யுத்தக்குற்ற விசாரணையில் சர்வதேச நீதிபதிகள் இடம்பெறார்- அமைச்சர் மனோவும் தெரிவிப்பு

யுத்தக்குற்றங்கள் தொடர்பிலான விசாரணைகளில் சர்வதேச நீதிபதிகளின் பங்கேற்பு இருக்கப்போவது இல்லையென அரசாங்கம் மீண்டும் வலியுறுத்தியுள்ளது.

 

கொழும்பில் நேற்று நடைபெற்ற நிகழ்வொன்றில் உரையாற்றிய தேசிய கலந்துரையாடல்கள், சகவாழ்வு மற்றும் அரச கரும மொழிகள் அமைச்சர் மனோ கணேசன், யுத்தக்குற்ற விசாரணைகளில்  அரசாங்கத்தின் தீர்மானமே இறுதியானது எனக் குறிப்பிட்டுள்ளார்.

“புகையிரத சேவைகள் விஸ்தரிப்பின் ஊடாக அரச மொழிக் கொள்கையும் உடன் பயணிக்க வேண்டும். அனைத்து புகையிரத நிலையங்களிலும் மும்மொழிகளும் அறிந்த பணியாளர்கள் நியமிக்கப்பட வேண்டும். அதுவே எனது எதிர்ப்பார்ப்பு.

 

புகையிரத நிலையங்களில் இரண்டு மொழிகளிலும் அறிவித்தல் அவசியம். சில இடங்களில் உள்ள அறிவித்தல் பலகைகளில் சிங்கள மொழி பெரிதாகவும், தமிழ் மொழி சிறிதாகவும் காணப்படுகின்றது. அதனை வாசிக்க தமிழ் மக்களுக்கு கண்ணாடியை வழங்க வேண்டும். இல்லாவிடின் வாசிக்க முடியாது. பல இடங்களில் தமிழ் பிழையாக எழுதப்பட்டிருக்கின்றது. சிங்களமும் தமிழும் நிர்வாக மொழிகள் அதுவே யாப்பிலும் காணப்படுகின்றது.

 

அரச மொழிக் கொள்கை தொடர்பில் விவாதத்திற்கு இடமில்லை. அதனை நடைமுறைப்படுத்த வேண்டிய தேவை மாத்திரமே உள்ளது. நல்லிணக்கம் மற்றும் சகவாழ்வு தொடர்பிலான நடவடிக்கைகளை முன்னெடுக்கையில் சர்வதேசத்தின் அழுத்தம் காணப்படுவதாக சிலர் கூறுகின்றனர். அது தவறு. யாருடைய அழுத்தத்திற்கும் அடிபணிய வேண்டிய தேவையில்லை. பான் கீ மூன், மோடி யார் வேண்டுமோ நாட்டிற்கு வருகைதர முடியும். எனினும் எமக்கு வேண்டியதையே நாம் செய்வோம்.

 

யுத்தக்குற்ற விசாரணைகளில் சர்வதேச நீதிபதிகளின் பங்களிப்பு இருக்காது என ஜனாதிபதி மற்றும் பிரதமர் ஆகியோர் கூறியுள்ளனர். எனினும் ஒருசிலர் இல்லை என வாதிட்டனர். தற்போது உண்மை தெரியவந்துள்ளது. சர்வதேச நீதிபதிகளின் பங்களிப்பு இல்லை என்பது தெளிவாகியுள்ளது. எமது பிரச்சினைகளை நாமே தீர்த்துக்கொள்வோம். எங்களுக்குத் தேவையான வகையில் நாம் முடிவெடுப்போம். இதுவே அரசாங்கத்தின் கொள்கை. அனைத்து மக்களுக்கும் இடையில் நல்லிணக்கம் ஏற்பட வேண்டும். அதுவே எனது அமைச்சின் கொள்கை.“எனத் தெரிவித்தார்.