அயோத்தியில் திரண்ட ஆயிரக்கணக்கான இந்துக்கள் - விஸ்வரூபம் எடுக்கும் ராமர் கோயில் விவகாரம்

இன்று காலை 7 மணி முதலே இந்து அமைப்பினர் அங்கு கூடத் தொடங்கிவிட்டதாக அயோத்தியில் இருந்து பிபிசி செய்தியாளர் நிரஞ்சன் கூறுகிறார்.

அயோத்தி நகர தெருக்களும், அயோத்தியை நோக்கிச் செல்லும் சாலைகள் மற்றும் ரயில் நிலையங்கள் மிகுந்த கூட்ட நெரிசலுடன் காணப்படுகின்றன.

படத்தின் காப்புரிமை Hindustan Times

அயோத்தியில் உள்ள உள்ளூர் செய்தியாளர்கள் அளித்த தகவல்களின்படி, விஷ்வ இந்து பரிஷத் மாநாட்டில் கலந்துகொண்டவர்கள் எண்ணிக்கை சுமார் ஒரு லட்சம்.

இதனிடையே, நரேந்திர மோதி அரசால் அயோத்தியில் ராமர் கோயில் கட்டப்படாவிட்டால், பாரதிய ஜனதா கட்சியால் மீண்டும் ஆட்சிக்கு வரவே முடியாது என பாஜகவின் கூட்டணிக் காட்சிகளில் ஒன்றான சிவசேனையின் தலைவர் உத்தவ் தாக்ரே கூறியுள்ளார்.

"தேர்தல் வரும் சமயங்களில் ராமர்கோயில் கட்டுவது குறித்து பேசுகிறார்கள். ஆனால், அதன்பின் யாரும் கண்டுகொள்வதில்லை. ஆண்டுகள் கடக்கின்றன. தலைமுறைகள் மாறுகின்றன. ராமர் கோயில் மட்டும் கட்டப்படவில்லை, " என்று அயோத்தியில் சுற்றுப்பயணம் மேற்கொண்டுள்ள அவர் செய்தியாளர்களிடம் கூறினார்.

படத்தின் காப்புரிமை SANJAY KANOJIA Image caption அயோத்தில் திரண்டுள்ள ஆயிரக்கணக்கான இந்துக்கள்

ராமர் கோயில் கட்ட அவசர சட்டம் கொண்டு வர வேண்டும் என்று மத்திய அரசை வலியுறுத்திய தாக்ரே, ராமர் கோயில் கட்ட சட்டம் கொண்டுவந்தால், சிவசேனை அதை ஆதரிக்கும் என்று கூறினார்.

அயோத்தி மற்றும் சுற்றியுள்ள பகுதிகளில் உள்ள சுவர்களில் ராமர் போருக்கு செல்வது போல போஸ்டர்கள் ஒட்டப்பட்டுள்ளதாக உள்ளூர் ஊடகங்கள் தெரிவிக்கின்றன.