?! ஈழதேசம் பார்வையில்..!

' இன்னொசென்ட் முஸ்லிம் ' என்ற திரைப்படமும் - அமெரிக்க அரசியலும்..?! ஈழதேசம் பார்வையில்..!

மூன்றாவது நாளாக சென்னையில் உள்ள அமெரிக்க தூதரகத்தை முற்றுகையிட்டு வரும் பல்வேறு இஸ்லாமிய அமைப்புகள் ஆயிரக்கணக்கில் குவிந்து தங்களது எதிர்ப்புகளை வெளிப்படுத்தி வருகின்றனர். இன்று எல்.ஐ.சி.எதிர்புறம் உள்ள பள்ளிவாசல் அருகில் மட்டும் ஆர்ப்பாட்டங்களை நடத்திக் கொள்ள அனுமதி கொடுத்த தமிழக போலீஸ் சுமார் ஒரு 600 பேர் வரை குவிந்திருந்தனர் என்றாலும், அங்கு குவியத் துவங்கிய பல ஆயிரக்கணக்கான இஸ்லாமியர்கள் தடியடி நடத்தி விரட்டி அடிக்கப்பட்டார்கள், என்றாலும் கூட்டத்தை முழுமையாக அகற்ற முடியாமல் திணறி வருகிறது தமிழக போலீஸ். இவையெல்லாம் தமிழகத்தில் நடைபெற்ற எதிர்ப்பு போராட்டங்கள். இந்தியாவில் பல்வேறு நகரங்களில் இந்த படத்திற்கான எதிர்ப்பும், அமெரிக்காவிற்கான எதிர்ப்பும் என்று இஸ்லாமிய மக்கள் வீதிக்கு இறங்கி உள்ளார்கள் போராடுவதற்கு. இதுகாறும் சினிமாவிலும், மீடியாக்களிலும் இஸ்லாமியர்கள் அனைவருமே.,பயங்கரவாதிகள், தீவிரவாதிகள் என்று சளைக்காமல் விசமப் பிரச்சாரம் செய்து வந்த இந்த அரசு ஊடகங்களும், அரசு ஊடகங்களின் வழியே வாந்தி எடுத்து வரும் தனியார் செய்தி நிறுவனங்கள் மற்றும் ஊடகங்கள், தற்பொழுது எந்த கருத்தும் சொல்ல முடியாமல் தவித்து வருகின்றன. தீவிரவாதிகள் மற்றும் பயங்கரவாதிகள் அமெரிக்க தூதரகத்தை எதிர்த்து போராடுகிறார்கள் என்று சொல்ல முடியவில்லை.

இந்தியாவில் நடைபெறும் போராட்டங்கள் அதாவது இந்த முஸ்லிம்களின் போராட்டங்கள் அரசியல் படுத்தப்படுகின்றன மேலை நாடுகளால். தன் பொருளாதார நலன்களை முன்னிறுத்தியே இந்த போராட்டங்கள் தூண்டி விடப்படுகின்றன, அல்லது அவ்வாறு போராடுமாறு அரசியல் படுத்தப்படுகின்றன. வளைகுடா நாடுகளில் இஸ்லாமியர்களின் போராட்டங்கள் தீவிரமடைந்து வருகின்றன. அமெரிக்க அரசு அந்த குறும்படம் கருத்து சுதந்திரம் பற்றியது. எனவே அதில் தலையிட முடியாது என்று கறாராக கூறிவிட்டது ஒபாமா அரசு. மேலோட்டமாக பார்க்கையில், ஆமாம்..அமெரிக்க அரசு சொல்வது சரிதானே என்று தோன்றும். இன்றுவரை முள்வேலி முகாம்களில் பிச்சைக்காரர்களை விட படு மோசமாக நிலை நிறுத்தி வைக்கப்பட்டுள்ள ஈழத் தமிழர்கள் குறித்து ஏன் கருத்து சுதந்திரம் என்று சொல்லவில்லை. அட கருத்து சுதந்திரம் கூட வேண்டாமையா..? உயிர் வாழும் உரிமையைக் கூட கடந்த மூன்று ஆண்டுகளாக வழங்குங்கள் என்று ஏன் மகிந்தாவிடம், சோனியாவிடம் சொல்லவில்லை..?

இப்பொழுது இந்த கருத்துச் சுதந்திரத்தை மேற்கண்டவற்றுடன் பொருத்திப் பாருங்கள், கருத்து சுதந்திரம் அம்மணமாக பல்லை இளித்துக் கொண்டு நிற்பது தெரியும்..! இன்றைய நிலையில் மத்திய வளைகுடா மற்றும் அரேபிய நாடுகளுடன் பெருமளவில் சீனா தனது பொருளாதார நலன்களை மிக ஆழமாக பதித்து விட்டன. துணையாக பிரிக்ஸ் நாடுகளின் ஒத்துழைப்பு வேறு. ஏற்கனவே தன் பிடியில், அமெரிக்காவின் பிடியில் இருந்த வளைகுடா நாடுகளின் அரசுகளை, தற்பொழுது எவ்வாறு இந்த நிலைமைகளை சமாளிப்பது..? என்று இருக்கையில்,சிரியா ஒரு சிறந்த உதாரணம். நேட்டோ நாடுகள் தலைகீழாக நின்றும் ஒன்றும் செய்ய முடியவில்லை சிரியாவில், ரசியா பின் மறைந்து நிற்கும் சீனா தவிர வேறு என்னவாக இருக்க முடியும்...? போதாக்குறைக்கு வளைகுடா நாடுகளில் ஏற்பட்டு வரும் ஜனநாயக மாற்றம் வேறு பெரும் பிரச்சனையாக உள்ளன. எப்படி சமாளிக்க போகிறது அமெரிக்க அரசு என்று யோசிப்பதற்குள், இதோ ஒரு சிறு குறும்படம் மூலம் தனக்கான அரசியலை தொடங்கி விட்டது அமெரிக்க அரசு.

இஸ்லாமிய நாடுகளில் நிலையற்ற அரசுகளை உருவாக்குவது. ஆணி அடித்து தங்களது குடும்பத்தை அரசில் ஏற்றிடும் வேளையில் இருந்த பல அரேபிய ஜாம்பாவான்கள் எல்லாம் விரட்டி அடிக்கப்பட்டுள்ளார்கள். ரசியா சீனா கைகளுக்கு சென்று விட்ட அந்த அரசுகளை ஒப்பேற்றி விட்டு பேரங்களை பேச வேண்டும். அந்த அரசுகளுக்கு பின் நிற்கும் பிரிக்ஸ் நாடுகளுக்கு நெருக்கடிகளை கொடுக்க வேண்டும் என்ற இந்த அரசியலை கையில் எடுத்துள்ளது அமெரிக்கா..என்று கருதலாமா..? ஒரு சிறிய குறும்படத்தின் மூலம். !

சங்கிலிக்கருப்பு