2012ம் ஆண்டுக்கான மனித உரிமைகள் துல்ப் விருதை இந்தியாவைச் சேர்ந்த மாரிமுத்து பரதன் பெற்றுக்கொண்டார்

தலித்துகளின் நல் வாழ்வுக்காகப் போராடுவதனால் நெதர்லாந்து அரசினால் இந்த விருது வழங்கப்பட்டுள்ளது.

 நெதர்லாந்து அரசினால் 2008ம் ஆண்டு உருவாக்கப்பட்ட  மனித உரிமைகள் துல்ப் என்ற அமைப்பு ஒவ்வொரு ஆண்டும் உலகெங்கும் உள்ள மனித உரிமைப்போராளிகளில் ஒருவரைத் தெரிவு செய்து விருதுகளை வழங்கி வருகிறது. இந்த வகையில் சென்ற ஆண்டு இப்பரிசு சீனாவைச்சேர்ந்த  நீ யுலான் என்பவருக்கு வழங்கப்பட்டது. இம்முறை 2012ம் ஆண்டுக்கான மனித உரிமைகள் துல்ப் விருதை இந்தியாவைச்சேர்ந்த  மாரிமுத்து பரதன் என்னும் தமிழர் பெற்றுக்கொண்டுள்ளார். சாதிய ஒடுக்குமுறையினால் மிகுந்த ஒடுக்குமுறைக்கும் உடல் உள இன்னல்களுக்களுக்கும் உள்ளாகும் தலித்துகளின் நல்வாழ்வுக்காகப் போராடிக் கொண்டிருப்பதனாலேயே அவருக்கு இந்த விருது வழங்கப்பட்டுள்ளது.

இலங்கையிலும் சாதிய ஒடுக்குமுறைகள் இன்னமும் வீரியமாகவே உள்ளன. இலங்கையில் நிகழந்த தமீழீழ விடுதலைப்போராட்டம் சாதியத்தின் வேர்களை அவ்வளவு கடுமையாகப்பாதிக்கவில்லை என்பதால் அவை மீண்டும் மேலெழுந்து வருகின்றன. இதன் மறுபுறத்தில் இலங்கை அரசு தமிழ் மக்களிடத்தில் இருக்கும் சாதிய முரண்பாடுகளை அவர்களை இன்னமும் பிளவுபடுத்தும் வகையில் கையாண்டு வருவதாக அரசியல் அவதானிகள் தெரிவிக்கின்றனர்.

சாதிய ஒடுக்குமுறைகள், பெண்கள் மற்றும் சிறுவர்கள் மீதான பாலியல் வன்முறைகள் காரணமாக இந்தியா  இலங்கை போன்ற நாடுகளில் நிகழும் சம்பவங்கள் உலகச்செய்தி நிறுவனங்களின் கவனத்தைப்பெற்று வருவதும் அவதானிக்கப்படுகிறது.

நெதர்லாந்து அரசினால் வழங்கப்பட்ட விருதினை நேரில் வந்து பெற்றுற்கொள்ள இந்தியா பரதனுக்கு அனுமதி அளித்திருக்கவில்லை என்பதும் இங்கு கவனிக்கத்தக்கது.