அமைச்சர்கள், அதிமுக நிர்வாகி களுடன் கட்சியின் துணைப் பொதுச் செயலாளர் டி.டி.வி.தினகரன் நேற்று ஆலோசனை நடத்தினார்.

அதிமுக பொதுச்செயலாளராக உள்ள சசிகலாவுக்கு சொத்துக் குவிப்பு வழக்கில், கடந்த பிப்ரவரி 14-ம் தேதி தண்டனை உறுதி செய்யப்பட்டது. இதையடுத்து அவர் பெங்களூரு சிறையில் அடைக்கப்பட்டார். சிறைக்கு செல்லும் முன்பு, டி.டி.வி.தின கரனை துணைப் பொதுச் செயலா ளராக நியமித்தார். தினகரன் நியமனத்துக்கு கட்சியில் அதிருப்தி நிலவுவதாக கூறப்படுகிறது. ஜெயலலிதாவின் அண்ணன் மகன் தீபக், தினகரனை ஏற்க மாட்டோம் என கூறியுள்ளார்.

இந்நிலையில், ஓபிஎஸ் மற்றும் ஜெ.தீபா அணிகளால் ஏற்பட்டுள்ள நெருக்கடிகளை சமாளிப்பது, கட்சியை தக்க வைப்பது தொடர் பாக அமைச்சர்கள், நிர்வாகி களுடன் தினகரன் ஆலோசனை நடத்தி வருகிறார்.

இதற்கிடையே, பொதுச் செய லாளராக சசிகலா நியமிக்கப் பட்டதை எதிர்த்து தேர்தல் ஆணை யத்திடம் ஓ.பன்னீர்செல்வம் தரப்பினர் மனு அளித்திருந்தனர். அதற்கு பதிலளிக்குமாறு சசி கலாவுக்கு தேர்தல் ஆணையம் நோட்டீஸ் அனுப்பியிருந்தது. இது தொடர்பாக வழக்கறிஞர்களுடன் தினகரன் ஆலோசனை நடத்தி வந்தார். நேற்று முன்தினம் மாவட்டச் செயலாளர்களைச் சந்திப்பதாக இருந்தது. அதன்பின் அந்நிகழ்ச்சி ரத்து செய்யப்பட்டது.

இந்நிலையில், பெங்களூரு சிறையில் அடைக்கப்பட்டுள்ள சசிகலாவை அமைச்சர்கள் கே.ஏ.செங்கோட்டையன், திண்டுக்கல் சீனிவாசன், செல்லூர் ராஜூ, ஆர்.காமராஜ் ஆகியோர் நேற்று காலை சந்தித்துப் பேசினர். அப்போது, தேர்தல் ஆணையத்துக்கு அளிக்க வேண்டிய பதிலை சசிகலாவிடம் அளித்து ஒப்புதல் பெற்றனர்.

அதன்பின், பதில் கடிதம் தேர்தல் ஆணையத்துக்கு அனுப்பப்பட்டது. அடுத்த ஒரு வாரத்துக்குள் தேர்தல் ஆணையம் தனது முடிவை அறிவிக்கும் என்றும் அதற்கு முன்பாக மீண்டும் இரு தரப்பையும் அழைத்து விசாரிக்க வாய்ப்புள்ளதாகவும் தேர்தல் துறை வட்டாரங்கள் தெரிவித்தன.

இந்நிலையில், நேற்று காலை 11 மணிக்கு அதிமுக தலைமை அலுவலகத்துக்கு வந்த டி.டி.வி. தினகரன், விஜயபாஸ்கர் உள்ளிட்ட அமைச்சர்கள், முக்கிய நிர்வாகிகளுடன் அடுத்தகட்ட நடவடிக்கைகள் தொடர்பாக ஆலோசனை நடத்தினார். ஓபிஎஸ் அணிக்கு மாறும் நிலையில் உள்ள நிர்வாகிகளை அழைத்து, அவர்களைச் சமாதானப்படுத்தும் முயற்சியிலும் தினகரன் தரப்பினர் இறங்கியுள்ளனர். இந்தப் பணியில் மாவட்டச் செயலாளர்கள் ஈடு பட்டுள்ளனர்.