அகதி அந்தஸ்து வழங்க தைரியமாக முன்வந்த நாடுகளுக்கு நன்றி! : ஸ்னோவ்டன்

அமெரிக்காவினால் அச்சுறுத்தலுக்கு உள்ளான நிலையில் தற்சமயம் ரஷ்ய விமான நிலையமொன்றில் அடைக்கலம் புகுந்துள்ள அமெரிக்க முன்னாள் புலனாய்வு தொழில்நுட்பவியலாளர் எட்வார்ட் ஸ்னோவ்டன் முதன்முறையாக பொதுச் சந்திப்பு நிகழ்வொன்றில் கலந்து கொண்டார்.

முன்னதாக 21 நாடுகளிடம் அகதி அந்தஸ்து கோரியிருந்த நிலையில் அவருக்கு வெனிசுலா, ரஷ்யா, பிலிவியா நிகாரகுவா, எகுவடோர் ஆகிய நாடுகள் அகதி அந்தஸ்து வழங்க முன்வந்திருந்தன. 

இந்நிலையில் சர்வதேச மனித உரிமைகள் அமைப்பின் பிரதிநிதிகளை சந்திக்க விரும்பம் கொண்டிருப்பதாக கூறி ஸ்னோடன் அழைப்பு விடுத்திருந்தார். இதையடுத்து  சர்வதேச மன்னிப்பு சபை, சர்வதேச மனித உரிமைகள் கவுன்சில், ஐ.நா மனித உரிமைகள் ஆணையகம், டிரான்ஸ்பிரன்ஸி இண்டர்நேஷனல், சர்வதேச ஊழல் கண்காணிப்பு நிலையம் ஆகியவற்றின் பிரதிநிதிகள் இன்று மொஸ்கோ விமான நிலையம் விரைந்தனர். அவர்களுடனான மூடிய கதவுக் கூட்டத்தில் கலந்து கொண்ட ஸ்னோவ்டன், ரஷ்யாவின் புகழ்பெற்ற வழக்கறிஞர் ஜென்ஸி செஸ்னிக்கையும் சந்தித்தார். 

இந்நிலையில் தனக்கு அகதி அந்தஸ்து வழங்க தைரியமாக முன்வந்த அனைத்து நாடுகளுக்கு நன்றி கூறிய ஸ்னோவ்டன், அந்நாடுகளின் அழைப்பை மனப்பூர்வமாக ஏற்றுக்கொள்வதாகவும் விரைவில் தென் அமெரிக்க நாடொன்றில் அகதி அந்தஸ்து பெற இருப்பதாகவும் தெரிவித்தார். மேலும் தனக்கு அகதி அந்தஸ்து வழங்க முன்வந்த நாடுகளின் அரச பிரதிநிதிகளையும், அந்நாட்டு மக்களையும் சந்திகக்வுள்ளதாகவும் தெரிவித்தார் 

எனினும் தற்சமயம் ரஷ்யாவில் மீண்டும் அகதி அந்தஸ்து கோரியுள்ள ஸ்னோவ்டன், ரஷ்யா தனது அகதி அந்தஸ்து கோரிக்கையை ஏற்றிருப்பதாகவும் தெரிவித்துள்ளார். தென் அமெரிக்க நாடொன்றுக்கே செல்ல விருப்பம் கொண்டிருந்தாலும் தற்சமயம் விமானப்போக்குவரத்தில் ஈடுபடுவது அவருக்கு ஆபத்தானதாக முடியும் என்பதால் ரஷ்யாவில் சொற்ப காலத்திற்கு தங்குவதற்காக இவ்வாறு அங்கும் அகதி அந்தஸ்து கோரியிருக்கிறார்.

இதேவேளை ஸ்னோவ்டன் தென் அமெரிக்க நாடொன்றுக்குசெல்ல வேண்டுமாயின் கூடுதலாக தனியார் ஜெட் விமானம் ஒன்றையே அவர் வாடகைக்கு அமர்த்த வேண்டும் என்கின்றனர் அரசியல் அவதானிகள். ஏனெனில்,  தென் அமெரிக்க நாடொன்றுக்கு செல்வதாயின், அதுவும் அமெரிக்க விமானப்பாதையை தவிர்த்துச்செல்வதென்றால் கிட்டத்தட்ட 7,000 கி.மீ தூரம் சுற்றிச்செல்ல வேண்டும். ஸ்னோவ்டன் பொதுப்பயணிகள் விமானத்தில் செல்வதாயின் கியூபா மாத்திரமே அவருக்கு பாதுகாப்பான தரையிறங்கல் வசதியை செய்து கொடுக்கும். எனினும் கியூபாவுக்கு செல்வதென்றாலும் அமெரிக்காவுக்கு சொந்தமான விமானப்பாதையை கடந்தே செல்ல வேண்டும். அப்படி செல்லும் போது அமெரிக்கா திடீரென அவ்விமானத்தை அவசரமாக தரையிறக்க கூறுமாயின் குறித்த விமான நிறுவனம் அக்கட்டளையை தவிர்க்க முடியாது.

அமெரிக்கா என்று மட்டுமிலாது, அமெரிக்காவுக்கு ஆதரவான நாடுகளுக்கு மேலாக ஸ்னோவ்டனின் பயணிகள் விமானம் பறந்தாலும் இதே நிலை தான். இதற்கு சிறந்த உதாரணமாக அண்மையில் ஸ்னோவ்டன் மறைந்திருப்பதாக கூறி பொலிவிய அதிபர் சென்ற விமானம் ஐரோப்பாவில் தரையிறங்கவோ, பறக்கவோ தடைவிதிக்கப்பட்டது நல்ல சான்று. 

இதனால் எப்படியும் தனியார் விமானமொன்றையே ஸ்னோவ்டன் வாடகைக்கு அமர்த்த வேண்டும். ஆனால் அதிலும் சிக்கல் இருக்கிறது. கிட்டத்தட்ட 200,000 அமெரிக்க டாலர்கள் இதற்கு செலவாகும். ஸ்னோவ்டனுக்கு அகதி அந்தஸ்து வழங்க முன்வந்த எந்தவொரு நாடுகளும் இதுவரை அவரது பயண செலவுகளை பொறுப்பேற்பதாக அறிவிக்கவில்லை.  இதனால் விக்கிலீக்ஸ் நிறுவனம் அல்லது எதுவும் தனியார் நிதியுதவிகளையே ஸ்னோவ்டன் நாடவேண்டி வரும் என்கிறது அத்தகவல். 

http://www.4tamilmedia.com/newses/world/15563-2013-07-12-16-43-08