கொழும்பில் சிக்கியுள்ள மலையகம், வடக்கு கிழக்கு இளைஞர், யுவதிகள்- ஜனகன் முக்கிய கோரிக்கை!

மலையகத்திலிருந்தும் வடக்கு கிழக்கில் இருந்தும் வந்து, கொழும்பில் தொழில் நிமிர்த்தமாகத் தங்கியிருக்கும் ஆயிரக்கணக்கான இளைஞர், யுவதிகள் நிர்க்கதி நிலையில் இருக்கின்றனர் என ஜனநாயக மக்கள் முன்னணியின் அமைப்புச் செயலாளரும் ஐக்கிய மக்கள் சக்தியின் கொழும்பு மாவட்ட வேட்பாளருமான வி.ஜனகன் தெரிவித்துள்ளார்.

இந்நிலையில், ஊரடங்குச் சட்டம் தொடர்ந்தும் அமுலில் உள்ளமையால், கொழும்பில் தங்கியிருக்கும் இந்த இளைஞர், யுவதிகள் தொடர்ந்தும் பல இன்னல்களைச் சந்தித்து வருகின்ற நிலையில் இவர்களுக்கான உடனடி நிவாரணத்தை வழங்க அரசாங்கம் நடவடிக்கை எடுக்க வேண்டுமென அவர் கேட்டுக்கொண்டுள்ளார்.

இது குறித்து அவர் ஊடகங்களுக்கு அனுப்பிவைத்துள்ள அறிக்கையில், “கொழும்பில் பணி நிமிர்த்தமாகத் தங்கியுள்ள மலையகம் மற்றும் வடக்கு கிழக்கினைச் சேர்ந்த இளைஞர், யுவதிகள் பலர் என்னிடமும், தலைவர் மனோ கணேசனிடமும் தொடர்ந்தும் உதவிகளைக் கேட்டு வருகிறார்கள்.

இந்நிலையில் அவர்களுக்கு ஜனனம் அறக்கட்டளையூடாக சில உதவிகளைச் செய்து வருகின்றோம். ஆனாலும், அவை போதுமானதாக இல்லை.

கொழும்பில் தங்கியுள்ள பல இளைஞர், யுவதிகள் உணவுக்காக் கஷ்டப்படுகின்றனர். அவர்களது உணவுத் தேவையை ஓரளவுதான் எங்களால் பூர்த்திசெய்ய முடிகிறது. நிலைமை நீடிக்குமாக இருந்தால், அந்த இளைஞர், யுவதிகள் பெரும் சிரமங்களை எதிர்நோக்குவர். ஆகையால், இவர்கள் தொடர்பாக அரசாங்கம் உடனடியாக அக்கறையெடுக்க வேண்டும்.

அதுமாத்திரமன்றி, கொரோனா வைரஸ் தொற்று நிலை மூன்றாம் கட்டத்தை அடைந்துள்ளது. இத்தகைய நிலையில் கொழும்பு போன்ற ஆபத்தான வலயத்துக்குள் இந்த இளைஞர், யுவதிகள் சிக்கியிருப்பது ஏற்புடையதல்ல.

எனவேதான், கொழும்பில் நிர்க்கதியாகியிருக்கும் இவர்களை தத்தமது ஊர்களுக்கு, பாதுகாப்பாக அனுப்புவதற்கான நடவடிக்கையைத் துரிதப்படுத்தும் படியும் அரசாங்கத்தைக் கோருகின்றோம்.

ஊர்களுக்குச் செல்லும் சந்தர்ப்பம் அவர்களுக்கு வழங்கப்படுமாக இருந்தால், பாதுகாப்பான முறையில் அனுப்புவதற்கான நடவடிக்கை எடுப்பதோடு, சுய தனிமைப்படுத்தலை உறுதிப்படுத்துவதோடு கண்காணிப்பு நடவடிக்கையையும் மேற்கொள்ள அரசாங்கம் உறுதி பூணவேண்டும்” என ஜனகன் மேலும் தெரிவித்துள்ளார்.

http://athavannews.com/கொழும்பில்-சிக்கியுள்ள-ம/