கட்டுப்பாடற்ற வாழ்க்கைக்குள் இருந்தவள், முற்றிலுமாக மாறி வெற்றிகரமான ஒரு பெண்ணாக இப்பொழுது இருக்கிறாள். காரணம் அவளுடய மகன்.

சொனி டெய்லர்(39) அவுஸ்திரேலியா சிட்னியைச் சேர்ந்தவள் . ஒரு ஒன்லைன் நிறுவனத்தின் சொந்தக்காரி. மில்லியன் கணக்கில் இன்று சம்பாதிக்கும் அவளது இளமைக் காலம் நன்றாக இருக்கவில்லை.

நியூ சவுத் வேல்ஸ்தான் அவளது இருப்பிடம். பெற்றோருடன் அங்கிருந்துதான் அவள் வளர்ந்தாள், படித்தாள். அவளிடம் எப்போதும் ஒரு பயம்  கூடவே இருந்தது.  அந்தப் பயம் வெளியிடங்களில் மட்டுமல்ல அவளது வீட்டுக்குள்ளேயும் அவளுடன் இணைந்திருந்தது. இந்த உலகம் தனக்குப் பாதுகாப்பானதுதானா? என்ற ஒரு அச்சத்துடன்தான் அவளது பள்ளிப் பருவம் போய்க் கொண்டிருந்தது. 

பயந்து பயந்து வாழ்ந்து கொண்டிருந்தவள் இன்று எப்படி ஒரு நிறுவனத்தைத் தொடங்கி நடத்திக் கொண்டிருக்கிறாள். அதற்கு ஒரு கதை இருக்கிறது.

ஒரே நாளில் எவரும் போதைப் பொருளுக்குள் சடாரென்று வீழ்ந்து விடுவதில்லை. ஒருவர் வாழும் சூழலே அதைத் தீர்மானிக்கிறது.அவளுக்கும் அப்படித்தான். அவள் இருந்த சூழல் அவளை போதைப் பழக்கத்துக்குள் இழுத்துவிட்டது. அவளுடைய காதலன் போதைப் பொருள் பாவித்துக் கொண்டிருந்தான். அவனுக்கு அவளைவிட போதைப் பொருள் முக்கியமானதாக இருந்தது. அவளுக்கோ அவன்தான் முக்கியம். விளைவு அவனுடன் இணைந்து போதைப் பொருள் பாவிக்க ஆரம்பித்தாள். நாளடைவில் தினமும் தனக்குத் தானே ஊசி மூலம் போதை மருந்தை ஏற்றிக் கொள்ளும் நிலைக்கு அவள் வந்து விட்டாள்.

பள்ளிப் படிப்பு பாதியிலே போனது. வீட்டை விட்டுத் துரத்தப்பட்டு வீதியிலே வந்து வீழ்ந்தாள். அப்பொழுதுதான் உணர்ந்தாள் தான் தாயாகப் போகிறாள் என்பதை. இந்தக் குழந்தையை நல்லபடி பெற்றெடுக்க வேண்டும். எந்த நிலையிலும் அதை இழக்கக் கூடாது. நல்ல தாயாக இருக்க வேண்டும். இந்தச் சமூகத்தில் அதை நல்ல முறையில் வளர்க்க வேண்டும். அந்தக் குழந்தைக்கு தான் ஒரு முன்னுதாரணமாகத் திகழ வேண்டும் என்றெல்லாம் தீர்மானித்துக் கொண்டாள்.

ஒரு நிறுவனத்தில் சாதாரண பணியாளராக வேலையைத் தொடங்கினாள். அங்கேயே அவளது திறமையால் மேலாளர் நிலைக்கு வந்து, தொடர்ந்து சமூகவியலில் தேர்ச்சி பெற்றாள். அதன் பிறகு பட்டப் படிப்பை மேற்கொண்டாள்.

வாழ்க்கையைப் பற்றிய பயம் சொனி டெய்லரிடம் இப்பொழுது இல்லை. இன்று ஒரு சொந்த இணைய நிறுவனத்தில் மில்லியன் கணக்கில் பணத்தை ஈட்டுவதற்கு காரணம் சொனி டெய்லரின் ஒரே மகன் ஒஸ்கார் தான்

“ஒஸ்கார் எனக்கு மகனாக வந்திருக்காவிட்டால் இன்று இந்த நிலையில் நான் இருந்திருக்க மாட்டேன். அவன்தான் எனக்கு இந்த வழியைக் காண்பித்தான்” என்கிறார் தனி ஒருத்தியாக தன் மகனை வளர்த்து சாதித்த சொனி டெய்லர்.

 

உங்கள் ஆக்கத்திற்கு நன்றி ஐயா.

 ஒவ்வொரு சம்பவ மும் வாழ்வில் ஒரு திருப்பு முனையாக அமையும் அவளது வாழ்வில் குழந்தை  அவளுக்கு நல்லதோர் வாழ்வுக்கான காரணியாக அமைந்துவிட்ட்து  .கதையை பகிர்ந்தமைக்கு நன்றி