எமக்கு உதவிகள் வேண்டாம்! – விரக்தியில் துனீசிய புகலிடக் கோரிக்கையாளர்கள்

துனீசியாவிலிருந்து மத்திய தரைக்கடலின் ஊடாக மரப் படகொன்றில் சட்டவிரோதமாகப் பயணித்த புகலிடக் கோரிக்கையாளர், தங்களுக்கு மீட்பு உதவிகள் தேவையில்லையென மீட்புப் பணியாளர்களிடம் கூறியுள்ளனர்.

ஆபிரிக்க நாடுகளிலிருந்து மத்திய தரைக்கடலின் ஊடாகப் பயணிக்கும் புகலிடக் கோரிக்கையாளர்களை மீட்கும் மனிதாபிமானப் பணியினை மேற்கொள்ளும் பிரான்கோ – ஜேர்மன் அமைப்பின் மீட்புப்படையினர்கள் நேற்று (ஞாயிற்றுக்கிழமை) 9 ஆண்களையும் 2 சிறுவர்களையும் கொண்ட மரப்படகொன்றைக் கண்டுபிடித்துள்ளனர். குறித்த படகிலுள்ளவர்களை மீட்பாளர்களின் கப்பலில் ஏற்ற முயற்சித்த போது குறித்த புகலிடக் கோரிக்கையாளர்கள் தங்களுக்கு மீட்புதவி தேவையில்லையெனக் கூறி தமது பயணத்தைத் தொடர்ந்ததாக அதிகாரிகள் தெரிவித்துள்ளனர்.

குறித்த மரப்படகு இத்தாலிக்குச் சொந்தமான லம்பெடூசா தீவை நோக்கிச் சென்றதாகவும் குறித்த அதிகாரிகள் குறிப்பிட்டுள்ளனர்.

இத்தாலியை நோக்கிச் செல்லும் குறித்த புகலிடக் கோரிக்கையாளர்கள், அந்நாட்டுக் கரையோர அதிகாரிகளினால் மீட்கப்பட்டு மீண்டும் அவர்களது தாய்நாடான துனீசியாவிற்கே அனுப்பப்படுவர் என்பதில் சந்தேகமில்லையென மீட்புக்குழுவின் அதிகாரிகள் சுட்டிக்காட்டியுள்ளனர்.

இதேவேளை, குறித்த அமைப்பின் கப்பலில் கடந்த வாரம் மீட்கப்பட்ட 141 புகலிடக் கோரிக்கையாளர்கள் தங்கியுள்ளதாகவும் அவர்களை தரையிறக்கவுள்ளதாகவும் குறிப்பிட்டுள்ளனர்.

இத்தாலி தனது நேச நாடுகளான ஐரோப்பிய நாடுகளுடன் மேற்கொண்ட தீர்மானங்களைத் தொடர்ந்து புகலிடக் கோரிக்கையாளர்கள் திருப்பியனுப்பப்படுவதுடன் குறித்த அமையத்தின் கப்பலிலுள்ள புகலிடக் கோரிக்கையாளர்களை இத்தாலி நாட்டில் தரையிறக்க அனுமதி மறுக்கப்பட்டதும் குறிப்பிடத்தக்கது.