நாட்டை வங்குராேத்து அடையச்செய்தமை தொடர்பிலான விசாரணையை கோருவது 225 பாராளுமன்ற உறுப்பினரதும் கடமையாகும் - வஜிர அபேவர்த்தன

(எம்.ஆர்.எம்.வசீம், இராஜதுரைஹஷான்)

நாட்டை வங்குராேத்து அடையச்செய்தமை தொடர்பில் முறையான விசாரணை மேற்கொள்ள கோருவது பாராளுமன்றத்தில் இருக்கும் 225 பேரினதும் கடமையாகும் என ஐக்கிய தேசிய கட்சி உறுப்பினர் வஜிர அபேவர்த்தன தெரிவித்தார்.

பாராளுமன்றத்தில் 01 ஆம் திகதி வியாழக்கிழமை இடம்பெற்ற இடைக்கால வரவு செலவுத் திட்டம் மீதான இரண்டாவது நாள் விவாதத்தில் கலந்துகொண்டு உரையாற்றுகையிலேயே இவ்வாறு தெரிவித்தார்.

அவர் அங்கு தொடர்ந்து தெரிவிக்கையில்,

நாட்டை வங்குராேத்து அடையச்செய்திருப்பது பாராளுமன்ற உறுப்பினர்கள் அல்ல. பாராளுமன்றத்துக்கு தெரியாமல் வேறு ஒரு குழுவொன்றினாலே இது மேற்கொள்ளப்பட்டிருக்கின்றது. என்றாலும் தற்போது இந்த குற்றச்சாட்டு பாராளுமன்றம் மீது சுமத்தப்பட்டிருக்கின்றது.

அதனால் இதுதொடர்பில் விசாரணை நடத்தி இதன் உண்மைத்தன்மையை நாட்டுக்கு வெளிப்படுத்த வேண்டும். அதற்காக இதுதொடர்பில் முறையான விசாரணை மேற்கொள்ள கோருவது பாராளுமன்றத்தில் இருக்கும் 225பேரினதும் கடமையாகும் .

அத்துடன் 2021 வரவு செலவு திட்டத்தில் 6.1பில்லியன் ரூபா வெளிநாட்டு கடன் செலுத்தவேண்டி  இருந்தது. அதில் ஒரு தொகை மார்ச் மாதம் செலுத்தப்பட்டது.

ஏப்ரல் மாதம் மேலுமொரு தொகை செலுத்த இருந்தது. ஆனால் கடன் செலுத்த முடியாது என அறிவிக்கப்பட்டது. வெளிநாட்டு கடன் செலுத்துவதில்லை எனநினைத்த பிரகாரம் தீர்மானம் மேற்கொள்ள அரசியலமைப்பின் பிரகாரம் அதிகாரம் இல்லை. பாராளுமன்றத்துக்கு இருக்கும் அதிகாரத்தை முறைகேடாக பயன்படுத்தும்போது 225பேரும் வெட்கப்படவேண்டும். 

அதேபோன்று நிதி தொடர்பான அதிகாரம் பாராளுமன்றத்துக்கே இருக்கின்றது. நாடு வங்குராேத்த நிலைக்கு செல்லும் நிலை ஏற்படும்போது அதுதொடர்பில் அன்று பாராளுமன்றத்துக்கு அறிவித்திருந்தால்.

அன்று பாராளுமன்றம் அதுதொடர்பில் நடவடிக்கை எடுத்து, இன்று மேற்கொண்டுவரும் நடவடிக்கையை அன்று செய்திருக்கும். நாட்டை வங்குராேத்து அடையச்செய்யும் அதிகாரம் நிதி அமைச்சுக்கோ மத்திய வங்கிக்கோ இல்லை. 

அவ்வாறான நிலையில் நாட்டை வங்குரோத்து அடையச்செய்த பின்னர். அந்த சுமையை பாராளுமன்றத்தின் மீது சுமத்தும்போது அனைவரும் மெளனமாக இருக்கின்றனர்.

அதனால்தான் மக்கள் அரசியல்வாதிகளின் வீடுகளுக்கு தீ வைத்தார்கள். பாராளுமன்றம் தான் நாட்டை வங்குரோத்து அடையச்செய்திருக்கின்றது என்றே மக்கள் நினைக்கின்றனர்.

அதனால் நாட்டை வங்குராேத்து அடையச்செய்தமை தொடர்பில்  முறையான விசாரணை நடத்தவேண்டும் என பாராளுமன்ற உறுப்பினர்கள் 225பேரும் கோரிக்கை விடுக்கவேண்டும். அந்த விசாரணை அறிக்கையின் பிரகாரம் யார் இதனை செய்தார்கள் என்பதை நாட்டுக்கு வெளிப்படுத்த முடியும் என்றார். https://www.virakesari.lk/article/134848