யாழில் படைச்சிப்பாய் பலி! படையினரின் துப்பாக்கிச் சூட்டில் பொதுமகன் காயம்

யாழப்பாணத்தில் படைச்சிப்பாய் ஒருவர் கைக்குண்டுத் தாக்குதலுக்கு இலக்காகி பலியாகியுள்ளதாக குடிசார் தகவல்கள் தெரிவிக்கின்றன. கைக்குண்டுத் தாக்குதல் இன்று காலை 10.45 மணியளவில் யாழ் நாவலர் வீதியருகே இடம்பெற்றது.

படையினர் கொல்லப்பட்டதை அடுத்து படையினர் பொதுமக்கள் மீது கண்மூடித்தனமான துப்பாக்கிப் பிரயோகத்தை மேற்கொண்டுள்ளனர். இதன்போது பொதுமகன் ஒருவர் காயமடைந்துள்ளார்.

காயமடைந்தவர் திருநெல்வேலியைச் சேர்ந்த 21 அகவையுடைய பாசுப்பிரமணியம் கஜரூபன் என அடையாளம் காணப்பட்டுள்ளார். காயமடைந்தவர் யாழ் மருந்தவமனையில் அனுமதிக்கப்பட்டுள்ளார்.

http://www.pathivu.com/

யாழ். தற்கொலைத் தாக்குதலில் இருவர் பலி

இலங்கையின் வடக்கே யாழ்ப்பாணத்தில் இன்று இடம்பெற்ற தற்கொலைத் தாக்குதல் ஒன்றில் தற்கொலையாளியும், இலங்கைப் படைச் சிப்பாய் ஒருவரும் கொல்லப்பட்டதாக இலங்கை இராணுவத்தினர் கூறியுள்ளனர்.

இன்று காலை 10.30 மணியளவில் இடம்பெற்ற இந்தத் தாக்குதல் சம்பவத்தில் இராணுவ சிப்பாய் ஒருவர் கொல்லப்பட்டதாகவும், மூன்று இராணுவத்தினர் காயமடைந்ததாகவும், தேசிய பாதுகாப்புக்கான ஊடகத் தகவல் மையம் தெரிவித்துள்ளது.

இந்தச் சம்பவத்தைத் தொடர்ந்து படையினர் திருப்பிச் சுட்டதில் சிவிலியன் ஒருவர் காயமடைந்ததாக யாழ் தகவல்கள் தெரிவிக்கின்றன.

யாழ்ப்பாணம் நாவலர் வீதியில் ரயில்வே கடவைக்கு அருகில் உள்ள இராணுவச் சோதனைச்சாவடி ஒன்றில் மினி பஸ் ஒன்றை இராணுவத்தினர் சோதனையிட்டுக் கொண்டிருந்த வேளை, அவ்வழியால் கால்நடையாக வந்த இளைஞன் ஒருவரே இந்த தற்கொலைக் குண்டினை வெடிக்கச் செய்ததாக இராணுவம் தெரிவித்துள்ளது.

இதன்போது அருகில் நின்றிருந்த இராணுவச் சிப்பாய் கொல்லப்பட்டதாகவும், 3 இராணுவத்தினர் காயமடைந்ததாகவும், தெரிவிக்கப்பட்டுள்ளது.

மினி பஸ் வண்டியின் கண்ணாடிகளும் குண்டுச் சிதறல்கள் தாக்கியதில் உடைந்து சேதமடைந்ததாகத் தெரிவிக்கப்படுகின்றது.

சம்பவம் இடம்பெற்ற இடத்திற்குச் சென்ற யாழ் மாவட்ட நீதவான் ஆர்.ரீ.விக்னராஜா தற்கொலைக் கொலையாளி என சந்தேகிக்கப்படுபவரின் சிதறிக்கிடந்த உடல் பாகங்களைப் பார்வையிட்டு விசாரணை நடத்தியுள்ளார்.

சிதறிய உடலில் இருந்து கண்டெடுக்கப்பட்ட தேசிய அடையாள அட்டையிலிருந்து கொல்லப்பட்டவர் யாழ்ப்பாணத்தைச் சேர்ந்த 20 வயதுடைய சோதிலிங்கம் நிரஞ்சன் என அடையாளம் காணப்பட்டுள்ளதாக பொலிசார் தெரிவித்துள்ளனர்.

இந்தச் சம்பவம் தொடர்பாக யாழ் பொலிசார் மேலதிக விசாரணைகளை மேற்கொண்டுள்ளனர்.

http://www.bbc.co.uk/tamil/news/story/2004...ntaffairs.shtml