அபிவிருத்தி விசேட ஏற்பாடுகள் சட்டமூலம் வடக்கு உள்ளிட்ட மூன்று மாகாண சபைகளில் நிராகரிப்பு

அபிவிருத்தி விசேட ஏற்பாடுகள் சட்டமூலம் வடக்கு உள்ளிட்ட மூன்று மாகாண சபைகளில் நிராகரிப்பு

வடமத்திய,ஊவா மாகாணங்களில் தோற்கடிக்கப்பட்டது சட்டமூலம்

(ரொபட் அன்டனி, நியூட்டன்)

அபிவிருத்தி விசேட ஏற்பாடுகள் சட்ட மூலமானது வட மாகாண சபையில் ஏகமனதாக நிராகரிக்கப்பட்டுள்ளதுடன் வடமத்திய மாகாணம் மற்றும் ஊவாமாகாணங்களில் தோற்கடிக்கப்பட் டுள்ளன.       

நேற்றையதினம் வடமாகாண சபையில் இந்த சட்ட மூலம் நிராகரிக்கப்பட்ட நிலையில் வட மத்திய மாகாண சபையில் தோற் கடிக்கப்பட்டது.அத்துடன் ஊவாமாகாண சபையில் நேற்று முன் தினம் இந்த சட்ட மூலம்  தோற்கடிக் கப்பட்டது.     

வட மாகாணம் வடமாகாண சபை நேற்று கூடியபோது குறித்த சட்ட மூலம் தொடர்பில் முதலமைச்சர் விக்கினேஸ்வரன் உரை  யாற்றியிருந்தார். அதன்போது இந்த சட்டமூலத்திற்கு ஆதரவு வழங்க முடியாதென முதலமைச்சர் தெரிவித்த தையடுத்து அனைத்து உறுப்பினர்களும்  ஏகமனதான சட்ட மூலத்தை எதிர்த்தனர். 

வட மத்திய மாகாணம் வட மத்திய மாகாண சபையில் இந்த சட்டமூலத்துக்கு ஆதரவாக 9 பேரும் எதிராக 19 பேரும் வாக்களித்த நிலையில் 9 மேலதிக வாக்குகளினால் இந்த சட்டமூலம் தோற்கடிக்கப்பட்டது.   

 வட மத்திய மாகாண சபையின் ஆளும் கட்சியினர் இந்த சட்டமூலத்துக்கு எதிராகவும் ஐக்கிய தேசிய கட்சியினர் ஆதரவாகவும் அபிவிருத்தி விசேட ஏற்பாடுகள் சட்டமூலத்துக்கு வாக்களித்திருந்தனர். ஊவா மாகாணம்  ஊவா மாகாண சபையின் அனுமதியைப் பெற்றுக்கொள்வதற்கு, மத்திய அரசினால் அனுப்பப்பட்ட அபிவிருத்தி விசேட ஏற்பாடுகள் சட்டமூலம், நான்கு மேலதிக வாக்குகளினால் ஊவா மாகாண சபையில் நேற்று முன்தினம் தோல்வியுற்றது.  

சட்டமூலத்திற்கு ஆதரவாக ஒன்பது வாக்குகளும், எதிராக பதின்மூன்று வாக்குகளும் கிடைக்கப்பெற்றன. இதனடிப்படையில், நான்கு மேலதிக வாக்குகளினால் , சட்டமூலம் தோல்வியுற்றது.

இவ்வாக்கெடுப்பில், மாகாண முதலமைச்சர் நடு நிலைமை வகித்ததுடன், மாகாண அமைச்சர் உபாலி சமரவீர ஆளும்கட்சி தரப்பில் இருந்துகொண்டும் சட்டமூலத்திற்கு ஆதரவாக வாக்களித்தார். அதே வேளை சபையின் ஐ.தே.க. உறுப்பினர் திஸ்ஸ குட்டியாராய்ச்சி வாக்கெடுப்பில் கலந்துகொள்ளவில்லை

விரைவில் பாராளுமன்றத்தில் நிறைவேற்றப்படவுள்ள இந்த சட்டமூலம் மாகாண சபைகளின் அனுமதியை பெற்றுக்கொள்ளும் நோக்கில் மாகாண சபைகளுக்கு அனுப்பப்பட்டுள்ளன. இநநிலையில் மூன்று மாகாண சபைகளில் இந்த சட்டமூலம் தோற்கடிக்கப்பட்டுள்ளது.

எவ்வாறெனினும் இந்த அபிவிருத்தி விசேட ஏற்பாடுகள் சட்டமூலம் தொடர்பில் பிரதமர் ரணில் விக்ரமசிங்க நேற்று மாகாண சபை முதலமைச்சர்களை சந்தித்து பேச்சுவார்த்தை நடத்தியிருந்தார். எனினும் இந்த சந்திப்பில் வட மாகாண சபை முதலமைச்சர் கலந்துகொண்டிருக்கவில்லை.

இந்த அபிவிருத்தி விசேட ஏற்பாடுகள் சட்டமூலமானது எதிர்வரும் 2017 ஆம் ஆண்டு பெப்ரவரி மாதம் பாராளுமன்றத்தில் சமர்ப்பிக்கப்படும் என்று சர்வதேச வர்த்தக கூட்டுறவு அமைச்சர் மலிக் சமரவிக்ரம தெரிவித்திருந்தமை குறிப்பிடத்தக்கது.