ஈராக்கில் 14 வயது சிறுமி மீது பாலியல் வல்லுறவுஅமெரிக்க படைவீரருக்கு 110 வருடசிறை

ஈராக்கில் 14 வயது சிறுமி மீது பாலியல் வல்லுறவுஅமெரிக்க படைவீரருக்கு 110 வருடசிறை

[07 - August - 2007]

ஈராக்கில் அல்-ஹைடாவுக்கு எதிராக யுத்தத்தில் ஈடுபட்டு உள்ள அமெரிக்க இராணுவ வீரர் ஒருவர் 14 வயது ஈராக்கிய சிறுமியை பாலியல் வல்லுறவுக்குட்படுத்தி அவர் குடும்பத்தினரைக் கொன்ற வழக்கில் அந்த வீரருக்கு 110 ஆண்டு சிறைத் தண்டனை விதித்து இராணுவ நீதிமன்றம் தீர்ப்புக் கூறியுள்ளது.

ஈராக்கில் இராணுவப் பணிக்காக அனுப்பப்பட்டவர் ஜெஸ்சி ஸ்பீல்மன். 22 வயதான அவர் பாலியல் வல்லுறவு , கொலை வழக்குகளில் சிக்கிக் கொண்டார். கடந்த ஆண்டு மார்ச் மாதம் பாக்தாத் நகரில் அபீர் குவாசிம் அல் ஜனாபியாட் என்ற 14 வயது ஈராக்கிய சிறுமியை அவர் 4 இராணுவ வீரர்களுடன் சேர்ந்து பாலியல் வல்லுறவுக்குட்படுத்தினார். பிறகு அந்தச் சிறுமியையும் அவர் குடும்பத்தினரையும் கொன்றார்.

இது தொடர்பாக அவர் மீது இராணுவ நீதிமன்றில் வழக்குத் தொடரப்பட்டது. இந்த வழக்கில் சம்பந்தப்பட்ட 3 பேர் ஏற்கனவே குற்றத்தை ஒப்புக் கொண்டனர். அவர்களுக்கு 5 முதல் 100 ஆண்டு வரை சிறைத் தண்டனை விதிக்கப்பட்டது.

ஸ்பீல்மன் இந்த பாலியல் வல்லுறவு, கொலை சதிக்குத் திட்டமிட்டார் என்பது கண்டுபிடிக்கப்பட்டது. அவரும் இதை ஒப்புக் கொண்டார். இதைத் தொடர்ந்து அவருக்கு இராணுவ நீதிமன்றம் 110 ஆண்டு சிறைத் தண்டனை விதித்தது.

இந்த குற்றத்தில் தொடர்புடைய ஸ்டீவன் கிரீன் ஏற்கனவே இராணுவத்தில் இருந்து விடுவிக்கப்பட்டு விட்டதால் சிவில் நீதிமன்றத்தில் அவர் மீது வழக்குத் தொடரப்பட்டு உள்ளது. அவர்தான் அந்தச் சிறுமியின் பெற்றோரையும் அவர் தங்கையையும் சுட்டுக் கொன்றார். பின்பு கிரீன் அந்தப் பெண்ணை பாலியல் வல்லுறவுக்குட்படுத்தி அவர் உடலில் மண்ணெண்ணெய் ஊற்றி தீ வைத்தார். அதன் மூலம் இந்தக் குற்றத்துக்கான தடயத்தை அழித்து விட்டார்.

மற்ற 3 பேரில் பால் கோர்ட்ஸிக்கு 90 ஆண்டு சிறைத் தண்டனையும் ஜேம்ஸ் பார்க்கருக்கு 100 ஆண்டு சிறைத் தண்டனையும் போக்குவரத்தைக் கண்காணித்த பிரையன் ஹோவர்டுக்கு 5 ஆண்டு சிறைத் தண்டனையும் விதிக்கப்பட்டது.

நன்றி - தினக்குரல்