தமிழை வழக்காடும் மொழியாக்க வேண்டும்; உச்ச நீதிமன்றில் முதல்வர் ஜெயலலிதா அறிவிப்பு

சென்னை உயர்நீதிமன்றில், தமிழை வழக்காடும் மொழியாக அறிவிக்க வேண்டும் என, முதல்வர் ஜெயலலிதா, மத்திய அரசைக் கேட்டுக் கொண்டுள்ளார்.

டில்லியில், முதல்வர்கள் மற்றும் அனைத்து மாநில உயர்நீதிமன்ற தலைமை நீதிபதிகள் மாநாடு, உச்சநீதிமன்ற தலைமை நீதிபதி அல்டமாஸ் கபீர் தலைமையில், நேற்று முன்தினம் நடைபெற்றது.

மாநாட்டை, பிரதமர் மன்மோகன்சிங் தொடக்கி வைத்து உரையாற்றினார். மாநாட்டில், தமிழக உள்ளாட்சிதுறை மற்றும் சட்டம், நீதிமன்றங்கள், சிறைச்சாலைகள் துறை அமைச்சர் கே.ப.முனுசாமி பங்கேற்று, முதல்வர் ஜெயலலிதாவின் உரையை வாசித்தார்.

அந்த உரையில், முதல்வர் ஜெயலலிதா தெரிவித்திருப்பதாவது:

நம் நாட்டின், சிறந்த தலைவர்கள் உருவாக்கிய சட்டநெறி முறைகளின்படி, நமது நாடு, ஜனநாயகப் பாதையில் இயங்குகிறது. சட்டசபை, நிர்வாகம், நீதி ஆகிய மூன்றும், மாநிலங்களில், மூன்று தூண்களாக விளங்குகின்றன.

இந்த மூன்று அமைப்புகளும், தனித் தனி அதிகாரம் பெற்றதாகும். இருப்பினும், ஒன்றோடு ஒன்று இணைந்து செயலாற்றி வருகிறது. அரசியல் சட்டத்தில் உறுதி அளித்துள்ளபடி, நாட்டு மக்கள் அனைவருக்கும் நீதி, உரிமை ஆகியவை, சமமாக வழங்கப்பட வேண்டும்.

கடந்த, 65 ஆண்டு கால, ஜனநாயக பயணத்தில், சிறப்பு வாய்ந்த, தீர்ப்புகள் மூலம், நீதித்துறை தலை நிமிர்ந்து நிற்கின்றது. இதை, தமிழகம் நன்கு உணர்ந்துள்ளது. காவிரி நதி நீர்ப்பிரச்சினையில் தீர்வுகாண, 20 ஆண்டுகளாக, பலகட்டமாக போராடினோம்.

உயர் நீதிமன்றின் உத்தரவால் தான், காவிரி நடுவர்மன்ற உத்தரவு, மத்திய அரசின், அரசிதழில் வெளியிடப்பட்டது. மாநாட்டில், ஏழை மக்களின் எதிர்பார்ப்பை பூர்த்தி செய்யும் வகையில், நீதி கிடைக்கச் செய்ய வேண்டும் என்பது குறித்து, ஆலோசிக்க வேண்டும்.

சட்ட ரீதியில் பாதுகாக்கும் வகையில், ஏழைகளுக்கு விரைவான தீர்ப்பு கிடைக்க வேண்டும் என்பதே பொதுவான குறிக்கோளாகும். தமிழக அரசு, நீதித்துறைக்கு தேவையான, உள்கட்டமைப்பு வசதிகளைச் செய்து வருகின்றது.

2012-13 ஆம் ஆண்டுக்கு, 19.53 கோடி ரூபாய் நிதி மட்டுமே ஒதுக்கப்பட்டது. 2013-14ஆம் ஆண்டுக்கு, 70 கோடி ரூபாய் அளவுக்கு நிதி ஒதுக்கீடு செய்ய வேண்டும். அப்போது தான், 2016 ஆம் ஆண்டுக்குள், அனைத்து நீதிமன்றங்களும் சொந்தக் கட்டடம் கட்ட முடியும்.

டில்லியில், மருத்துவ மாணவி பலாத்காரம் செய்யப்பட்டு கொலை செய்யப்பட்ட சம்பவம், நாட்டையே அதிர்ச்சிக்கு உள்ளாக்கியது. இதையடுத்து, தமிழகத்தில் உள்ள பெண்களுக்கு, உறுதியான பாதுகாப்பு அளிக்க, 13 அம்ச திட்டங்கள் அறிவிக்கப்பட்டுள்ளன.

நாட்டின் அதிகாரப்பூர்வ மொழிகள் சட்டத்தின் கீழ், மாநில மொழிகளில், நீதிமன்ற நடவடிக்கைகள், தீர்ப்புகள் வழங்க உரிமை அளிக்கப்பட்டுள்ளது. இதன்படி, நான்கு மாநிலங்களில், மாநில மொழிகளில், நீதிமன்ற நடவடிக்கைகள் அமுலில் உள்ளன.

இதேபோன்ற நடை முறையை, சென்னை உயர் நீதிமன்றிலும் கொண்டு வர வேண்டும் என, நீண்டகாலமாக கோரிக்கை விடுக்கப்பட்டு வருகிறது. ஆனால், மத்திய அரசு, இது சாத்தியமில்லை என்று குறிப்பட்டுள்ளது.

மாநில மொழிகளில், வழக்கு நடவடிக்கைகள் இருந்தால் தான், அது மக்களுக்கு புரியும். எனவே, சென்னை உயர்நீதிமன்றில், தமிழை வழக்காடும் மொழி யாகக் கொண்டு வர, மத்திய அரசு மற்றும் உச்சநீதிமன்று தங்கள் முடிவை மறுபரிசீலனை செய்ய வேண்டும். இவ்வாறு, முதல்வர் ஜெயலலிதா அறிக்கையில் குறிப்பிட்டுள்ளார்.

http://onlineuthayan.com/News_More.php?id=431011960009740575