கனடா: 'பெற்னா தமிழ் விழா 2013' - 'போர் தவிர்ப்பு வலையம்' ஆவணப்படம்

[ திங்கட்கிழமை, 01 யூலை 2013, 06:31 GMT ] [ கனடா செய்தியாளர் ]

வட அமெரிக்கத் தமிழ்ச்சங்கப் பேரவையும் கனடியத் தமிழர் பேரவையும் இணைந்து வழங்கும் 26வது தமிழ் விழா எதிர்வரும் யூலை 5ம் நாள் முதல் 7ம் நாள் வரை ரொறன்ரோ சொனி நடுவத்தில் நடைபெற ஏற்பாடாகியுள்ளது. 

பெரும் எதிர்பார்ப்பை ஏற்படுத்தியுள்ள இந் நிகழ்வின் வெள்ளி மாலை நிகழ்வில் சனல் 4 தொலைக்காட்சியின் 'போர் தவிர்ப்பு வலையம்' [NO FIRE ZONE] ஆவணத்திரைப்படம் காண்பிக்கப்படுவதோடு இயக்குனர் திரு கலம் மக்றே அவர்களும் நேரடியாகப் பங்கேற்று உரையாற்றவுள்ளார்.

ஈழத்தில் சிறிலங்கா அரசினால் 2009ல் மேற்கொள்ளப்பட்ட இனப்படுகொலைகளை ஆவணப்படுத்துவதோடு அதை உலகுக்கு ஆதாரங்களோடு எடுத்துரைக்கும் ஆவணப்படமே போர் தவிர்ப்பு வலையம் ஆகும். பல உலகநாடுகளிலும் ஐநா மனித உரிமைகள் ஆணையத்திலும் இப்படம் ஏற்கனவே திரையிடப்பட்டது. சிறி லங்காவிற்கு எதிரான பல நாடுகளின் நிலைப்பாட்டுக்கு பெரிதும் துணை நின்ற ஆவணப்படம். போர்க் குற்றங்களுக்காக சிறி லங்கா அனைத்துலக விசாரணைக்கு உட்படுத்தப்படவேண்டும் என்பதிலும் ஈழத்தமிழருக்கு ஒரு நீதி கிடைக்க வேண்டும் என்பதிலும் மிக உறுதியோடு செயற்படுபவர் இப் படத்தின் இயக்குனரான இங்கிலாந்தைச் சேர்ந்த திரு கலம் மக்றே. 

ஈழத்தமிழரையும் தமிழ்நாட்டுத் தமிழரையும் அவர்கள் புலம்பெயர்ந்த தேசமொன்றில் இணைக்கும் பாலமாய் அமையும் பெற்னா தமிழ் விழாவில் அனைத்துத் தரப்பினருக்கும் ஏற்றவகையில் இயல் இசை நாடக நிகழ்வுகள் ஏற்பாடு செய்யப்பட்டுள்ளன.

சிறப்பு நிகழ்வுகளாக நடனக் கலைஞர் பிரேம் கோபாலின் நடனம், தமிழ்த் தேசியக் கூட்டமைப்பின் தலைவர் இரா. சம்பந்தனின் சிறப்புரை என்பனவும் இடம்பெறுகின்றன. 

புலம்பெயர்ந்து வாழும் தமிழருக்கு பெருமை சேர்க்கும் வகையில் அமையும் இந்நிகழ்வுகளில் கனடா மற்றும் அமெரிக்காவில் இருந்து 3500ம் அதிகமான தமிழர்கள் பங்கேற்க இருக்கின்றனர்.

http://www.puthinappalakai.com/

Edited July 3, 201312 yr by Gari