தினகரன் ஆதரவாளர் வெற்றிவேல் வெளியிட்ட 20 விநாடி காட்சிகளை முன்வைத்துக் கொந்தளித்துக் கொண்டிருக்கிறார்கள் மன்னார்குடி வாரிசுகள். ' சத்தியத்தை மீறி வீடியோவை வெளியிட்டுவிட்டதால் தினகரன்மீது கடும் கோபத்தில் இருக்கிறார் சசிகலா. சிறையில் சசிகலாவை சந்திக்க விரும்பிய தினகரனுக்கும் விவேக் ஜெயராமனுக்கும் அனுமதி கிடைக்கவில்லை' என்கிறார் கார்டன் நிர்வாகி ஒருவர். 

அப்போலோ மருத்துவமனையில் ஜெயலலிதா சிகிச்சை பெற்ற வீடியோக்களில் ஒன்றை நேற்று முன்தினம் வெளியிட்டார் வெற்றிவேல். இந்த வீடியோவில், ஜெயலலிதா பழச்சாறு அருந்திக்கொண்டு தொலைக்காட்சியைப் பார்ப்பது போன்ற காட்சிகள் இடம்பெற்றிருந்தன. 'ஆர்.கே.நகருக்குத் தேர்தல் நடக்கும் சூழலில், வெற்றியைக் குறிவைத்து இந்த வீடியோவை வெளியிட்டுவிட்டார் தினகரன். அம்மாவின் புகழைக் கெடுப்பது போன்ற இந்த வீடியோக்களை வெளியிட்டது ஏன்?' எனக் கொதித்தனர் இளவரசி குடும்பத்தினர். 'டி.டி.வி உடன் இருக்கும் வெற்றிவேலின் கீழ்த்தரமான செயல்' என்றும் விமர்சித்தார் இளவரசியின் மகள் கிருஷ்ணபிரியா. இன்று காலை விகடனுக்குக் கொடுத்த பேட்டியிலும், 'அம்மாவின் (ஜெயலலிதா) மரணம் சம்பந்தமாக விசாரணை கமிஷனோ, வேறு எந்தவிதமான விசாரணையோ அமைக்க வேண்டும் என்று பேசிவருகிறார்கள், அதனால் வீடியோவை ஒரு காப்பி எடுத்து தினகரனிடம் கொடுத்துவிடுங்கள். உரிய நேரத்தில் தேவைப்பட்டாலும் படலாம்' என்று சின்னம்மா எங்களிடம் கூறினார். எனவே, அந்த வீடியோவை ஒரு காப்பி எடுத்து தினகரனிடம் கொடுத்தார் விவேக்' எனப் பேட்டியளித்தார் கிருஷ்ணபிரியா. 

"கிருஷ்ணபிரியா கொந்தளிப்பதை தினகரனால் ஏற்றுக்கொள்ளவே முடியவில்லை. ' வீடியோவைக் கொடுத்த விவேக் அமைதியாக இருக்கிறார். இவர் ஏன் தேவையில்லாமல் கொதிக்கிறார்?' என ஆதரவாளர்களிடம் பேசியிருக்கிறார் தினகரன். வீடியோவை வைத்தே தன்னை வீழ்த்தும் முயற்சிகள் நடக்கலாம் என்பதை உணர்ந்து, பெங்களூரு சிறையில் இருக்கும் சசிகலாவின் கவனத்துக்கு சில தகவல்களைக் கொண்டு செல்ல விரும்பினார். தன்னுடைய ஆதரவாளரான புகழேந்தியை அனுப்பி வைத்தார். ஆனால், ' சந்திக்க விரும்பவில்லை' என ஒற்றை வார்த்தையில் முடித்துக்கொண்டார் சசிகலா.

இதையடுத்து, சசிகலாவை நேரில் சந்தித்து விளக்கம் கொடுக்கத் தயாரானார் தினகரன். அவருக்கும் அனுமதி கிடைக்கவில்லை. கடந்த இரண்டு நாள்களாக சசிகலாவை சந்திக்க ஏழு பேர் மனு கொடுத்துள்ளனர். ' நான் யாரையும் சந்திக்க விரும்பவில்லை. ஆர்.கே.நகரில் ஜெயித்தாலும் என்னை வந்து பார்க்க வேண்டாம். தினகரனைப் பார்க்க நான் விரும்பவில்லை. மற்றவர்களையும் சந்திக்க விரும்பவில்லை' என உறுதியாகக் கூறிவிட்டார். சசிகலாவின் உறுதியை மன்னார்குடி உறவுகள் யாரும் எதிர்பார்க்கவில்லை" என விவரித்த கார்டன் நிர்வாகி ஒருவர், 

"பெங்களூரு சிறையில் 15 நாள்களுக்கு ஒருமுறைதான் சசிகலாவை சந்திக்க முடியும். இதற்கு இடையில் சிறைக் கண்காணிப்பாளர் நினைத்தால், சிறப்பு அனுமதியைக் கொடுக்க முடியும். அதன் அடிப்படையில் சசிகலாவிடம் பேசுவதற்கு அனுமதி கோரியுள்ளனர் விவேக் தரப்பினர். ஆனால், தினகரன், விவேக் என இரு தரப்பையும் சந்திக்க மறுத்துவிட்டார் சசிகலா. 'வீடியோவை வெளியிட மாட்டோம் என சத்தியம் செய்து கொடுத்துவிட்டு, அதை அப்பட்டமாக மீறிவிட்டார்கள்' என்ற கோபத்தில் இருக்கிறார் சசிகலா. இந்தக் கோபத்தைத்தான் கிருஷ்ணபிரியா வேறு வடிவில் வெளிப்படுத்துகிறார். ஜெயலலிதா சிகிச்சை வீடியோ வெளியானதில் ஏற்பட்ட உண்மையான ஆதங்கம்தான் அது. அந்த வீடியோவைக் கொடுக்கும்போது கிருஷ்ணபிரியாவும் அருகில்தான் இருந்தார். அதனால்தான் தினகரனுக்கு எதிராக நேரடியாக மோதத் தொடங்கியிருக்கிறார். இந்த மோதலில் வெற்றிவேல்மீது நடவடிக்கை எடுக்க வேண்டிய சூழல்கள் உருவாகலாம். அதையும் தினகரன் செய்யத்தான் போகிறார். தன்னைக் காப்பாற்றிக் கொள்ள அவர் யாரையும் பலி கொடுப்பார்" என்றார் விரிவாக. 

' ஆர்.கே.நகரில் பெறக் கூடிய வாக்குகள் மூலம் சசிகலாவை சமாளித்துவிடலாம்' என நினைத்தார் தினகரன். ஆனால், அவரால் இளவரசி குடும்பத்தையே சமாளிக்க முடியாமல் போய்விட்டதுதான் மிகப் பெரிய சோகம்.