ஈஷா மையத்தில் நடைபெற்ற சிவராத்திரிக் கூட்டத்தில் பங்கேற்றவர்கள் குறித்தும் சிறப்பு கவனம்- முதல்வர்

ஈஷா மையத்தில் நடைபெற்ற சிவராத்திரிக் கூட்டத்தில் பங்கேற்றவர்கள் குறித்தும் சிறப்பு கவனம்- முதல்வர்

ஈஷா மையத்தில் நடைபெற்ற சிவராத்திரிக் கூட்டத்தில் பங்கேற்றவர்களுக்கு கொரோனா வைரஸ் அறிகுறி இருந்தால் அவர்களும் பரிசோதனைக்கு உட்படுத்தப்படுவார்கள் என முதலமைச்சர் எடப்பாடி பழனிசாமி தெரிவித்துள்ளார்.

சென்னை சாந்தோம், கலங்கரை விளக்கம் உள்ளிட்ட பகுதிகளில் செயற்பட்டு வரும், அம்மா உணவகங்களுக்கு திடீர் விஜயம் மேற்கொண்ட அவர், அங்கு விற்பனை செய்யப்படும் உணவின் தரம் குறித்து கேட்டறிந்தார்.

தொடர்ந்து செய்தியாளர்களிடம் பேசிய முதலமைச்சர், நலிவுற்ற மக்களுக்காக கொண்டுவரப்பட்ட அம்மா உணவகத் திட்டம் மூலம், நாளொன்றுக்கு நான்கரை இலட்சம் பேர் உணவு அருந்துகின்றனர் எனக் குறிப்பிட்டார்.

மேலும் டெல்லி மாநாட்டில் கலந்துகொண்டவர்கள் நோயின் தாக்கத்தை உணர்ந்து தாங்களாக முன்வந்து தகவல் தெரிவிக்க வேண்டும் என வலியுறுத்திய அவர், ஈஷா சிவராத்திரி கூட்டத்தில் பங்கேற்றவர்களுக்கு அறிகுறி இருந்தால் பரிசோதனை மேற்கொள்ளப்படும் எனக் குறிப்பிட்டார்.

ஒவ்வொரு உயிரும் முக்கியம் எனவும் ஒருவர் கூட பாதித்துவிடக் கூடாது என்பதே அரசின் நோக்கம் எனத் தெரிவித்த முதல்வர், நோயின் தாக்கத்தை உணராமல் சிலர் வெளியே சுற்றுவதாகவும் மருத்துவமனையில் உள்ளவர்கள் துடித்துக் கொண்டிருப்பதைப் பார்த்த பிறகும் 144 தடை உத்தரவை சிலர் அலட்சியம் செய்கிறார்கள் எனவும் குறிப்பிட்டார்.

இதேவேளை, ஊரடங்கால் விவசாயிகள் மேற்கொள்ளும் எந்தப் பணிகளுக்கும் தடையில்லை என்றும் ஏப்ரல் 14இற்குப் பிறகும் ஊரடங்கு நீட்டிக்கப்படுமா என்பதை மத்திய அரசு தான் முடிவு செய்யும் எனவும் கூறினார்.

முன்னதாக சாந்தோமிலுள்ள அம்மா உணவகத்தில் ஆய்வு மேற்கொண்ட முதலமைச்சர், அங்கு விற்பனை செய்யப்படும் உணவை வாங்கிச் சாப்பிட்டதுடன் அங்கு உணவருந்திய மக்களிடம் குறைகளைக் கேட்டறிந்தார்.

அத்துடன், அம்மா உணவக ஊழியர்களிடம் சமூக இடைவெளியைப் பின்பற்றி விற்பனை நடவடிக்கையை முன்னெடுக்கவும் உணவகத்தை சுகாதாரமாகப் பராமரிக்கவும் அறிவுறுத்தியுள்ளார்.

http://athavannews.com/ஈஷா-மையத்தில்-நடைபெற்ற-ச/