ஆசிய நாட்டுக் குளவி(hornets) இனக் கூட்டம் யேர்மனிக்குப் படை எடுக்க ஆரம்பித்திருக்கின்றன. இப்பொழுது யேர்மனியில் Nordrhein-Westfalen, Saarland, Rheinland-Pfalz ஆகிய மாகாணங்களில் அவை பரவலாகக் காணப்படுகின்றன.

எழுபதுகளின் பிற்பகுதியில்தான் நாங்கள் புலம் பெயர ஆரம்பித்தோம். அதிலும் 1983க்குப் பின்னர்தான் நாங்கள் ஐரோப்பிய நாடுகளுக்கு அதிகமாக வந்தேறினோம்.

யேர்மனியில் அப்பொழுதே  “புலம் பெயர்ந்து வருபவர்கள் தனியாக வந்து அரசியல் தஞ்சம் கேட்கவில்லை. தலைகளில் பேன் பண்ணைகளையும் கொண்டு வருகிறார்கள்” என்று சொல்ல ஆரம்பித்தார்கள். பாலர்வகுப்பு முதல் கல்லூரிவரை அன்று ‘பேன்’ பிரச்சினை ஒரு புதுப் பாடமாக இருந்தது.

ஆசியக் கடைகள் யேர்மனியில் மலர்ந்து கொண்டிருந்த போது கரப்பான் பூச்சிகளை இறக்குமதி செய்கிறார்கள் எனச் சொன்னார்கள். கொஞ்சக்காலத்தின் பின்னர் மூட்டைப் பூச்சிகள் இரத்தத்தை இலவசமாகக் குடிக்கின்றன என்றார்கள். பிறகு, மயிர்கொட்டிகள் உடலில் எரிச்சல்களைத் தருகின்றன என்றார்கள். இப்பொழுது குளவிகள் பற்றிப் பேச ஆரம்பித்திருக்கிறார்கள். ஆசிய நாடுகளில் இருந்து இறக்குமதி செய்யப்படும் பொருட்களுடன் சேர்ந்துதான் ஆசியக் குளவிகள் ஐரோப்பாவிற்குள் வந்தன என்று அடித்துக் கூறுகிறார்கள்.

ஏறக்குறைய இரண்டு தசாப்தங்களுக்கு முன்னரே ஐரோப்பாவில் இந்தக் குளவிகள் குடியேறிவிட்டன. பிரான்ஸின் தென்மேற்குப் பகுதியில் 2004இல் காணப்பட்ட இவை அங்கிருந்து பெல்ஜியம் பின்னர் நெதர்லார்ந்து வழியாக யேர்மனிக்குள் 2020இல் வந்திருக்கிறது என இயற்கை, சூழல் மற்றும் நுகர்வோர் பாதுகாப்பு அமைப்பு சொல்கிறது. 

இந்த வகைக் குளவிகள் கொட்டினால் பெரியளவில் ஆபத்தை விளைவிக்காது. ஆனால் குளவியின் விசக்கொடுக்கு மனித உடலில் தங்கிவிட்டால் கடுமையான வலி இருக்கும். ஆகவே உடனடியாக அந்த விசக் கொடுக்கு அகற்றப்பட வேண்டும் என அறிவுரையும் தந்திருக்கிறார்கள். குளவிகள் கொட்டி, தலைச்சுற்று, மூச்சு விடுவதில் சிரமம், இதயத்துடிப்பு குறைதல் போன்றவை தென்பட்டால் உடனடியாக வைத்தியரைத் தொடர்பு கொள்ளுங்கள் என சுகாதாரத்துறை அறிவித்திருக்கிறது.

ஆசிய நாட்டுக் குளவிகள் யேர்மனியத் தேனீக்களின் கூட்டை முற்றுகையிட்டு தேனீக்கள்  தங்களுக்கான உணவைத் தேடிப் பறப்பதற்கும் தங்கள் கூட்டுக்குத் திரும்புவதற்கும்  பெரும் தடையாக இருக்கின்றன. தேனீக்களுக்கான உணவுகளை குளவிகளே எடுத்துக் கொள்கின்றன.

ஆசிய நாட்டுக் குளவிகளின்  ஒரு  கூட்டினால் பத்தில் இருந்து பதினைந்து  யேர்மனியத் தேனிக் கூடுகள் அழிந்து போகின்றன என  தேனீக்கள் வளர்ப்பவர்களின் குரல்கள்  யேர்மனியில் எழ ஆரம்பித்திருக்கின்றன.

இந்தக் கோடைக்காலத்தில் உண்ணிகள் பற்றிய பேச்சு பெரிதாக எழுந்திருக்கிறது. இது சீனா இறக்குமதி என யேர்மனியப் பத்திரிகை ஒன்று செய்தி வேறு வெளியிட்டிருக்கிறது.

சிறிய உயிரினங்களின்  பெருக்கம்  காலநிலை மாற்றத்தலும்  உணவுப்பற்றாக குறையி னாலும் இடம் மாறுவதும் சூழல் மாற்றத்தாலும்   நடைபெறலாம். வெப்ப நிலையம்   அதிகரித்து செல்கிறது .