அவனுக்கு இடுப்பின் கீழ் உணர்வற்று போனது 2009 இறுதி யுத்தத்தின் போது. ஒரு போராளியாய் தனது கடைசி நாட்களை களத்தில் செலவளித்த போதில் காலம் முழுவதும் மற்றவர்களுக்கு பாரமாகிவிடுவேனென்று கனவிலும் நினைத்திருக்கவில்லை. 

 

இறுதியாய் இராணுவத்திடம் சரணடைந்தவர்களுடன் அவனும் சரணடைந்தான். தடுப்பு மருத்துவமனையென்று 2011வரையும் அங்குமிங்கும் அலைவு. 2012இல் அவர்களை பராமரித்த மருத்துவமனையும் எல்லோரையும் வீடுகளுக்கு அனுப்பியது. அப்போதுதான் தனது அடுத்த கட்டத்தின் பயங்கரத்தை உணரத் தொடங்கினான். 

ஊனமில்லாது சுகதேகியாக இருந்திருப்பின் அக்காக்களுக்கும் அவன் இராசகுமாரனாக இருந்திருப்பான். ஆனால் நாட்டுக்காக போனவன் ஊனமாகி வீடு திரும்பிய போது யாரும் அவனை விரும்பியேற்கவில்லை. அன்பை எதிர்பார்த்து போன அக்காக்கள் கூட இடையில் அவனை தம்மால் தொடர்ந்து பராமரிக்க முடியாதென்று ஒதுக்கிவிட்டார்கள். 

 

படுக்கைப்புண்ணின் அவஸ்தை சரியான மருந்துகள் இல்லாது வீட்டில் அருவெருப்பு மிக்கவனாகினான். புலத்திலிருந்து ஒரு குடும்பம் அவனுக்கான உதவிகளை சிலகாலம் வழங்கிக் கொண்டிருந்தது. அவர்களது உதவியில் சில காலம் நிம்மதியாகத்தானிருந்தான். கடந்த ஒருவருடமாக குறித்த குடும்பத்தினரும் தனிப்பட்ட வேலையிழப்பால் அவனுக்கு தொடர்ந்து உதவ முடியாத நிலமையில் கைவிட்டுவிட்டார்கள்.

 

இந்தக் கால இடைவெளியில் படுக்கைப்புண் கூடி இரு கால்களும் கழற்றப்பட்டு பாதி உருவமாகிவிட்டான். யுத்தகாலத்தின் பின்னர் தொடர்பற்றுப்போயிருந்த காதலி திரும்பி வந்தாள். திருமணம் செய்து கொள்கிறேன் என்றாள். வந்தவளும் கைவிட்டு இப்போது அன்றாட உணவு தொடக்கம் மருத்துவத்திற்கும் அவனது இயலாமை துயராகவே தொடர்கிறது.

 

இந்தப்போராளிக்கு மாதம் 5ஆயிரம் ரூபாய் உதவினாலே அவனால் ஓரளவு வாழ முடியும். மாதாந்த உதவியே கட்டாயம் வழங்க வேண்டிய ஊனமுற்ற போராளி இவன். முடிந்தவர்கள் உதவுங்கள். நீங்களே நேரடியான தொடர்பையும் பேணுவதோடு அவனுக்கான உதவியையும் வழங்கினால் போதும். உதவுவோருக்கான கண்காணிப்பு பயன் போன்றவற்றை நாங்கள் செய்து தருவோம். 

உதவுவதற்கு:-

Telephone: Shanthy - +49 (0)6781 70723 /Mobile – 0049 1628037418

nesakkaram@gmail.com
Skype – Shanthyramesh

www.nesakkaram.org

 

நேசக்கரம்

முகவரி:
Nesakkaram e.V
Hauptstr – 210
55743 Idar-Oberstein
Germany

Shanthy Germany – 0049 6781 70723
Skype ID – Shanthyramesh
Vereinsregister:
AZ- VR 20302
Amtsgericht 55543 Bad Kreuznach
Finanzamt Idar-Oberstein,Steuer-Nr. 09/665/1338/8

 

இந்தப் போராளிக்கு ஒருவர் உதவ முன்வந்துள்ளார். இச்செய்தியை முகநூலில் தங்கள் நண்பர்களுக்கும் பகிர்ந்த அனைவருக்கும் நன்றிகள்.

இந்த முகம் தெரியாமல் உதவும் உறவிற்கு மிக்க நன்றி.

இப்போராளிக்கு முகம் அறியாத உறவு ஒருவர் ஏப்றல் மாதம் 3மாதங்களுக்கு உரிய உதவியை அனுப்பியிருந்தார். அவ்வுதவி ஆனிமாதம் வரைக்குமானதாக குறித்த போராளி பெற்றுக் கொண்டார். உதவிய உறவுக்கு 2மின்னஞ்சல் அனுப்பினேன் பதில் எதுவும் வரவில்லை. சிலவேளை இங்கு வாசிக்கக்கூடுமென இங்கு அந்தப்போராளியின் கடிதத்தை பகிர்கிறேன். அடுத்த உதவி கிடைக்குமா இல்லையா என்பதனை குறித்து உறவு இச்செய்தியை பார்த்தால் அறியத்தருமாறு வேண்டுகிறேன். காரணம் அந்தப்போராளியின் நிலமை மாதாந்த உதவி கட்டாயம் செய்யப்பட வேண்டியுள்ளது.

குறித்த போராளியால் சுயமாக எழுத முடியாது. சகோதரி எழுதிக்கொடுத்த கடிதத்தில் தனது ஒப்பமிட்டு அனுப்பியுள்ளார்.

 

குறித்த உறவிற்கு எற்கனவே உதவிய உறவு அடுத்த 3மாதங்களுக்கான உதவியை வழங்க முன்வந்துள்ளார். உதவும் உறவே உங்களுக்கு நன்றிகள்.