வடமாகாணத்திற்கு வெளியே பொருளாதார மையத்தை நகர்த்த நாங்கள் இடமளிக்கப்போவதில்லை என்று வடக்கு முதலமைச்சர் அமைச்சர் மனோகணேசனிடம் வலியுறுத்தினார்.

யாழ்.குடாநாட்டுக்கு நேற்றைய தினம் விஜயம் மேற்கொண்டிருந்த தேசிய கலந்துரையாடல்கள் அமைச்சரும், ஜனநாயக மக்கள் முன்னணியின் தலைவருமான மனோகணேசன் வடமாகாண முதலமைச்சர் சீ.வி.விக்னேஸ்வரனை அவருடைய இல்லத்தில் சந்தித்து கலந்துரையாடினார்.

குறித்த சந்திப்புக் குறித்து ஊடகங்களுக்குக் கருத்து தெரிவித்த முதலமைச்சர்,

மனோகணேசன் என்னுடைய மிக நெருங்கிய நண்பர், அவருடைய தந்தையாரையும் எனக்கு நன்றாக தெரியும். மனோகணேசன் என்னை அரசியல் வாழ்க்கைக்கு இழுத்து வந்தவர். அதனாலேயே நான் இவ்வளவு கஸ்டங்களை சந்தித்துக் கொண்டிருக்கிறேன். அந்தவகையில் அவர் என்னை சந்திக்க வந்தமை மிக மகிழ்ச்சியான விடயம். 

எங்களுடைய சந்திப்பின்போது பொருளாதார மையம் தொடர்பாக பேசியிருக்கிறோம். அது தொடர்பாக நாங்கள் நடவடிக்கை எடுக்கிறோம். எந்தவொரு கட்டத்திலும் வடமாகாணத்திற்கு வெளியே அதனைக் கொண்டு செல்வதற்கு நாங்கள் இடமளிக்கப்போவதில்லை என்று அமைச்சர் மனோவிடம் எடுத்துரைத்ததாகவும் அவர் தெரிவித்தார்.

இது குறித்து அமைச்சர் மனோகணேசன் தெரிவிக்கும்போது,

முதலமைச்சரும் தாமும் மிக நெருங்கிய நண்பர்கள் எனவும், அந்தவகையில் சினேகிதபூர்வமாகவும், சமகால அரசியல் நிலமைகள் தொடர்பாகவும் பொருளாதார மையம் வவுனியாவில் அமைவது தொடர்பாகவும் பேசியிருக்கிறோம். எனவே அந்த விடயத்தில் வடமாகாண சபை உரிய நடவடிக்கை எடுத்து வவுனியா நகருக்கு அண்மையில் பொருத்தமான காணியை தெரிந்து கொடுக்கும் எனக் கூறியிருப்பதாகவும் அவர் தெரிவித்தார்.

http://onlineuthayan.com/news/jaffna/NW5pdDJaekJQVEk9