'தாயகம் கடந்த தமிழ்' : தமிழ்நாட்டில் ஓர் அனைத்துலக கருத்தரங்கம்

'தாயகம் கடந்த தமிழ்' எனத் தலைப்பிடப்பட்ட அனைத்துலக கருத்தரங்கம் ஒன்றை 'தமிழ் கலாசாரத்திற்கான மையம்' தமிழ்நாட்டில் ஒழுங்குபடுத்தியுள்ளது. இந்தக் கருத்தரங்கானது ஜனவரி 20-22 வரை இடம்பெறவுள்ளது. இதில் முதன்மையான தமிழ் எழுத்தாளர்கள் மற்றும் புலமையாளர்கள் பங்கேற்கின்றனர். தாயகம் கடந்த தமிழ் என்கின்ற இக்கருத்தரங்கில் உலகெங்கும் வாழும் 35 வரையான வல்லுனர்கள் பங்குபற்றுவுள்ளதாக தமிழ் கலாசாரத்திற்கான மையத்தின் நிறுவனரான ஜி.பழனிசுவாமி தெரிவித்துள்ளார். 

மலேசியாவைச் சேர்ந்த ஆர்.கார்த்திகேசு, கனடாவைச் சேர்ந்த சேரன், அ.முத்துலிங்கம், பிரான்சைச் சேர்ந்த நாகரத்னம் கிருஸ்ணா, அவுஸ்திரேலியாவைச் சேர்ந்த எஸ்.பொன்னுத்துரை, மலேசியாவைச் சேர்ந்த சண்முக சிவா மற்றும் முத்து நெடுமாறன், ஜேர்மனியைச் சேர்ந்த உள்றிச் நிக்கோலஸ், சீனாவைச் சேர்ந்த கலைமகள், சிங்கப்பூரைச் சேர்ந்த சீதாலக்சுமி மற்றும் அழகையா பாண்டியன் போன்ற வல்லுனர்கள் இந்தக் கருத்தரங்கில் கலந்து கொள்ளவுள்ளதாக அனைத்துலக கருத்தரங்கின் ஒருங்கிணைப்பாளரான மூத்த ஊடகவியலாளர் மாலன் தெரிவித்துள்ளார். 

இலக்கியம், ஊடகம், தொழினுட்பம், கல்வி போன்ற நான்கு துறைகள் சார்ந்த மூன்று அமர்வுகளும், அடுத்த தலைமுறையினருக்கு தமிழைக் கொண்டு செல்ல வேண்டியதன் முக்கியத்துவம் தொடர்பாக நான்கு அமர்வுகளுமாக மொத்தம் ஏழு அமர்வுகள் இடம்பெறவுள்ளது. 

இந்தக் கருத்தரங்கில் 12 நாடுகளைச் சேர்ந்த எழுத்தாளர்கள், புத்திமான்கள் மற்றும வல்லுனர்கள் ஆகியோர் கலந்துகொண்டு தமது அனுபவங்களைப் பகிர்ந்து கொள்ளவுள்ளதாக இந்த மையத்தின் காப்பாளர்களில் ஒருவரான சிற்பி பாலசுப்ரமணியம் தெரிவித்துள்ளார். 

இது போன்ற பல்வேறு கருத்தரங்குகளை ஏற்கனவே தமிழ் கலாசாரத்திற்கான மையம் ஒழுங்குபடுத்தியுள்ளதாகவும் பாலசுப்ரமணியம் தெரிவித்தார். கொங்கு பிராந்தியத்தைச் சேர்ந்த தமிழ் எழுத்தாளர்களை மையப்படுத்தி பல்வேறு நிகழ்வுகளை தமது மையம் ஒழுங்குபடுத்தியுள்ளதாக பாலசுப்ரமணியம் மேலும் தெரிவித்தார். 

இவ்வாறான கலந்துரையாடல்கள் மூலம் அமெரிக்க இலக்கியம், ஆபிரிக்க இலக்கியம் போன்று தமிழ் இலக்கியத்திற்கான புதிய பிரிவுகள் அறிமுகப்படுத்தப்பட முடியும் என திரு.மாலன் தெரிவித்துள்ளார். புலம்பெயர் வாழ் தமிழ் மக்கள் பலர் தாம் தமது சொந்த நாடான சிறிலங்காவில் சந்தித்த பல்வேறு பிரச்சினைகள் தமது அனுபவங்கள் தொடர்பாக பகிர்ந்து கொள்வதென்பது உண்மையாக உள்ள அதேவேளையில், புலம்பெயர் தமிழ் இலக்கியமானது சிறிலங்காவில் உள்ளவர்களால் ஆதிக்கம் செலுத்தப்படுகின்றது என்பது பிழையான கருத்து எனவும் ஊடகவியலாளர் மாலன் குறிப்பிட்டுள்ளார். 

அவுஸ்திரேலியா, சுவிற்சர்லாந்து, கனடா, அமெரிக்கா, மலேசியா, சிங்கப்பூர் போன்ற பல்வேறு நாடுகளில் வாழும் மக்களால் வெளியிடப்படும் வெளியீடுகள் போன்றன புலம்பெயர் தமிழ் இலக்கியத்திற்குள் உள்ளடங்குகின்றன. புலம்பெயர் தமிழ் மக்களின் அனுபவங்கள் மற்றும் பணிகள் போன்றன மற்றையவர்களை விட வேறுபட்டதாக உள்ளன. இந்தக் கருத்தரங்கில் பெண்ணிய இலக்கியம், பின்நவீன இலக்கிய போன்ற பல்வேறு இலக்கியங்கள் தொடர்பாக ஆராயப்படலாம் என 
மாலன் மேலும் தெரிவித்தார். 

தமிழ்நாட்டுக்கு அப்பால் எழுத்தாளர்களின் பணிகள் கொண்டு செல்லப்படுவதுடன், உலகெங்கும் வாழ்வோர் அனைத்து வெளியீடுகளையும் வாசிப்பதற்கு மின்பதிப்பு மிகவும் சிறந்த வழியாக இருக்கும் எனவும் இதற்கான ஆக்கபூர்வமான முயற்சிகள் மேற்கொள்ளப்பட வேண்டும் எனவும் மாலன் தெரிவித்தார். இவ்வாறான முயற்சிகளுக்கு அரசாங்கத்தின் ஆதரவு கிடைப்பதை தான் வரவேற்பதாகவும் மாலன் குறிப்பிட்டார்.

http://www.puthinappalakai.com/view.php?20140121109820