நாடாளுமன்றை இடைநிறுத்தும் அறிவிப்பு எந்நேரமும் வரலாம்! அதன் பின்னர் அமைச்சரவையில் மாற்றம்

நெருக்கடி மிகுந்த வரவு செலவுத்திட்ட வாக்கெடுப்பை ஒருவாறு சமாளித்து, பெரும் வாக்கு வித்தியாசத்தில் அதில் அரசு வெற்றி கொண்டதை அடுத்து, விரைவில் நாடாளுமன்றை இடைநிறுத்தவும், (prorogation of parliment) அமைச்சரவையில் பெரும் மாற்றங்களைக் கொண்டு வரவும் ஜனாதிபதி மஹிந்த ராஜபக்ஷ தீர்மானித்திருக்கின்றார் என்று அறியவருகின்றது.

எந்நேரமும் நாடாளுமன்றம் இடைநிறுத்தப்படலாம் எனத் தெரிகின்றது.

அரசமைப்பின் 70(1), (3), (4) மற்றும் (5) ஆம் பிரிவுகளின் கீழ் ஜனாதிபதி தமக்கு விரும்பிய நேரத்தில் நாடாளுமன்றத்தை இடைநிறுத்தி மீண்டும் கூட்டுவதற்கு அதிகாரமுடையவராவார்.

அவ்வாறு இடைநிறுத்தும் உத்தரவை ஜனாதிபதி விடுக்கும்போது, இரண்டு மாதத்திற்கு மேற்படாத ஒரு நாளில் மீண்டும் நாடாளுமன்றம் கூடுவதற்கான திகதியையும் அந்த உத்தரவில் அவர் குறிப்பிட வேண்டும் என அரசமைப்பின் 70(3) ஆம் பிரிவு கூறுகின்றது.

நாடாளுமன்றம் இடைநிறுத்தப்பட்டு மீண்டும் கூடும்போது அந்தக் கூட்டத்தொடரை ஜனாதிபதி ஆரம்ப உரை நிகழ்த்தித் தொடக்கிவைப்பார்.

அதேசமயம், நாடாளுமன்றம் இடைநிறுத்தப்படும்போது, அதுவரை செயலில் இருந்த நாடாளுமன்றக் குழுக்கள் செயல் இழந்துவிடும் என்பதும்

மீண்டும் புதிதாக நாடாளுமன்றம் கூடும்போது, நாடாளுமன்ற உப குழுக்களை நாடாளுமன்றமே திரும்பவும் புதிதாக நியமிக்க வேண்டும் என்பதும் குறிப்பிடத்தக்கவை.

தற்போது பொது நிறுவனங்கள் தொடர்பான விசாரணைக் குழு "கோப்' என்ற நாடாளுமன்றக் குழுவின் தலைவராக அரசுத் தரப்பிலிருந்து எதிரணிக்கு மாறிய விஜேதாஸ ராஜபக்ஷ எம்.பி. உள்ளார்.

கடந்த ரணிலின் அரசிலும் தற்போதைய அரசிலும் முக்கிய அமைச்சர்களாக இருந்தவர்கள் மற்றும் இருப்பவர்கள் புரிந்தவை எனக் கூறப்படும் பல்வேறு ஊழல்கள், மோசடிகள் பற்றிய விவரம் இந்த நாடாளுமன்ற உபகுழுவின் விசாரணைகளையடுத்து அம்பலப்படுத்தப்பட்டு வருகின்றமையும்

அது அரசுத் தலைமைக்குப் பெரும் தலையிடியைக் கொடுத்து வருகின்றமையும் தெரிந்தவையே.

"கோப்' செயல் இழந்துவிடும்

நாடாளுமன்றத்தை இடைநிறுத்தி, சற்றுக் காலத்தின் பின்னர் அதைக் கூட்டும்போது விஜேதாஸ ராஜபக்ஷ தலைமையிலான "கோப்' நாடாளுமன்றக்குழுவும் செயலிழந்து விடும். பின்னர் புதிய "கோப்' குழுவை, புதிய தலைவர் ஒருவரின் கீழ் நியமித்து, ஊழல் மோசடி விவகாரங்கள் தொடர்பான நெருக்கடிகள் தீவிர மடைவதைத் தடுக்க முடியும் என அரசுத் தலைமை கருதுகின்றது எனத் தெரிகின்றது.

நாடாளுமன்றத்தை இடைநிறுத்தும் நோக்கத்துக்கு இதுவே பிரதான காரணம் என்றும் கூறப்படுகின்றது.

இதேவேளை

வரவு செலவுத்திட்டக் கண்டத்தை அரசு வெற்றிகரமாகத் தாண்டி விட்டதால், தாம் நீண்ட காலம் யோசித்துவந்த அமைச்சரவை மாற்றத்தை இப்போது உடன் செயற்படுத்த ஜனாதிபதி திட்டமிட்டிருக்கின்றார் என்றும் கூறப்படுகின்றது.

ஏற்கனவே ஸ்ரீலங்கா முஸ்லிம் காங்கிரஸின் அமைச்சர்கள், பிரதி அமைச்சர்கள் மற்றும் அனுரா பண்டாரநாயக்கா ஆகியோர் இதுவரை வகித்து வந்த அமைச்சுப் பதவிகள் வெற்றிடமாகியிருக்கின்றன.

மேலும் அமைச்சர்களின் எண்ணிக்கையைக் குறைக்குமாறு, இப்÷பாது வரவு செலவுத் திட்டத்தில் அரசைக் காப்பாற்றிய ஜே.வி.பி. அரசை வற்புறுத்தி வருகின்றது.

இவற்றையெல்லாம் கணக்கில் எடுத்து,பெரும் அமைச்சரவை மாற்றம் ஒன்றை மேற்கொள்ள ஜனாதிபதி திட்டமிட்டிருக்கின்றார் என்று கூறப்படுகின்றது.

வெளிவிவகாரம், முதலீட்டு ஊக்குவிப்பு, தொலைத் தொடர்புகள், மின்வலு, விளையாட்டுத்துறை, நீதி ஆகிய அமைச்சுக்களின் பொறுப்பில் பெரும் மாற்றங்கள் நேர வாய்ப்புகள் அதிகம் தென்படுகின்றன என அரசியல் வட்டாரங்களில் பேச்சு அடிபடுகின்றது.

-uthayan--

அதைவிட ஒரு செய்தி கசிந்துள்ளது ஜேவிபி-யை சேர்ந்த ஒருவர் பிரதமராகலாம் என்று.