கொழும்பில் தமிழ் ஊடகவியலாளர் கடத்தல்

[சனிக்கிழமை, 14 யூலை 2007, 09:32 ஈழம்] [கொழும்பு நிருபர்]

கொழும்பில் தமிழ் ஊடகவியலாளர் ஒருவர் கடந்த புதன்கிழமை அதிகாலை கடத்தப்பட்டுள்ளார்.

சுயாதீன ஊடகவியலாளரான சக்கிவேல்பிள்ளை பிரகாஸ் (வயது 29) எனபவர் கடத்தப்பட்டிருப்பதாக சிறிலங்கா காவல்நிலையத்தில் முறைப்பாடு செய்யப்பட்டுள்ளது.

அவர் சிங்கப்பூரை தளமாகக் கொண்டுள்ள ஊடக அமைப்பின் செய்தி முகவர் நிலையத்தின் இலங்கைக்கான ஊடகவியலாளராகவும் படப்பிடிப்பாளராகவும் பணியாற்றியுள்ளார்.

புறக்கோட்டை சிறிலங்கா அதிகாரிகள் தாம் சக்கிவேல்பிள்ளை பிரகாஸை கைதுசெய்யவில்லை என்று தெரிவித்துள்ளனர்.

சக்கிவேல் பிரகாஸ் வெளிநாட்டுக்கு ஆட்களை அனுப்பும் முகவராகவும் தொழிற்பட்டு வந்திருக்கிறார். அண்மையில் தம்மை வந்து சந்திக்குமாறு அவருக்கு சிறிலங்கா இராணுவத்துடன் சேர்ந்தியங்கும் துணை இராணுவக் குழுவினர் அழைப்பு விடுக்கப்பட்டிருந்ததாகவும் ஆனால் அவர் அங்கு செல்லவில்லை என்றும் அதனையடுத்து அவருக்கு கொலை அச்சுறுத்தல் விடுக்கப்பட்டிருந்ததாகவும் கூறப்படுகிறது.

மட்டக்களப்பைச் சேர்ந்த அவர் பணியின் நிமித்தமாக கொழும்பு புறக்கோட்டையில் உள்ள தொடரூந்து நிலையத்துக்கு முன்பாக உள்ள சவுத் ஏசியா விடுதியில் தங்கியிருந்த போது கடந்த புதன்கிழமை அதிகாலை 5 மணியளவில் கடத்தப்பட்டுள்ளார்.

வான் ஒன்றில் வந்த நான்கு பேர் தம்மை காவல்துறையினர் என்று அடையாளப்படுத்தி விசாரணைக்கு அழைத்துச் செல்வதாக கூறி கடத்திச்சென்றுள்ளனர்.

கடத்தப்பட்டு சுமார் இரண்டரை மணித்தியாலங்கள் கழித்து சுமார் 7:30 மணியளவில் தனது நண்பர் ஒருவருக்கு தன்னுடைய கையடக்கத்தொலைபேசி மூலம் சக்கிவேல்பிள்ளை பிரகாஸ் தொலைபேசி அழைப்பை எடுத்திருக்கிறார்.

தன்னை காவல்துறையினர் எனக்கூறிய நால்வர் விசாணைக்காக அழைத்து வந்ததாகவும் தனது கையடக்கத்தொலைபேசியை அவர்கள் பறித்து வைத்திருந்ததாகவும் தற்போது அதனை தன்னிடம் தந்தனர் என்றும் தான் இருக்கும் இடம் எது என்று தெரியவில்லை என்றும் அவர் தனது நண்பரிடம் அவர் தெரிவித்துள்ளார்.

அப்படி தெரிவித்த மறுகணமே தொலைபேசி அழைப்பு துண்டிக்கப்பட்டுள்ளது.

இச்சம்பவம் குறித்து அவரது குடும்பத்தினர் சுதந்திர ஊடக அமைப்பிடம் முறையிட்டுள்ளனர்.

புதினம்

ஐய்யோ மறுபடியும் ஆட்கடத்தல் ஆரம்பிச்சிட்டுதா? இதற்கு முற்றுப்புள்ளியே இல்லையா?