வடக்கின் கடல் வளத்தை சுறண்டும் தென்பகுதி மீனவர்கள்: 1600 குடும்பங்களின் நிலை என்ன ?

வடக்கின் கடல் வளத்தை சுறண்டும் தென்பகுதி மீனவர்கள்: 1600 குடும்பங்களின் நிலை என்ன ?

இலங்கையின் வடமாகாண கடற்பரப்பில் அத்துமீறி நுழைகின்ற இந்திய மீனவர்களின் பிரச்சினை ஒரு பக்கம் இருக்க, இப்போது தென்பகுதியில் இருந்து வடபகுதிக்கு வருகின்ற மீனவர்களின் சட்டவிரோத மீன்பிடி தொழில் முறையினால் மேலும் பாதிப்பு அதிகரித்திருப்பதாகத் தெரிவிக்கப்பட்டிருக்கின்றது.

வடமாகாண மீனவர்கள் எதிர்கொண்டுள்ள இந்தப் பிரச்சினைகளுக்கு தென்பகுதி மீனவர்களுடன் நிறுவன ரீதியாக இணைந்து செயற்பட்டு தேசிய மட்டத்தில் தீர்வு காண்பதற்கு தீர்மானிக்கப்பட்டிருக்கின்றது.

வடமாகாண கடற்தொழிலாளர் கூட்டமைப்பின் தலைவர் சின்னையா தவரட்ணம் தலைமையில் ஞாயிறன்று வவுனியாவில் நடைபெற்ற கூட்டத்திலேயே இந்தத் தீர்மானம் மேற்கொள்ளப்பட்டுள்ளது.

சொந்தப் பகுதியாகிய வடமராட்சி கிழக்குப் பகுதியில் மீளக்குடியமர்ந்து வாழ்வாதார முயற்சிகளை மேற்கொண்டுள்ள வேளையில் கடலட்டை பிடிப்பதற்கான அனுமதியைப் பெற்றுக்கொண்டு தென்பகுதியில் இருந்து வருகின்ற மீனவர்கள் அந்தத் தொழிலைச் செய்வதுடன், சங்கு குளித்தல், சுருக்கு வலை பாவித்தல், டைனமைட் அடித்தல் போன்ற அரசாங்கத்தினால் தடைசெய்யப்பட்டுள்ள முறைகளைப் பயன்படுத்தி தொழில் செய்வதனால் தமது பிரதேசத்தில் 1600 மீனவ குடும்பங்களின் தொழில் பாதிக்கப்பட்டிருப்பதாக கட்டைக்காடு பிரதேசத்தைச் சேர்ந்த அந்தோனிப்பிள்ளை ஸ்ரானிஸ்லஸ் கூறுகின்றார்.

கரையிலிருந்து 28 கடல் மைல் தொலைவில் ஆழ்கடலில் செய்யப்பட வேண்டிய சிலிண்டர் தொழிலை, ஆழமற்ற மன்னார் கரையோரக் கடலில் அங்கு வருகின்ற தென்பகுதி மீனவர்கள் மேற்கொள்வதனால் மன்னார் பிரதேச மீனவர்களின் தொழில் பாதிக்கப்பட்டிருப்பதாக மன்னாரைச் சேர்ந்த கிரகோரி அன்ரனி சங்கர் தெரிவித்திருக்கின்றார்.

வடபகுதி நீண்டகாலமாகத் தொடர்ந்து கொண்டிருக்கின்ற இந்திய மீனவர்களின் அத்துமீறிய வருகை மற்றும் தென்பகுதி மீனவர்களின் சட்டவிரோதத் தொழில் முறைகள் என்பன குறித்து, அந்தந்தப் பிரதேசத்து அரசாங்க அதிபர்களிடமும், அத்துடன் அமைச்சர் மட்டத்திலும் பலமுறைகள் பேசப்பட்டுள்ளது.

எனினும் இதுவரையில் எந்தவிதமான முடிவுகளும் தங்களுக்குக் கிடைக்கவில்லை என்று வடமாகாண கடற்தொழிலாளர் கூட்டமைப்பின் தலைவர் சின்னையா தவரட்னம் குறிப்பிடுகின்றார்.

இந்த நிலையில் தென்பகுதி மீனவர் சங்கங்களுடன் இணைந்து தேசிய மட்டத்திற்கு இந்தப் பிரச்சினைகளைக் கொண்டு சென்று தீர்வு காண்பதே தமது நோக்கம் என்றும் அவர் தெரிவித்திருக்கின்றார்.

(பீபீசி)