டைட்டானிக் ரோஸ்!

ஆதனூர் சோழன்

முப்பது வயதுக்குள் நான்கு முறை ஆஸ்கார் விருதுக்காகப் பரிந்துரைக்கப்பட்ட ஒரே நடிகை இவர்தான்.

சிறந்த துணை நடிகை விருதுக்கு இருமுறை. சிறந்த நடிகைக்கு இருமுறை. ஆனால் இதுவரை விருது பெறவில்லை என்பது வேறு விஷயம்.

கொழுமொழுவென்று இருப்பார். குழந்தை போல முகம் இருக்கும். கண்கள் பளிங்குபோல பளபளக்கும். அதில் ஒரு கவிதை இருக்கும். பார்ப்பவர் மனதில் பச்செக்கென்று ஒட்டிக்கொள்ள இவை போதாதா?

கேத்தி வின்ஸ்லெட்...!

ஆமாம். "டைட்டானிக்' படத்தின் கதாநாயகிதான். அந்தப் படத்தில் இவரது பெயர் ரோஸ். படம் வெளியானபோது உலகமே இவரை ஒரு ரோஜா பூவைப்போல பார்த்து மயங்கியது. இளம்பெண்கள் தங்களை கேத்தியுடன் ஒப்பிட்டு ரசிக்கத் துவங்கினர்.

1975 ம் ஆண்டு அக்டோபர் 5 ம் தேதி லண்டனில் பிறந்தவர் கேத்தி. நடிப்பு இவரது மரபணுவில் கலந்தது. அப்பாவும் அம்மாவும் நாடக நடிகர்கள். தாத்தா தியேட்டர் உரிமையாளர். மாமாவும் லண்டனில் தியேட்டர் வைத்திருந்தார்.

கேத்தியின் குடும்பப் பின்னணி ரொம்பவும் வசதியானது. 11 வயதிலேயே குழந்தைகளுக்கான அறிவியல் தொலைக்காட்சித் தொடரில் நடித்தார். நடிப்பு வகுப்புக்கு சென்றார். நிறைய விளம்பரப்படங்கள், தொடர்களில் நடித்தார்.

17 வயதில் வந்தது, நல்லதோர் சினிமா வாய்ப்பு. "ஹேவன்லி கிரீச்சர்ஸ்' என்ற படத்தின் கதையை கேத்தியிடம் கொடுத்தார்கள். அதைப்படித்த கேத்தி தனக்கு பிடித்த வேடம் கிடைத்ததாக மகிழ்ந்தார். 1994 ல் வெளிவந்த அந்தப்படம் நன்றாக போகவில்லை. ஆனால் கேத்தியின் நடிப்பை அனைவரும் பாராட்டினார்கள்.

அதன்பிறகு கலைப்படங்களில் கேத்தி ஆர்வம் காட்டினார். "சென்ஸ் அண்டு சென்சிபிலிட்டி' என்ற வரலாற்று படத்தில் அவர் நடித்தார். கேத்தி நன்றாக பாடுவார் என்பதால் அந்தப் படத்தில் பாடவும் வாய்ப்பு கிடைத்தது. அந்தப் படத்தில் கேத்தியின் நடிப்பு அற்புதமாக இருந்தது. சிறந்த துணை நடிகைக்கான ஆஸ்கார் விருதுக்காக அவர் பரிந்துரைக்கப்பட்டார்.

சரித்திர கால படங்களில் நடிப்பதை கேத்தி மிகவும் விரும்பினார்.

96 ம் ஆண்டு ஜுடே (யாக்கோபின் 12 பையன்களில் ஒருவன்) என்ற படத்திலும் ஷேக்ஸ்பியரின் ஹாம்லெட் படத்திலும் அவர் நடித்தார். அந்தப் படங்கள் அவரது திறமையை வெளிப்படுத்தின. அழகுப்பதுமையாக அவர் இருந்தாலும் நடிப்பை வெளிப்படுத்தும் படங்களையே தேர்வு செய்து நடித்தார்.

நிர்வாண காட்சிகளில் நடிப்பதை அவர் விருப்பத்துடன் செய்தார்.

"எனதுஅழகை வெளிப்படுத்தும் வகையில் நடிப்பதை நான் தவறாக நினைக்கவில்லை. முழுமனதுடன் ரசித்து செய்கிறேன்'என்றார்.

கேத்தி நடித்த படமா அதில் நிர்வாண காட்சி ஒன்று இருக்கும். "டைட்டானிக்' படத்தில் பார்த்திருப்பீர்களே!

டைட்டானிக் படத்தில் கப்பல் முழுவதும் கேத்தி வளைய வரும் காட்சிகளில் இளமை துள்ளும். கதாநாயகனுடன் அவரது சந்தோஷம் நம்மையும் பரவசப்படுத்தும். கப்பல் உடைந்த பிறகு பனிஉறைந்த கடலில், மிதவையில் நடுங்கியபடி கதாநாயகனுடன் பேசும் காட்சிகளில் நம்மையும் கலங்கவைப்பார்.

அந்தப் படத்தில் நடித்ததற்காகவும் சிறந்த துணை நடிகைக்கான ஆஸ்கார் விருதுக்கு அவரது பெயர் பரிந்துரைக்கப்பட்டது. 11 ஆஸ்கார் விருதுகளைப் பெற்றது அந்தப்படம். ஆனால் அவருக்கு விருது கிடைக்கவில்லை. ஆனால் 19 வயதில் இருமுறை ஆஸ்கார் விருதுக்கு பரிந்துரைக்கப்பட்ட ஒரே நடிகை என்ற பெருமை கிடைத்தது.

தான் விரும்பிய கதைகளில் நடிக்க வேண்டும் என்ற ஆசையில் ஆஸ்கார் விருது பெற்றிருக்க வேண்டிய கதாபாத்திரத்தைக் கூட கேத்தி இழந்திருக்கிறார். ஆம். "ஷேக்ஸ்பியர் இன் லவ்' என்ற படத்தில் கதாநாயகியாக நடிக்கும் வாய்ப்பு வந்தது. ஆனால் "ஹைடஸ் ஹின்கி' என்ற படத்தில் இஷ்டப்பட்டு நடிக்க ஒப்புக்கொண்டார்.

இதில் சுவாரஸ்யம் என்னவென்றால், "ஷேக்ஸ்பியர் இன் லவ்' படத்தில் நடித்ததற்காக வின்னெத் பால்ட்ரோ என்ற நடிகைக்கு சிறந்த நடிகைக்கான ஆஸ்கார் விருது கிடைத்தது. அவர் கேத்திக்கு நன்றி தெரிவித்தார்.

அடுத்த ஆண்டும் இதுபோல இன்னொரு இழப்பை கேத்தி சந்தித்தார். "அன்னா தி கிங்' என்ற படத்தில் நடிக்க வந்த வாய்ப்பை தவிர்த்துவிட்டு "ஹோலி ஸ்மோக்' என்ற படத்தில் நடித்தார்.

98 ல் "ஹைடஸ் ஹின்கி' படத்தில் நடித்தபோது செட்டில் சந்தித்த ஜேம்ஸ் என்பவரை கேத்தி திருமணம் செய்தார். அவர்களுக்கு மியா என்ற பெண்குழந்தை பிறந்தது. "மியா' என்றால் இத்தாலி மொழியில் "சுரங்கம்' என்று அர்த்தமாம்.

2001 ல் ஜேம்ûஸ கேத்தி விவாகரத்து செய்தார். பின்னர், 2003 ல் சாம் மென்டஸ் என்ற டைரக்டரை கேத்தி திருமணம் செய்துகொண்டார். இவரும் கேத்தியும் ஒரே மருத்துவமனையில் பிறந்தவர்களாம்.

இடையில் 2002 ல் "ஐரிஷ்' என்ற படத்தில் துணைநடிகை பாத்திரத்தில் நடித்த கேத்தி, சிறந்த நடிகைக்கான ஆஸ்கார் விருதுக்கு பரிந்துரை செய்யப்பட்டார். பின்னர் 2004 ம் ஆண்டு "எட்டர்னல் சன்ஷைன் ஆப் தி ஸ்பாட்லெஸ் மைன்ட்' என்றபடத்தில் நடித்ததற்காக சிறந்த நடிகைக்கான ஆஸ்கார் விருதுக்குப் பரிந்துரைக்கப்பட்டார்.

29 வயதுக்குள் 4 முறை ஆஸ்கார் விருதுக்கு பரிந்துரைக்கப்பட்ட ஒரே நடிகை என்ற பெருமை கிடைத்தது.

கேத்திக்கு ஆஸ்கார் விருது கட்டாயம் கிடைக்கும். "லிட்டில் சில்ட்ரென்' என்ற படத்தில் நடித்ததற்காக மீண்டும் அவர் சிறந்த நடிகைக்கான ஆஸ்கார் விருதுக்கு பரிந்துரைக்கப்பட்டுள்ளார்.

சொந்தக்குரலில் பாடும் மிகச்சில ஹாலிவுட் நடிகைகளில் கேத்தியும் ஒருவர். தான் நடித்த 5 படங்களில் இவர் பாடியுள்ளார்.

குழந்தைகளுக்கான மிக நல்ல வார்த்தைகள் என்ற ஆல்பம் வெளியிட்டதற்காக 2000 ம் ஆண்டில் கிரம்மி விருது பெற்றார்.

தன்னை ஒரு இங்கிலாந்து பெண் என்று சொல்லிக் கொள்வதையே கேத்தி விரும்பினார். அவரது கணவருக்கும் அவருக்கும் ஷூட்டிங் இருக்கும்போது லாஸ் ஏஞ்சலீஸ் செல்வார்கள். வேலை முடிந்ததும் லண்டன் திரும்பிவிடுவார்கள்.

இருவருக்கும் ஜோ என்ற பையன் இருக்கிறான்.

டைட்டானிக் படத்தின் முதல்காட்சி விஐபிக்களுக்குத் திரையிடப்பட்டது. அதற்கு கேத்தி

வரவில்லை. தனது சின்னவயது நண்பன் ஸ்டீபனின் இறுதி நிகழ்ச்சிக்கு சென்றுவிட்டார்.

நுட்பமான உணர்ச்சிகளுக்கு எளிதில் ஆளாகிவிடுவார். அளவான விகிதத்தில் கலந்த அழகியான இவருக்கு நீளமான பாதம்.

டைட்டானிக் படம் எற்கெனவே வந்தபோது அதில் நடித்த குளோரியா ஸ்டூவர்ட் என்ற நடிகையும் சிறந்த நடிகைக்கான ஆஸ்கார் விருதுக்கு பரிந்துரைக்கப்பட்டார். அதுபோல ஐரிஷ் படம் முன்பு வெளிவந்தபோது அதில் நடித்த ஜுடி டென்ச் என்ற நடிகையும் ஆஸ்கார் விருதுக்கு பரிந்துரைக்கப்பட்டார்.

இரண்டு படங்களிலும் அந்த நடிகைகள் நடித்த கதாபாத்திரங்களில்தான் கேத்தி நடித்திருந்தார். விருதுக்கும் பரிந்துரைக்கப்பட்டார் என்பது ஆஸ்காரில் தனித்துவம் பெற்ற சரித்திரம்.

http://www.dinamani.com

நல்ல அழகும் நடிக்கவும் தெரிந்தவள், வெறும் கவர்ஸ்ஸியை மட்டுமே மூலதனமாக கொண்ட நம் சினிமா நடிகைகள் இவளை பார்த்து முன்னேறவேண்டும்.