அடிதடிகளுக்கு மத்தியில் நாடாளுமன்றில் "இடைக்கால நிதிநிலை அறிக்கை" நிறைவேற்றம்

[வியாழக்கிழமை, 6 செப்ரெம்பர் 2007, 19:23 ஈழம்] [கொழும்பு நிருபர்]

சிறிலங்காவின் மகிந்த அரசாங்கம் இன்று காலை நாடாளுமன்றத்தில் சமர்ப்பித்த இடைக்கால நிதிநிலை அறிக்கை என்று வர்ணிக்கப்படுகிற ஐந்து வரித்திருத்த பிரேரணைகள் 25 மேலதிக வாக்குகளால் பல்வேறு சர்ச்சைகள் மற்றும் அடிதடிக்கு மத்தியில் சற்று நேரத்திற்கு முன்னர் நிறைவேறியுள்ளன.

"இடைக்கால நிதிநிலை அறிக்கை" என்று வர்ணிக்கப்பட்டு வரவு-செலவுத் திட்டத்தின் மீதான பலப் பரீட்சைக்கு முன்னதாக நாடாளுமன்றில் சமர்ப்பிக்கப்பட்ட இந்த வரித்திருத்த பிரேரணைகள் அதிகப்படியான வாக்கு வித்தியாசத்தில் நிறைவேற்றப்பட்டுள்ளன.

இதன் மூலம் அரசாங்கம் தனது பெரும்பான்மை பலத்தை நாடாளுமன்றத்தில் உறுதிப்படுத்தியிருக்கிறது.

எனினும் வாக்கெடுப்பில் குளறுபடி ஏற்பட்டிருப்பதால் மீண்டும் வாக்கெடுப்பு நடத்த வேண்டும் என்று ஐக்கிய தேசியக் கட்சி வலியுறுத்தியுள்ளது.

சிறிலங்காவின் முதலீட்டு ஊக்குவிப்பு அபிவிருத்தி அமைச்சர் சரத் அமுனுகம, இந்த பிரேரணைகளை நாடாளுமன்றத்தில் இன்று வியாழக்கிழமை காலை சமர்ப்பித்தார்.

சிறப்பு வியாபார பண்ட அறவீடு, உற்பத்தி தீர்வை, நிதித் திருத்தம், பிராந்திய உட்கட்டமைப்பு அபிவிருத்தி அறவீடு உள்ளிட்ட வரித்திருத்த சட்டமூலங்கள் நாடாளுமன்றத்தில் சமர்ப்பிக்கப்பட்டன.

இந்த வரித்திருத்தத்தின் படி செல்லிடப்பேசி பாவனையாளர்களிடம் இனிமேல் அதிகப்படியான வரி அறவிடப்படும்.

இத்தகைய வரித்திருத்தத்த சட்டமூலங்கள் நிதி அமைச்சின் ஆலோசனைக்குழு கூட்டத்தில் சமர்ப்பிக்கப்பட்டு ஆலோசனை பெறப்படவில்லை என்று ஐ.தே.க.வின் நாடாளுமன்ற உறுப்பினர் ரவி கருணாநாயக்க குற்றம்சாட்டியதைத் தொடர்ந்து சலசலப்பு ஏற்பட்டது.

ஆனால் மகிந்த மாளிகையில் நடந்த நிதி அமைச்சின் குழுநிலைக் கூட்டத்தில் இதற்கான ஆதரவை மகிந்த வழங்கியிருந்தார் என்று அமைச்சர் ஜெயராஜ் பெர்னாண்டோபுள்ளே கூறினார்.

இதனைத் தொடர்ந்து நடைபெற்ற மின்னியல் வாக்கெடுப்பில் மகிந்த அரசுக்கு ஆதரவாக 106 வாக்குகளும் எதிராக 81 வாக்குகளும் கிடைத்தன.

ஆனால் இந்த வாக்கெடுப்பில் குளறுபடி நிகழ்ந்துள்ளதாக தெரிவித்த ஐ.தே.க. மீண்டும் வாக்கெடுப்பை நடத்துமாறு சபாநாயகரிடம் முறையிட்டு பெரும் சர்ச்சையில் ஈடுபட்டது.

இதனால் அரச தரப்பு உறுப்பினர்களுக்கும் எதிரணி உறுப்பினர்களுக்கும் இடையே கடும் வாக்குவாதம் ஏற்பட்டது. எனினும் சபாநாயகர் அரசு சமர்ப்பித்த பிரேரணைகள் நிறைவேறியதாக அறிவித்தனர்.

இதனால் நாடாளுமன்றத்தில் பெரும் குழப்பநிலை ஏற்பட்டது. சபாநாயகரின் செங்கோலை பறித்துக்கொண்டு ஐ.தே.க. உறுப்பினர்கள் ஓட முற்பட்டனர்.

அப்போது அரச தரப்பு உறுப்பினர்கள் குறுக்கிட்டு தகராறில் ஈடுபட்டனர். இதனால் அங்கு கைகலப்பு ஏற்பட்டது.

நாடாளுமன்றம் போர்க்களம் போல் இருந்ததாக தெரிவிக்கப்படுகிறது.

ஐ.தே.கவும், ஜே.வி.பி.யும் தமிழ்த் தேசியக் கூட்டமைப்பும் இந்த பிரேரணைகளுக்கு எதிராக வாக்களித்தன.

நன்றி - புதினம்

நாடாளுமன்றத்துக்கு மகிந்த வராதது ஏன்? அலரி மாளிகையின் பதுங்கு குழியிலா இருக்கிறார்?: எதிர்க்கட்சிகள் சாடல்

[வியாழக்கிழமை, 6 செப்ரெம்பர் 2007, 20:03 ஈழம்] [கொழும்பு நிருபர்]

சிறிலங்கா அரச தலைவர் மகிந்த ராஜபக்ச சிறிலங்கா, சிறிலங்கா நாடாளுமன்றத்துக்கு ஏன் வராமல் இருக்கிறார் என்று சிறிலங்காவின் எதிர்க்கட்சிகள் கடுமையாக சாடியுள்ளன.

நாடாளுமன்றத்திற்கு வராமல் மகிந்தவின் மாளிகையில் இருந்தவாறே அமைச்சுக் கூட்டங்களை நடத்துவது குறித்து ஐக்கிய தேசியக் கட்சியினர் நாடாளுமன்றில் இன்று வியாழக்கிழமை கூறியதாவது:

நாடாளுமன்றத்துக்கு அனைத்து அமைச்சர்களும் பிரதமரும், எதிரணியினரும் வரும்போது மகிந்தவினால் மட்டும் இங்கு வரமுடியாதா ?

அவருக்கு இங்கு பாதுகாப்பு இல்லை என்றால் ஏனையவர்கள் எப்படி இங்கு வந்துபோகின்றனர்.?

நாடாளுமன்றத்திற்கு வருவதற்கு அவருக்கு பாதுகாப்பு இல்லையென்றால் மகிந்த மாளிகையில் அவர் பதுங்கு குழிக்குள்தானா இருக்கிறார்? என்றனர்.

தன்வசமுள்ள பாதுகாப்பு மற்றும் நிதி அமைச்சுக்களின் கூட்டங்களை ஏனைய அமைச்சுக் கூட்டங்கள் நடத்துவது போல நாடாளுமன்றத்திற்கு வந்துதான் நடத்தவேண்டும் என்று ஜே.வி.பி உட்பட எதிரணியினரில் இருந்த பலரும் வலியுறுத்தினர்.

இதற்கு பதிலளித்த அமைச்சர் ஜெயராஜ் பெர்னாண்டோபுள்ளே, தனக்கு போதிய பாதுகாப்பு இல்லாததால்தான் அலரி மாளிகையில் பாதுகாப்பு அமைச்சின் கூட்டங்கள் உட்பட முக்கிய கூட்டங்களை அவர் நடத்துவதாக தெரிவித்தார்.

அமைச்சரின் இந்த கருத்தை ஏற்காத எதிரணியினர் நாடாளுமன்றத்திற்கு மகிந்த வரவேண்டும் என்று வலியுறுத்தினர்.

நன்றி - புதினம்