குவைத், இலங்கையில் இருந்து கடத்திய ரூ.20 லட்சம் தங்கம் பறிமுதல்: இலங்கை பெண் உட்பட 2 பேர் கைது

குவைத் மற்றும் இலங்கையில் இருந்து சென்னைக்கு விமானத்தில் கடத்தி வந்த ₹20.5 லட்சம் மதிப்புள்ள 582 கிராம் தங்கத்தை அதிகாரிகள் பறிமுதல் செய்தனர். குவைத்தில் இருந்து குவைத் ஏர்லைன்ஸ் விமானம் நேற்று அதிகாலை 5 மணிக்கு சென்னை சர்வதேச விமான நிலையத்துக்கு வந்தது. அதில் வந்த பயணிகளை விமான நிலைய சுங்க அதிகாரிகள் சோதனையிட்டனர். அப்போது, ஆந்திர மாநிலத்தை சேர்ந்த நஷீத் அகமது ஷேக் (24) சுற்றுலா பயணியாக ரியாத்துக்கு சென்று விட்டு குவைத் வழியாக சென்னைக்கு வந்தார். அவர் மீது சுங்க அதிகாரிகளுக்கு சந்தேகம் ஏற்பட்டது. இதையடுத்து அவரது உடைமைகளை சோதனையிட்டனர். அவரது உடைமைகளில் எதுவும் இல்லை. ஆனாலும் சந்தேகம் தீராமல் தனி அறைக்கு அழைத்துச்சென்று ஆடைகளை களைந்து சோதனையிட்டனர். எதுவும் இல்லாததால் அவரது நடவடிக்கையில் பெருத்த சந்தேகம் ஏற்பட்டது. எனவே, உடைமைகளை மீண்டும் ஒரு முறை சோதனையிட்டனர்.

அவர் வைத்திருந்த டிராலி பை சூட்கேஸின் கைப்பிடி சற்று வித்தியாசமாக இருந்தது. மரத்திலான அந்த கைப்பிடியை உடைத்துப் பார்த்தனர். அதில் 9 தங்க துண்டுகள் மறைத்து வைக்கப்பட்டிருந்தது. அதன் மொத்த எடை 350 கிராம். சர்வதேச மதிப்பு 12.3 லட்சம். அதை அதிகாரிகள் பறிமுதல் செய்தனர்.தொடர்ந்து, நேற்று அதிகாலை 5.30 மணிக்கு இலங்கையில் இருந்து தனியார் பயணிகள் விமானம் சென்னை வந்தது. அதில் வந்த பயணிகளை சுங்க அதிகாரிகள் சோதனையிட்டனர். அப்போது இலங்கையை சேர்ந்த  நோனா ஷிபாயா (51) என்ற பெண் சுற்றுலா பயணிகள் விசாவில் சென்னை வந்திருந்தார். அவர் மீதும் சந்தேகம் ஏற்பட்டது. விசாரணையில் அவர் முன்னுக்குப்பின் முரணாகப் பேசினார். சோதனையில் உடைமைகளில் எதுவும் இல்லை. அதன் பின்பு பெண் சுங்க அதிகாரிகளை வரவழைத்து தனி அறைக்கு அழைத்துச் சென்று அவரை முழுமையாக சோதித்தனர், அவர் நான்கு தங்க கட்டிகள் மறைத்து வைத்திருந்ததை கண்டுபிடித்தனர். அதன் மொத்த எடை 232 கிராம். அதன் சர்வதேச மதிப்பு ₹8.2 லட்சம். இதையடுத்து அந்த தங்கத்தையும் பறிமுதல் செய்து பெண்ணை கைது செய்தனர். இச்சம்பவம் விமான நிலையத்தில் பெரும் பரபரப்பை ஏற்படுத்தியது.

http://www.dinakaran.com/News_Detail.asp?Nid=508675