ஜேர்மனியின் இராணுவ மனநிலையும், துவண்டு போன பிரேசிலும்…!

உலகம் அதிர்ச்சியில் உறைந்து போயிருக்கிறது. ஆம், அப்படித்தான் சொல்ல வேண்டியிருக்கிறது. காற்பந்தாட்டத்தின் ஜாம்பவான், தொடர்ச்சியாக நட்சத்திரங்களை உருவாக்கிக் கொண்டிருந்த பிரேசிலின் மிகமோசமான தோல்வி, அந்நாட்டு ரசிகர்களை மாத்திரமல்ல, காற்பந்தாட்டத்தின் அனைத்து ரசிகர்களையும் அதிர்ச்சியடைய வைத்திருக்கிறது. 

ஜேர்மனி அணியினரோ, ரசிகர்களோ கூட இவ்வளவு மோசமான தோல்வியொன்றை பிரேசிலுக்கு பரிசளிப்போம் என்று கனவிலும் நினைத்திருக்க மாட்டார்கள். அவர்களும் கூட தங்களது பெரு வெற்றி தொடர்பில் ஆச்சரியத்துடனேயே இருப்பார்கள்.

மனோதிடம் அல்லது ஆன்மபலம் சிறிதாக அடிபடுகின்ற புள்ளி எவ்வளவு மோசமான விளைவுகளை ஏற்படுத்தும் என்பதற்கு நேற்றைய பிரேசில் அணியே சாட்சி. 5 தடவை உலகக் கோப்பையை வெற்றி கொண்டவர்கள் என்கிற பழைய வரலாறுகளோ, நட்சத்திரங்களினால் சூழப்பட்ட அணி என்பதோ ஆன்மபலம் அடிபடும் புள்ளியில் வேலைக்கு ஆகாது. அதைத்தான் ஜேர்மனிக்கு எதிரான முதல் அரையிறுதிப் போட்டி ஆரம்பித்த 10 நிமிடங்களின் பின் பிரேசில் வெளிப்படுத்தியது.

ஜேர்மனியின் ஆட்டம் இராணுவ மனநிலையை ஒத்ததாக மட்டுமே இருந்தது. பல நேரங்களில் அதீத ஆன்மபலத்துடன் இலகுவாக பிரேசில் அணியை கையாண்டது. கோலொன்றை இலகுவாக அடித்துவிடலாம் என்ற சந்தர்ப்பம் இருந்த தருணங்களிலும் கூட அதை இன்னமும் இலகுவாக்கி ஒருங்கிணைந்து ஆடி கோலடித்தார்கள். முல்லர், க்லோஸ் என்று நட்சத்திரங்கள் இருந்தாலும், ஆட்டம் முழுவதும் தனித்த வீரர்களில் தங்கியிருக்காமல் கூட்டாட்டத்தில் கவனம் செலுத்தினார்கள்.

நேற்றைய ஆட்டத்தையொத்த ஆட்டத்தை இறுதிப் போட்டியில் ஜேர்மனி வெளிப்படுத்தினால் அவர்கள் தான் இம்முறை உலகக் கோப்பைக்கு சொந்தக்காரர்கள் என்பதில் சந்தேகம் இல்லை. போட்டியில் 48 வீதமான அளவிலேயே பந்தை தன்னுடைய கட்டுப்பாட்டில் ஜேர்மனி வைத்திருந்தது. ஆனால், வைத்திருந்த அந்த தருணங்களில் அவர்களின் ஆட்டம் எதிரணியை சிந்திக்கவே விடவில்லை.

பிரேசில், அணித்தலைவர் தியாகோ சில்வா மற்றும் நட்சத்திரவீரர் நெய்மர் இல்லை என்றதும் ஆட்டம் காண ஆரம்பித்தது. பிரேசின் போன்ற அணியொன்று தன்னுடைய ஆன்மபலத்தை ஒரிரு வீரர்கள் இல்லையென்றால் இவ்வளவுக்கு இழக்குமா என்பது ஆச்சரியமாக இருக்கிறது. 52 வீதமான நேரத்தில் பந்தினை தன்னுடைய கட்டுப்பாட்டில் வைத்திருந்த பிரேசில் கோல் அடிப்பது தொடர்பில் குழப்பமான மனநிலையையே வெளிப்படுத்தியது. பந்தை பரிமாறுவது தொடர்பில் கவனம் செலுத்தவில்லை. ஒட்டுமொத்தமாக கலைந்த மனநிலையோடு ஆடினார்கள்.

ஜேர்மனி முதல் கோலை அடித்ததும், பிரேசில் வீரர்களின் கண்களிலும், கால்களிலும் வெளிப்படையாகவே பதற்றம் தெரிய ஆரம்பித்தது. அதனை இலகுவாக தன் பக்கம் திருப்பிக் கொண்ட ஜேர்மனி ஒவ்வொரு கோலையும் நேர்த்தியாக அடித்துக் கொண்டிருந்தது. கூட்டு விளையாட்டில் தனித்த வீரரொருவர் அணியொன்றின் ஆன்மபலமாக உருமாறுவதன் மோசமான வெளிப்பாடு இது. பல நேரங்களில் வீரரொருவரின் தனி ஆளுமை வெற்றிகளைப் பெற்றுத் தரலாம். ஆனால், அது, கூட்டிணைப்புக்கு முன்னால் அவ்வளவு பலன்களை விளைவிக்காது.

நேற்றைய ஆட்டம் ஒட்டுமொத்தமாக வெளிப்படுத்தியது அதையே தான். ஜேர்மனி இராணுவ மனநிலையோடு கூட்டிணைந்து அடித்து ஆடியது. ஈவு இரக்கமெல்லாம் அவர்களிடத்தில் இருக்கவில்லை. அது தேவையும் இல்லை. ஆனால், பிரேசில் தன்னுடைய ஆட்டத்தின் ஆன்மபலத்தை இழந்து கழிவிரக்கத்தின் விளிம்பில் நின்று ஆடியது.

தேசத்தின் பெருமிதமாக போட்டிகளை நடத்திக் கொண்டிருந்த பிரேசில், கடந்த 90 ஆண்டுகளில் வெற்ற மிக மோசமான தோல்வி இது. 7:1 என்ற ரீதியில் தோற்பது காற்பந்தாட்ட ஜாம்பவான் ஒன்றின் வரலாற்றில் கரும்புள்ளிகளினால் குறிக்கப்படும். அதை, நேற்று பிரேசில் பதிவு செய்து கொண்டது.

- 4தமிழ்மீடியாவுக்காக புருஜோத்தமன் தங்கமயில்

Edited July 10, 201411 yr by பெருமாள்