பேஸ்புக் தொடர்பில் பிரதமரின் அதிரடி நடவடிக்கை.!

 

 

பேஸ்புக் உள்ளிட்ட சமூக வலைதளங்களை பயன்படுத்துவது தொடர்பில் புதிய சட்டம் ஒன்றை இன்னும் சில வாரங்களில் கொண்டுவரவுள்ளதாக பிரதமர் ரணில் விக்கிரமசிங்க சற்றுமுன்னர் தெரிவித்தார்.

ஊடகங்களுக்கு விதிக்கப்பட்டுள்ள கட்டுபாடுகள் மற்றும் விதிமுறைகள் பேஸ்புக் உள்ளிடட சமூக  வலைத்தளங்களுக்கும் ஏற்புடையதாக அமையும் வகையில் நடைமுறைப்படுத்த  அரசாங்கம் அவதானம் செலுத்தி வருவதாக பிரதமர் மேலும் தெரிவித்தார்.

கண்டியில் நடைபெற்ற வன்முறை சம்பங்களை அடுத்து, பேஸ்புக் உள்ளிட்ட சமூக வலைத்தளங்களுக்கு விதிக்கப்பட்ட தடை தொடர்ந்தும் நீடிக்கிறது.

இந்நிலையிலேயே பிரதமர் மேற்கண்டவாறு தெரிவித்தார்.

http://www.virakesari.lk/article/31614

சமூக ஊடகங்களைக் கட்டுப்படுத்த புதிய சட்டம்

 

சமூக வலைத்தளங்களின் மூலம், இனவெறுப்பு கருத்துக்களை வெளியிடவதைக் கட்டுப்படுத்துவதற்கான புதிய சட்டங்கள் விரைவில் நடைமுறைக்குக் கொண்டு வரப்படும் என்று சிறிலங்கா பிரதமர் ரணில் விக்கிரமசிங்க நேற்று தெரிவித்துள்ளார்.

இசிபத்தான கல்லூரியில் நேற்று நடந்த நிகழ்வு ஒன்றில் உரையாற்றிய அவர்,

‘ஏனைய நாடுகளில் நடைமுறையில் உள்ள இத்தகைய சட்டங்கள் குறித்து சட்டமா அதிபர் திணைக்களம் ஆராய்ந்து வருகிறது.

சமூக ஊடகங்களில் இனவெறுப்பு கருத்துக்களை வெளியிடுவதைக் கட்டுப்படுத்த  உலகில் பல நாடுகள் சட்டங்களை இயற்றியுள்ளன.

இனவெறுப்பைத் தூண்டுவதை தடுக்கும் சட்டங்கள் பிரித்தானியாவில் உள்ளன. கென்யாவிலும் அத்தகைய சட்டங்கள் உள்ளன. ஜேர்மனி சமூக ஊடகங்களைக் கட்டுப்படுத்தும் சட்டங்களைக் கொண்டிருக்கிறது.

இதுபோன்ற சட்டம் ஒன்றை பிலிப்பைன்ஸ் அரசு வரைந்து செனட் சபையில் சமர்ப்பித்துள்ளது.

சமூக ஊடகங்கள் தொடர்பாக ஏனைய நாடுகள் எத்தகைய சட்டங்களைக் கொண்டிருக்கின்றன என்று ஆராயுமாறு வெளிவிவகார அமைச்சிடம் பணித்துள்ளேன். அதனை நாம் பின்பற்றலாம்.

அதேவேளை, சமூக ஊடகங்களை தடை செய்யும் அல்லது கட்டுப்படுத்தும் எந்த நகர்வையும் அரசாங்கம் மேற்கொள்ளவில்லை.” என்றும் அவர் தெரிவித்துள்ளார்.

http://www.puthinappalakai.net/2018/03/15/news/29809

முகநூல் மீதான தடையை நீக்க சிறிலங்கா நிபந்தனை

 

வட்ஸ் அப் சமூக வலைத்தள செயலி மீது விதிக்கப்பட்டிருந்த தடை நேற்று நள்ளிரவு நீக்கப்பட்டுள்ள அதேவேளை, முகநூல் மீதான தடையை நீக்குவது குறித்து இன்று முக்கிய பேச்சுக்கள் நடத்தப்படவுள்ளன.

கடந்த 7ஆம் நாள் தொடக்கம் சிறிலங்காவில் வட்அப், வைபர், முகநூல் உள்ளிட்ட சமூகவலைத்தளங்கள் தடை செய்யப்பட்டன.

இதற்கு கடுமையான எதிர்ப்புகள் எழுந்த நிலையில், நேற்றுமுன்தினம் நள்ளிரவு வைபர் மீதான தடையும், நேற்று நள்ளிரவு வட்ஸ்அப் மீதான தடையும் நீக்கப்பட்டது.

இந்தநிலையில், முகநூல் நிறுவனத்தின் உயர் அதிகாரிகள் சிலர் நேற்று கொழும்பு வந்துள்ளனர். இவர்கள் இன்று சிறிலங்கா அதிபரின் செயலரும், தொலைத்தொடர்பு ஒழுங்கமைப்பு ஆணைக்குழுவின் தலைவருமான ஒஸ்ரின் பெர்னான்டோவுடன்,  முக்கிய பேச்சுக்களை நடத்தவுள்ளனர்.

முகநூலில் இனவெறுப்பை தூண்டும் கருத்துக்கள் இடம்பெறுவதை தடுப்பதற்கான நடவடிக்கைகள் எடுப்பது குறித்து இந்தச் சந்திப்பின் போது கலந்துரையாடப்படவுள்ளது.

இந்தப் பேச்சுக்களில் தேவையான கட்டுப்பாடுகளை நடைமுறைப்படுத்த இணங்கினால், குறிப்பிட்ட சமூக வலைத்தளங்கள் மீதான தடைகள் நீக்கப்படும் என்று ஒஸ்ரின் பெர்னான்டோ தெரிவித்துள்ளார்.

http://www.puthinappalakai.net/2018/03/15/news/29811